Qaybtii 13-aad

W/D: Amiin Yuusuf Khasaaro

E-Mail amiinkhasaaro@hotmail.com

Muqdisho, Soomaaliya

            Cayaartu waa ay degen tahay, oo labada kooxood waxa ay kubbaddoodu dhaafi la’ dahay dhexda taageerayasha labada kooxood ayaa isweydiinaya, waxa ay cayaartu u qabowdahay, isla markaana la isku weerari la’ yahay, mid ka mid ah taageerayaasha ayaa la soo booday waxa uu yiri “Wallaahi ma garanayo halka wax si ka yihiin”.

            sidii loo daawanayay cayaarta ayaa waxaa la bedelay Gartsoorihii horey Cayaarta dhex dhexaadinayay, waan Garsoore Barre Hiiraale, waxaana qalabkiisii deg deg u gashaday Garsoore Cali Cabdalla Saalax, dhamaan taageerayaashu aad u bay u yaaban yihiin, waxayna leeyihiin “Garsoorahaan hore ayuu dhex dhexaadiyay labadaan kooxood, waxayna eed gaar ah uga timid dhinaca Kooxda Muqdisho, kaddib markii lagu eedeeyay in uusan dhex dhexaad ka ahayn cayaarta” hase yeeshee Cali Cabdalla Saalax isagoo u gacan haatinaya taageerayaasha labada kooxda ayaa waxa uu yiri “bal markaan ha la igu dayo in aan labada kooxood dhexdhexaadiyo, waa taasoo aan guul ka soo hooyaaye”, Garsoore  Cali Cabdalla waa nin khibraad badan oo si aad ah ula socday cayaartaan heerarka ay soo martay.

            Markii waxa uu Garsoore Cali Cabdalla Saalax isugu yeeray labadii Kaptan Shariif Xasan Shiikh Aadan iyo C/llaahi Yuusuf Axmed, si gaar ah ayuu ula faqay, waxa uu ku yiri ciyaarta ha la dejiyo, hana noqoto mid natiijo wax ku ool ah ka soo baxaan, labadoodiiba si kal iyo laab furnaan ah ayay ku soo dhaweeyeen hadalka ka soo yeeray Garsoore Cali Cabdalla Saalax, waxaa la arkayay Kaptan C/llaahi Yuusuf iyo Kaptan Shariif oo isku qoslaya oo aan ka muuqan xanaaqii horey looga bartay labadooduba, mararka qaarkood inta ay cayaartu socoto kii dhulka ku dhaca si fudub ayuu kan kale u garab qabanayay, dabacsanaanta ka muuqata labada Kaptan, waxaa si aad ah u la yaaban cayaatooyda Labada  Kooxood oo qaarkood waxay leeyihiin “War sidey wax u jiraan, labadii Kaptan waa kuwa sidaan isugu dhowaadaye”, Mid kalaa soo booday waxa uu yiri “Waxaa cayaarta waxaa wax ka bedelay garsoore Cali Cabdalla Saalax”.

            Ilaa iyo haatan dabacsanaanta ka muuqata Kaptan C/llaahi iyo Kaptan Shariif cid ka hor timid ma jirto ciyaartooyda labada Kooxood, cayaarta si wanaagsan ayay u wada cayaarayahan, haddii aan soo qaadano cayaarhayan Jinni Boqor iyo Cayaaryahan Jurile oo si aad ah isku raaci jiray haatan waa ay kala tartiibsadeen, sidoo kale Cayaaryahan Max’ed Dheere iyo Max’ed Qanyare oo iyana lafaha isa saari jiray maanta waxaa ka muuqata deganaan iyo isku turid, sidoo kale Cayaaryahana Mowliid Macaane iyo Cayaaryahan Shiikh Jaamac oo lafaha iska dhuuxi jiray, maanta waxaa ka muuqata farxad iyo reyn reyn, haddana midba midka kale waxa uu ka difaacanayaa Goolka, Ciyaaryahan Muuse Suudi iyo Cayaaryahan Cali Max’ed Geedi oo iyana is baal gooban jiray, waxay dhankooda u muuqdaan in ay kala baal bedesheen.

            Taageerayaasha labada Kooxood xitaa waxay arkeen labadii Dhakhtar ee Kooxda, Caasho Cabdalle oo kooxda Muqdisho ahayd iyo Khadiijo Maxamed Diiriye oo Jowhar ka soo jeeday, iyagoo kursiga keydka fadhiya ayay isku gacan- haatinayeen, xitaa waxay dabacsanaantii saameysay Taageerayaasha labada kooxood oo horey isku dhagax tuuri jiray, haatanse way is dhex- galeen, oo waxay qaybsanayeen barafka, Jalaatada iyo Lowskii iyo waxyaalo kale oo ay madaadaaliska ku fiican.

            Beesha Caalamka ayaa iyana aad ula yaaban deganaashaha ka muuqda Cayaarta dhex mareysa Muqdisho iyo Jowhar, waxayna leeyihiin sidey wax u jiraan, oo maxaa is bedelay?, qaarkood waxaa ka soo yeeraya “Awalba Soomaali bay isla ahaayeen oo is fahmeen, waxayna goosteen in ay cayaarta wanaag ku dhameeyaan” midbaa hadalka qaatay oo yiri “waxaan u maleynayaa in ay ka cabsanayaan in la ganaaxo”, “ma sidaa ma ahane waxay ka cabsanayaan in dhaqaalihii ay FIFA siin jirtay laga goosto” ku kale ku yiri “war waa isku xiiqeene, marka waxay doonayaan in ay kala nastaan oo cayaarta si qabow ku wadaan”.,

            Todobaadkii hore ayay ahayd markii kooxo Seria-C ama heerka saddexaad ah oo la doonayo in loo qoro Kooxda Muqdisho ayaa fashil ku dhamaaday kaddib markii la isku qabsaday cidda Tababaraha u noqoneysa kooxda oo loo barbaarinayay in ay mustaqbalka bedelaan kooxda heerka koowaad ee Muqdisho, waxaana arritaani si weyn isugu qabsaday cayaartooydii weyneyd ee Kooxda oo mid walbaa uu doonayo in uu tababare u noqdo kooxda, balse Gow iyo Gash ma leh ayay arrintii isku soo biya shubatay, waxayse markii dambe cayaarooydii Kooxda heerka 1aad iyagoo Garka ciidda ka ceshanaya ayay si qasab ah ku marsiiyeen tababaraha kooxda oo loo magacaabay Tootoow.       

• QAYBIHII HORE EE Xaggee Mareysaa Cayaartii xiisaha badneyd ee Jowhar iyo Muqdisho!        

La soco Sabtida soo socota.....

W/D Amiin Yuusuf Khasaaro

E-Mail amiinkhasaaro@hotmail.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Jan 7, 2006

 

---

• C/llaahi Yuusuf iyo Shariif Xasan ma waxay soo taabteen Xeerada salkeeda?

• Mareykanka oo si Tartiib-Tartiib ah nooga Aarsanaya: -Qore: Amiin Yuusuf Guji...