Range Resources oo u Hanjabtey
Websiteyada Ka Hadla Danaha Soomaaliyeed
Tarjumadii SomaliTalk.com iyo
warbixin kooban | June 1, 2006
Waxaa arrin layaab leh noqotay
in maanta (June 1, 2006) ay shirkadda Range Resources warqad
ay u dirtay suuqa ganacsiga ee Australia (ASX) ay ugu
hanjabtey websiteyo ay ku tilmaantay inay ka faafiyeen war
been ah oo ay tiri waxaa warkaas loo aaneeyey ama lagu
xiriiriyey Laanta Afka Soomaaliga ee British Broadcasting
Corporation. Taas oo ay ku tilmaantay in ay bateen
daabacaada wararka lagaga soo hor jeedo.
Range Resources waxa ay ku
hanjabtey in ay dabagal ku samayneysa shirkadaha marti
geliya websiteyaas.
Range Resources warqadda ay
suuqa ganacsiga u dirtay kuma xusin hadalkii
Madaxweynaha DGPL ee uu ka sheegay British Broadcasting
Corportion ee ahaa in shirkadaha uu heshiiska la galay uu ku
tilmaamay in ay yihiin shirkad yar oo ah "JIRRI" ah, ayna
garbaha ku sitaan hub.
(Hadalkii
Cadde Muuse ka dhegeyso halkan....
).
Range Resources waxa keliya oo
ay qoraalkooda ku xuseen shan qodob oo ka mid ah lixdii
qodob ee ku qornaa heshiiskii ay May 30, 2006 kala
saxiixdeen Cadde Muuse iyo Shariif Xasan.
Qoraalka Range Resources
qaybta ay ku hanjabayaan ayaa ku bilowday sidan:
Qoraal lagu qoray Internetka:
Shirkaddu (Range Resources)
waxa ay muddo ku baraarugsanayd qoraalo been ah oo lagu soo
bandhigay Website-yo, iyo akhaar majara-habaabin ah oo ku
saabsan shirkadda, iyo hawlaha ay shirkaddu ka wado Puntland
iyo ficillada dowladda Puntland. Qoraaladaas la daabacay iyo
warbixinnadaas beenta ah taageero kama haystaan dadka reer
Puntland badankiisa, xaqiiqadiina, kama soo bilaaban gudaha
dalka, laakiin waxa ay ka yimaadeen xoogaa yar oo dibada
dalka ka joogta. Qoraaladaas la daabacay dhowaantan ayey
siyaadeen ayagoo ay kobcisey warbixino been ah oo loo
aaneeyey laanta Afka Soomaaliga ee British Broadcasting
Corporation. Keliya shirkaddu British Broadcasting
Corportaion uma sheegin warbixinta beenta ah ee ayaga lagu
xiriiriyey, balse sidoo kale waxa ay xulatay (qabsatay) qayb
qaabilsan latalinta (Information Security Consultant) si ay
u daba gasho shirkadaha marti geliya websiteyadaa si ay u
eegaan si loo bilaabo in laga qaado arrimo la xiriirta
sharciga.
Range oo hadalkeedii sii
wadata waxa ay tiri: Shirkaddu waxa ay rumaysan tahay in
kororka warbixinada beenta ah ee majara habaabinta ah ay ka
dhasheen horumarka iyo sumcadda Range ee ah in ay
bilaabayaan qodista Puntland iyo soo bandhigidda ay
muujiyeen in ay macdan iyo shidaal badan uu ku jiro gobolka.
Arrimahaas waxaa lagu carqaladaynayaa heshiiska hadda jira
iyagoo shakhsiyadkaasi rajaynayaan in ay iyagu ka faa'iidaan
qaybaha kale ee doonaya in ay helaan fursado ay ku baaraan
Puntland.
