|
DAREENKAYGII MARKAAN IMID LONDON
Ibraahim Saalax Aaden | SomaliTalk Yurub
Email:
ibra88@hotmail.com
Aug 3, 2005
Markaan socdo
waddooyinka bartamaha London, waxaan si cad u dareemayay inaan dhex socdo
magaallo dadkeeda si weyn uga feejigan qaraxyo iyo weeraro ku soo socda.
Booliiska iyo baabuurta dab-damiska ah ayaa meel walba kaaga hor-imaanaya.
Waxaa dhacda inay booliiska ku istaajiyaan, hadday muuqaalkaaga u gartaan
inaad soomaali tahay. Waxaa dhacda inay saacado badan ku haystaan oo ay ku
weydiiyaan arrimaha la xiriira qaraxyadii lala beegsaday meelo ka mid ah
London.
Dareenka dadweynaha waxaad
mooddaa nacaybkii ay billowgii bisha luulyo u qaadeen bakistaaniyiinta inay
ugu darsantay dadyow kale oo ka soo jeeda Geeska Afrika, gaar ahaan
soomaalida, kadib markii labo ka mid ah lagu soo eedeeyay inay isku-day
qaraxyo oo fashilmay ay doonayeen inay ka fuliyaan meelo ka mid ah London,
inkastoo ay soo baxayaan wararka sheegaya mid k ka mid labadaas nin uusan
soomaaliba ahayn oo Itoobiyaan yahay.
Labadii
maalmood ee aan London joogay, kuna beegnaa weekend-kii tagay waxay
taleefishinnada dalka Britain ay si talantaali uga hadlayeen faallooyinka ku
saabsan qaraxyadii ka dhacay London. Weriyayaasha tv-yadaas ka soo baxa
England ayaa si aan dheellitirsanayn u kicinayay dareenka dadweynaha reer
Britain, taasoo abuuraysay nacayb hor leh oo loo qabo guud ahaan jaaliyadaha
muslimiinta.
Goobaha ganacsiyada iyo xarumaha ururrada soomaalida ay leeyihiin ayaa si
joogto ah maalmahaan uga hadla eedeymaha loo soo jeediyay labada nin ee lagu
nisbeeyay soomaali, kuna lug leh sida la sheegay qaraxyadii London.
Inkastoo ay jireen dadaalo
kooban iyo kulamo aanan badnayn oo ay soomaalida ka qaateen eedeymahaas,
haddana waxaa hubaal ah inay soomaalida Uk ku guuldaraysteen inay
warbaahinta Britain ay u gudbiyaan jawaabo cadcad oo ay ku sharxayaan
mowqifkooda ku aaddan arrimahaan murugaysan.
Kumanaan kun oo ururro soomaaliyeed ayaa ka jira dalka Uk, hase ahaatee
badankoodu waxay sal ku hayaan qabiilkii burburiyay qarankoodii iyo
dalkoodii ay ka soo qaxeen. Way adkaan kartaa in wax ka yar 5 urur ay hal
ujeeddo ku kulmaan, shaki iyo kalsoonni darro aan loo baahnayn ayaa
dhexdooda si weyn looga dareemayaa markaad dhagaysatid waxa ay dhexdooda
isku hayaan, waana tan keentay inayan dowr fiican oo muuqda ka qaadan waxa
danta u ah inay ka wada kulmaan. Inkastoo laga joogo qiyaastii 2 usbuuc
markii magaca nimanka soomaalida lagu lifaaqay kooxaha argagaxisada ee
booliiska Britain ay raacdaysanayso, haddana maalintii dorraad ayay ahayd
markay qaar ka mid ah ururrada soomaalida ay ku wada kulmeen kulamo ay
arrimahaan si wadajir ah uga wada hadlayaan. Waxaa la sameeyay xiriir
taleefan oo hotline ah ay soomaalida London ku wada xiriiri karaan, haddii
qaarkood loo gaysto falal xadgudubyo ah.
