Hadraawi oo si Heer sare ah loogu soo dhaweeyay Holland

SOCDAALKII HADRAAWI EE HOLLAND

Waxaa maalintii jicmcaha ee ay bisha Nofeembar aheyd 14ka saacadduna ahayd 15:05 ka soo dagay gagida diyaaradaha caalamiga ah ee ‘Schiphol Airport’ ee waddanka Nederlaan  abwaan Maxamed Ibraahim Warsame “Hadraawi”, oo socdaalkiisii nabadda ka bilaabay Nederlaan. Halkaasoo si weyn loogu soo dhaweeyay, ubuxyo aad u quruxbaddana qoorta loo suray.

Abwaan Hadraawi intii uu joogay Nedelaan wuxuu kulamo guud iyo kuwo gaar gaar ahba la yeeshay Somaalida ku dhaqan Nederlaan. Wuxuu Abwaanku dadkii uu la kulmay ku booriyay ineey u guntadaan sidii ay dhaqankooda iyo diintooda u badbaadsan lahaayeen. Wuxuu kale oo dadka ku baraarujiyay ineey xil wayn iska saaraan ka qeyb qaadashada nabadeynta iyo dib u dhiskii waddanka.

Kulamadaas oo qaar ka mid ah looga dooday sidii loo hormarin lahaa Suugaanta soomaalida, ayuu Abwaanku ku sheegay in suugaantu ay tahay keydka laga daalacan karo dhaqanka, hiddaheenna iyo sooyaalka taariikhdeenna intaba.

Kulankii ugu weynaa uguna xiisaha badnaa oo ay  dadkii ugu faraha badnaa ka soo qeyb galeen ayaa lagu qabtay magaalada Den Haag(Hague), maalintii axadda bishuna ahayd 16ka Nofeembar. Kulankaas oo billowday 12:00kii duhurnimo, wuxuu soo gabagaboobay qiyaastii 21:00 fiidnimo, iyadoo ka soo qeyb galeyaashu ay halkaa ka wada afureen.

Kullankaas oo ahaa mid aad iyo aad u xiisa badan uuna xiriirinayay tifaftiraha Radio Dalamar C/Maalik C/qaadir (Napoli), waxaa ugu horeyn hadallo soo dhaweyn ah ka jeediyay C/laahi Aadan oo ku hadlayay magaca Shacabka Soomaaliyeed ee reer Nederlaan, iyo gaar ahaan qabanqaabiyeyaashii kulanka. Intaa kadib waxaa cashar gaaban oo diini ah ka soo jeediyay Aweys C/laahi oo ka hadlay nabadda iyo doorka ay uga jirto diinta isalaamka.

Intaa kadib waxaa la soo bandhigay Goosgoos la magac baxay Rabbi lagama quustee ha la raadsho Nabaddii. Goosgooskan oo ay isku soo dubbarideen Ururka ardayda Soomaaliyeed ee Waddanka Nederlaan (SSV), ayaa ahaa mid lama iloobaan ahaa, oo runtii ka soo qeyb galeyaashii kulanku ay aad ula dhacsanaayeen. Wuxuuna Goosgoosku bannaanka soo dhigay marxaladda guud ee ay Soomaalidu ku sugantahay, dhinac siyaasad, dhaqaale iyo Bulsho.

Gabagabadii qeybtii hore, ayaa  waxaa abwaan Hadraawi hadiyad guddoonsiiyay Maxamed Cali Cibaar oo matalayay ururka Ardayda Soomaaliyeed ee Waddanka Nederlaan. Haddiyaddaasina waxay issugu jirtay, kitaab lagu magacaabo Fahamka kitaabka iyo Sunnada oo uu qoray Sh. Cismaan Cali Faarax oo kamid ardayda wax ka barata waddanka Nederland, iyo Maanso lagu Magacaabo Isku-Dumma , oo uu tiryay Maxamed Cali Cibaar.

Qeybtii labaad ee kulanka ayaa waxa ugu horreyn si kooban taariikhdii abwaan Hadraawi uga warramay Maxamed Baashe, oo abwaan Hadraawi ku tilmaamay Suugaanyahan daacadnimo iyo geesinnimo isku biirsaday kuna xeel dheeraaday arrimaha bulshada.

Abwaan Axmed Faarax Cali “Idaajaa” ayaa isna halkaa ka sheegay inuu abwaan Hadraawi yaqaannay muddo dheer , una ku bartay riwaayaddii Hadimo ee uu Hadwaawi  Curiyay. Wuxuuna sheegay inuu Abwaan Hadraawi yahay nin jecel inuu tilmaamo qalooca, una madaxbannaanaado fikirkiisa. Taasina waa tan keentay inuu ka horyimaado maamulkii milateriga, “taasoo uu eeday”. “Haddii aad xukun milateri ka hortimaado waad eedeysaa” ayuu yiri isaga oo ka waramayay xabsigii dheeraa ee Abwaan Hadraawi.

Gabagabadii kulanka ayuu hadraawi ka soo jeediyay hadal qiimo badan oo dadkii kulanka ka soo qeyb galay ay aad ugu qushuuceen. Isagoo hadalkiisii ku billaabay “walaalayaal kalgacalkii aad igu soo dhaweyseen mid la mid ah ayaan idinku salaamayaa”, wuxuuna ugu horeyn ka war bixiyay socdaalkiisii nabadda ee uu ku soo maray Soomaaliya. “Wixii aan Soomaaliya ku soo arkay ma rumeysan karo wax aan filayayna ma ahayn” ayuu yiri Abwaanka oo tilmaamayay soo dhoweyntii uu la kulmay iyo sida ay dadku nabadda diyaar ugu ahaayeen.

Waxa kale oo uu abwaanku kula taliyay dadkii kulanka isugu yimid ineey si wada jir ah waddankii wax uga qabtaan. “Qof aad boqol u dirto oo hadana berri ku soo weydiinaya wax macno weyn ah ma sameyneyso. Laakiin waa inaad kooxkoox isugu tagtaan oo aad waddankii mashruucyo gaysaan oo aad maal gashataan. Taasaa ka kheyr badan oo ay dad badanina shaqo ka helayaan”, ayuu yiri abwaan Hadraawi oo ka deyriyay ma shaqeystenimada ku sii badaneysa waddankii, iyo baryo ku noolaanshaha.

Mar uu ka hadlayay mabda’iisa wuxuu yiri “waxaa wanaagsan in qofka mar la barto ee ma aha in maalin walba yaad tahay la yiraahdo. Qofkii raba inuu ogaado waxaan ahay iyo waxaan aaminsanahay ha aqriyo gabayadeeyda, waayo qofka gabayadiisa waxaa laga dhex akhrisan karaa qofka uu yahay.”

“Nin weyn inuu cid isugu yeero ma ahee inuu dad kala geeyo ma wanaagsana. Waxaana quruxbadan in meeshii aad tagto gogoli kuu taallo ee aan godobi kuu oollin” sidaasna waxaa ku dardaarmay abwaan Hadraawi oo tilmaamayey sida loogu baahanyahay in laga shaqeeyo wanaagga.
Socdaalka Hardraawi oo ku dhamaaday jawi wanaagsan ayaa waxaa uu abwaanku waddanka Nederlaan uga sii gudbay dalka Belgium, halkaas oo uu kasii aadayey wadanka  Norway.

Waxaa diyaariyey :Axmed Cali M.  Khayre
E-mail: aakhayre@hotmail.com