Qodobka 2aad ee
heshiikii May 30, 2006:
In meeshiisa laga
wado barnaamijka baarista, soo saarista macaadinta iyo
shidaalka Puntland, lana xurmeeyo wixii heshiisyo ahaa ee
labada dhinac horay u wada gaareen kuna saabsan arrintan,
iyadoo
aan arrintaasi cidna loo xirayn lagana dhigayo qaab
Blocks ah |
Haddii aan dib u jalleecno
qoraalka shirkadaas, waxaa ugu horayn kaaga soo baxaya in ay
ku baraarugeen in heshiiska ay la galeen Puntland lagula
tartamayo mar dhow, maadaama qodob ka mid ah heshiiska ay
saxiixeen Cadde Muuse iyo Shariif Xasan uu xusayo qaabka loo
yaqaan "BLOCKS" oo aan cidn aloo xirayn, qaabkaas oo ah in
cid kale loo ogolaan karo in ay tartan ku gasho soo saaridda
khayraadka Soomaaliya, arrintaas oo laga hoos bixiyey
madaxda Puntland. Waxaana sidaas ku suurta geliya hadalkii
uu Ra'iisul wasaaraha Soomaaliya, Cali Maxamed Geedi, ku
qoray warqaddiisii May 18, 2006, ee ahaa in tixgelin lasiin
doono kuwii ay dowladii hore ee Soomaaliya la gashay
heshiisyada ama qandaraasyada shidaal baarista. Waxaana
adduunka markasta tix-gelin la siiyaa in la ictiraafo
heshiisyadii, amaahdii, deyntii, iwm, ay gashay dowladdii
ka horeysey dowladda markaas jirta.
Waxaa taas dheer in Shariif
Xasan uu sheegay in sharci loo samaynayo Khayraadka
Soomaaliya, taas oo soo saaridda shidaalka Soomaaliya
gacanta u gelineysa Dowladda Federaalka Soomaaliyeed sida uu
qabo dastuurka Federaalka Soomaaliya. (Warbixino dheeraad ah
ka Eeg Lifaqa Hoose).
Markii ay arrimhaas indhaha ku
kala qaadeen ayey Range Resources bilaabeen hanjabaad ay u
hanjabayan warbaahinta ka hadasha arrimaaha Soomaaliya.
Isku soo duub oo waxaa
cajaa'ib badan dad dhulkooda loogu hanjabayo. Dowalda loo
hanjabayo, waayo Ra'iisul wasaaraha Soomaaliya iyo
Madaxweynaha DFKMG labaduba waxa ay ka hor yimaadeen
heshiiska ay DGPL la gashay shirkado ajnabi ah ayadoo aan la
soo marin Dowladda Dhexe.
Waxaa taas dheer in ay muuqato
in ay shirkadaasi rabto in aan Dowladda Puntland lagula
xisaabtamin meesha ay marto $200,000 ee ay sheegtay in ay
bil kasta siiyaan Puntland.
Halkan
dhegeyso...
Xubno ka tirsan Dowladda
Federaalka oo ka soo hor jeestay heshiiskii dhex maray Cadde
Muuse iyo Shariif Xasan...
Xubno ka tirsan Dowladda
Federaalka KMG oo isugu jira Wasiiro iyo Xildhibaano ayaa si
weyn uga soo hor-jeestay heshiiskii dhex maray Guddoomiyaha
Baarlamaanka Shariif Sheekh Aadan iyo Madaxweynaha Puntland
Cadde Muuse, waxaana heshiisku uu dhigayaa in maamul
Gobaleedku ay u madax banaan yihiin ay macaadin kala soo
baxaan dhulka maamul Gobaleedka Puntland, iyadoo Dowladda
Federaalkana ay kor kala socon doonto.
Siciid Xasan Shire oo ah
Wasiir ku xigeenka Horumarinta Reer Miyiga ee Dowladda
Federaalka ayaa heshiiska dhex maray labada dhinac ku
tilmaamay mid sharci daro ah.
“Waxa la doonayaa in
kheyraadkii maamul Gobaleed-ka Puntland loo xalaaleeyo
shirkado maafiyo ah” ayuu yir Wasiir ku xigeenka oo u soo
jeediyay dadweynaha ku nool Maamul Goabaleedka Puntland in
ay ka hor tagaan ama ay iska diidan heshiiskaasi, waxaa la
weydiiyay maxaad hor taagan tahay in Puntland ay soo saarato
kheyraadkeeda?.
Waxa uuna ku jawaabay Wasiir
ku xigeenku “anigu ma diidani in shacabka Puntland ay soo
saartaan kheraadkooda, balse waxaan ka soo horjeedaa wixii
sharci daro ah”.
Faafin: SomaliTalk.com |
June 1, 2006
LIFAAQ: WARBIXIN KOOBAN:::
Pro. Cali Maxamed Geeddi, Ra'iisul wasaaraha
Dowladda Federaalka Kumeelgaarka ee Soomaaliya.
|
C/Lahi Yusuf |
Shariif Xasan |
Cadde Muuse
|
Heshiiska ay kala
saxiixdeen Guddoomiyaha Baarlamaanka DFKMG iyo Madaxweynaha
DGPL: Qodobka labaad waxa uu ku bilaabmayaa sidan: (2)
In meeshiisa laga
wado barnaamijka baarista, soo saarista macaadinta iyo
shidaalka Puntland...... Halka qodobka
saddexaad uu ku bilaabanayo sidan: (3) In labada dhinac ay
bilaabaan wadahadal ku saabsan sed qaybsiga inta aan la
gaarin wax soo saarka macaadinta iyo shidaalka Puntland
laga helo.