Gabar soomaaliyeed oo la dilay
Nin deggan London ayaa ii sheegay, in gabar soomaaliyeed oo reer London ah
laga soo riday/tuuray dabaqa afaraad daartii ay ka degganayd, halka nin
dhalinyaro ah oo injineer ah oo madoow ah degganna Liverpool ay dileen koox
cunsuriyiin ah, kadib markay u maleeyeen inuu soomaali ahaa, sida ay
booliiska u sheegeen warbaahinta Britain.
Dumarka muslimiinta Uk
Booliiska ayaa dumarka muslimiinta ee xijaaban dhowr jeer uga digay in loo
gaysto falal-denbiyeed aargoodsi ah, kadib qaraxyadii London. Wadaad Masri
ah oo ku hadla magaca imaamyada masaajidda Uk ayaa dumarka muslimiinta u
fatwooday inay xijaabka iska dhigaan haddii qaadashada xijaabka ay dhibaato
u keenayso. Bayaan ay dumarka muslimiinta uk soo saareen, laguna daabacay
shabakadda islam online ayay ku gacan sayreen fatwada wadaadkaas masaarida
ah, waxayna ku adkaysteen inuu xijaabka yahay waajib diinni ah uu Allaah ku
waajibiyay ayna isla markaas qaadanayin fatwadaas uu isaga la yimid.
Waxaa isa soo taraya
wararka sheegaya in ninkii lagu sheegay soomaaliga, laguna eedeeyay inuu ka
danbeeyay isku daygii qaraxii bishii tagtay ee 21-ka luulyo la doonayay in
laga sameeyo meelo ka mid ah London uusan soomaali ahayn. Wargayska The
Guardian ayaa maanta maqaal uu daabacay ku sheegay inuusan ninkaas soomaali
ahayn, magaciisana Osman ahayn. Magaciisa wuxuu wargayska ku sheegay Hamdi
Isaac uuna Itoobiyaan yahay. Hamdi wuxuu dowladda Talyaaniga ka codsaday
inaanan isaga faraha loo gelin booliiska Uk, oo dacwadiisa lagu qaado dalka
Talyaaniga.
Digniino joogto ah
Mararkii badnaa ee aan
booqashada ku soo gaaray London aad ayay markan danbe iiga duwanayd. Guud
ahaan goobaha garoonada diyaaradaha, isteeshinada tareenada iyo xarumaha
basaska ayaad si is daba joog ah ugu maqlaysaa ereyo ay ka mid yihiin
inaadan qaadin boorso si gooni meel u taala iyo inaad la xiriirtid
howl-wadeennada goobahaas haddaad aragtid waxaad ka shakisid. Welwel iyo
walbahaar ayaad dareemaysaa markaas maqashid ereyadaan, weliba adigoo jooga
mid ka mid ah magaalooyinka lagu tilmaamo xoriyadda iyo ammaanka.
DENMARK: QAXOOTI
SOOMAALIYEED OO CUNTADA KA SOOMAY
Somali ku xirnaa
Israil oo is dili gaaray
 Sida
ay qorayeen saxaafadda Caalamka waxaa muddo 3 sano ku xiran sahnuuniyada
Israil nin Soomaaliya oo lagu magacaabo Faysal Madadaal, isagoo bilooyinkaan
dambe u dhexeeyay isku tuurtuur wadanka Qubrus iyo Israil. Faysal waxuu
wadanka Israil galay sanadkii 1999kii, waxuuna dalbaday magangalyo
qaxootnimo, sida ay qorayaan saxaafadda israil waxaa waqtigaas la siiyay
Faysal madadaal joogitaan uu iska joogo wadankooda,Hay'adda Qaxootiga
adduunkana (UNHCR) waxay tiraba 6 wadan uga raadisay inay siiyaan magangalyo
qaxootinimo balse dal aqbala may helin...
Guji... Jun
20, 2005 |