Waxaa heshiiskaas dhinac
socda in Shariif Xasan Sh. Aadan, Guddoomiyaha
baarlamaanda DFKMG, intii uu joogey magaalada Boosaaso ee Gobolka Bari ee Soomaaliya
in uu sheegay in dhowaan sharci loo samaynayo khayraadka
dabiiciga ah ee dalka, arrintaas oo uu ku waafaqay hadalkii
ra'iisul wasaaraha DFKMG, Cali Maxamed Geedi ee sharci u
samaynta khayraadka dabiiciga ah ee dalka. (Hadalkii Shariif Xassan ka dhegeyso
halkan...) (Hadalkaas waxa uu yiri May 29, 2006
asagoo joogey Boosaaso). Isla waqtigaas Madaxweynaha
Puntland, Gen. Cadde Muuse waxa uu shirkdaha ay heshiiska la
saxiixdeen ku tilmaamay JIRRI. (Halkan
ka dhegeyso hadalkii Cadde Muuse).
Isla maalintii uu
Madaxweynaha Puntland hadalkaas yiri ("Waa
run weeye, JIRRI* weeye, annagaana dooranay, shariikad weyn
waxba noo qaban meyso, boqol sano ayey waxna noo qaban
waayeen.") waxaa hoos u dhacay saamiyadii shirkadda Range
Resources ee suuqa ganacsiga Australia, waxana ay hoos u
dhaceen -5.56%, ayagoo noqday in lagu kla iibsado
0.034 (oo ah centiyaad ah lacagta Australia.).
Markaas ayaa shirkadaasi
mar kale waxa ay xanibeen ama joojiyeen in la iibsado
saamiyadooda (Trading Halt)
ayagoo sheegay in ay sidaas u yeeleen in ay qoraal u diri
doonaan suuqa ganacsiga ee Australia. Maanta (June 1, 2006)
ayey qoraalkaas u direen suuqa ganacsiga sida aan kor kusoo
xusnay. (Eeg halkan)
Madaxweynaha DFKMG,
Cabdullaahi Yuusuf Axmed oo bishii September 2005 ayaa wax
laga weydiiyey arimaha ku saabsan shidaalka laga baarayo
Puntland ee DGPL ay tiri anagaa xaq u leh in aan saxiixano
heshiis caalami ah, halka Cali Maxamed Geedi oo ah Ra'iisul
wasaaraha DFKMG uu heshiiska Puntland iyo shirkadaha
Australia uu ku tilmaamay waxba kama jiraan, waxa uu
Cabdullahi Yusuuf ku jawaabey: "Fikradayda haddaad dooneyso
waxa weeye sida sharciga, nidaamka iyo dastuurku qorayaan
baan aaminsanahay anigu." ... "Sharci ahaan marka maanta in
Puntland laga gar leeyahay anaa maanta qiraya, weliba
Puntland-na waa ka imid, waana ku dhashay, madaxweyne waa u
ahaa, ninkii dembi gelayaa yeelkiis anigu lama wadaago,
ninkii khalad gelayaa yeelkiis." (Eeg
halkan..).
Gudoomiyaha Hay’adda INXA ee Gobolada Puntland Cabdi Faarax oo welina ku jira Xabsiga Bosaaso.
Boosaso-June 1, 2006:
Waxaa weli maalintii sadexaad ku jira Saldhiga Magaalada Bosaaso Guddoomiyaha Bulshada Rayidka Ururka INXA Xafiiska Gobolada Puntland Cabdi Faarax, kadib markii uu isku dayey si nabad ah inuu ku dhigo banaanbax lagu muujinayo sida bulshada uga xuntahay Dagaalada Macnodarada ah ee Muqdisho ugu dhimanayaan Shacabka Soomaaliyeed.
Akhri halkan...
May 31, 2006: Shariif
Xasan oo Safar Dhulka ah ku soo maray Qardho, Garoowe iyo
Galkacyo:
Waftiga Guddoomiyaha
Baarlamaanka ayaa subaxnimadii Arbacada May 31, 2006 ka soo
ambabaxay magaalada Dekeda ah ee Boosaaso oo uu
guddoomiyuhu heshiis kula soo saxiixay madaxweynaha DGPL,
waxana ay waftiga guddoomiyuhu soo qaaday jidka dheer ee
isku xira Boosaaso ilaa Muqdisho. Waxaana Waftigu ay soo
mareen magaalooyinka Qardho, Garowe iyo Galkacyo oo ay soo
gaareen abaarihii shantii galabnimo waqtiga Geeska Afrika.
Heshiis ay Wada Saxiixeen
Shariif Xasan iyo Cadde Muuse
Kulankii heshiiska lagu
saxiixayey oo ka dhacay Boosaaso May 30, 2006, waxaa
qodobadii heshiiska ka akhriyey Caydaruus
Cismaan Yuusuf oo ah agaasimaha madaxtooyada maamul
Goboleedka Puntland. Caydaruus oo akhrinaya qodobada
heshiiska
Halkan ka dhegeyso
ama akhri hoos:
Caydaruus waxa uu yiri: Memorandum of Understanding
(Qoraal rasmi ah oo is afgarad) oo ay wada saxiixi doonaan
haddii Allah idmo, kusimaha madaxweynaha Dowladda Federaalka
ahna guddoomiyaha baarlamaanka Federaalka ah iyo
madaxweynaha Dowlad Goboleedka Puntland, mudane
Maxamuud Muuse Xirsi, waxana uu u qoran yahay sidatan:
Heshiis is afgarad:
Xarunata
Madaxtooyada Puntland,
Boosaaso, G/Bari | Sawirka: plpost. |
Maanta oo ah Talaada May 30,
2006, waxaa xafiiska madaxtooyada Puntland ee Boosaaso
heshiis is-afgarad ku kala saxiixday wafti ka socda
Baarlamaanka Federaalka Kumeelgaarka ee Soomaaliya oo uu
hoggaaminayo guddoomiyaha baarlamaanka Federaalka, Shariif
Xasan Shiikh Aadan, ahna sii hayaha xilka Madaxweynaha
Dowladda Federaalka Kumeelgaarka ee Soomaaliya, iyo
masuuliyiinta Dowladda Puntland oo uu hoggaaminayo Madaxweynaha
Dowlad Goboleedka Puntland ee Soomaaliya, Maxamuud Muuse
Xirsi.
Labada dhinac waxay isku
afgarteen:
- In Dowlad Goboleedka
Puntland ay ka laabato kalsoonidii ay kala noqotay
Ra'iisal wasaaraha dowladda Federaalka Cali Maxamed
Geeddi.
- In meeshiisa laga
wado barnaamijka baarista, soo saarista macaadinta iyo
shidaalka Puntland, lana xurmeeyo wixii heshiisyo ahaa ee
labada dhinac horay u wada gaareen kuna saabsan arrintan, iyadoo
aan arrintaasi cidna loo xirayn lagana dhigayo qaab
Blocks ah (ama qayb-qayb).
- In labada dhinac ay
bilaabaan wadahadal ku saabsan sed qaybsiga inta aan la
gaarin wax soo saarka macaadinta iyo shidaalka Puntland
laga helo.
- In la sameeyo
shuruucda habaynaya baarista, soo saarka, maamulka iyo
sed qaybsiga kheyraadka ku jira dhulka iyo badda
hoostooda sida macdanta, shidaalka, IWM - samaynta
sharcigaasi wuxuu noqonayaa mid si wadajir ah looga wada
tashanayo.
- In ay labada dhinac
abuuraan jawi Iskaashi iyo wadatashi iyadoo wixii xiriir iyo farriimo ah loo marayo oo keliya nidaamka rasmiga ah.
- In labada dhinac ay kawada shaqeeyaan ka
hortagga wixii xiriirkooda wax u dhimaya layskana dhowraa wixii xasaasiyad keeni
kara.
Shariif Xasan Sh.
Aadan,
Sii haya xilka Madaxweynaha Dowladda Federaalka
Kumeelgaarka, ahna guddoomiha Baarlamaanka |
Maxamuud Muuse Xirsi,
Madaxweynaha Dowladda Puntland |
May 30, 2006
Cadde Muuse oo
Markii ugu horeysey Qiray Shirkadda uu Heshiiska Lagalay in ay Tahay Jirri
hubaysan....
Sidaas waxa uu shaaca ka qaaday mar su'aal
laga weydiiyey arrinta shirkadaha uu....
Guji......
Faafin: SomaliTalk.com |
June 1, 2006
Daabaco
Boggan | Print
