May 18, 2004
WARARKA MAANTA
- TNG-da oo sheegtay
inay xakamaynayso Baasaboorka Soomaaliya.
- Dawlada Kenya oo
baabi’isay Kiiska Dilkii Xildhibaan Ibraahim Xuubcaaro.
- Daahir Riyaale oo
maanta Fagaaraha Khayriyadda ka jeediyay Khudbad
- C/qaasim oo Libya
Wadahadallo kula leh Qadaafi.
- Dabaylihii Maansoonka
oo ka billawday Xeebaha Koonfurta Soomaaliya
- Qaar ka mida
Hay’adaha Samafalka oo hawlahoodii dib uga bilaabaya K/Soomaaliya
W/Q.Abdi Wali Ibraahim
Aadan (Garyare)
Garyare20@hotmail.com
Garyare@msn.com
Garyare20@yahoo.com
C/qaasim oo Libya
Wadahadallo kula leh Qadaafi. Kadib markii uu ka soo laabtay Shir
Madaxeedkii Mali.
Madaxwaynaha Dawladda Ku
Meel Gaarka ah ee Somalia, C/qaasim Salaad Xasan ayaa lagu soo waramayaa
inuu wadahadallo kula leeyahay Magaaladda Tripoli. Hogaamiyaha Libya. Col
Moamar Al-Qadaafi.
C/qaasim oo shalay gaaray
Tripoli ayaa kulan uu la yeeshay Hogaamiyaha Libya. Col Moamar Al-Qadaafi
waxa uu kala hadlay Arrimo ay ka mid yihiin Sii Xoojinta Xiriirka labada dal
ee dhinacyadda Ganacsiga iyo Diblomaasiyadda. Iyo Taabagalinta Shirka
Soomaaliga ee ka socda Kenya. Waxaana Xubno ka tirsan Wafdiga C/qaasim ay
sheegeen in kulankaasi ay labada hogaamiye iskula garteen in Libya ay door
muuqda ku yeelato Dib u heshiisiinta Soomaaliya. Isla markaana ay sidoo kale
Sii waddo Taageeradda dhaqaale ee ay siiso Dawladda Ku Meel Gaarka ah ee
Somalia,
Warar kale oo isla
Xubnaha Wafdiga TNG-da laga soo xigtay ayaa iyaguna sheegaya in C/qaasim uu
waydiistay Hogaamiyaha Libya inuu dalkiisa ku martiqaado qaar ka mida
Hogaamiyayaasha Miisaanka ku leh Somalia si ay heshiis ula galaan TNG-da.
Waxa uuna Qodobkaasi Qadaafi ku xiray in marka hore Shirka Kenya ay Natiijo
ka soo bixi wayso. Laakin waxa uu ku gacan sayray in iyada oo Soomaalida
googol loogu fidiyay Kenya inuu mid kale dhinac dhigo.
Dhawaan ayaa
Libya waxaa booqday Col C/laahi Yuusuf oo ka mida Hogaamiyayaasha Diidan
Jiritaanka TNG-da. Laakiin ma cadda sababta keentay in wax yar markii uu
Libya ka soo tagay Kornaylku in haddana lagu martiqaado dalkaasi C/qaasim
Salaad.
C/Lahi
Yusuf oo Booqday Liibiya, Jabuuti iyo UK
TNG-da oo sheegtay
inay xakamaynayso Baasaboorka Soomaaliya.
May
17: C/laahi Yuusuf oo saddex
maalmood lagu xayiray Airoprka Dubai baasaboorka Soomaaliga awgiis, Guji...
May 15:
C/qqasim oo ka ashtakoonaya mamnuucida
baasaboorka Soomaaliga ee Kenya iyo UAE..Guji
May 13:
Mar uu C/Qaasim Salaad Xasan ka hadlayay baasaboorka Soomaaliyeed ay
joojisay dowladda Imaaraadka Carabta waxa uu sheegay in warkaasi uu
yahay mid aan sal iyo raad toona lahayn..
Guji
MAY 12:
Xuseen Maxamed Bulaale oo ah Safiirka
u fadhiya DKMG Waddanka Imaaraaadka ayaa sheegay inaysan waxba ka
jirin in Baasaboorka Soomaaliya laga mamnuucay Imaaraadka...
Guji..
MAY 11: Ra’iisul Wasaare Ku
Xigeenka DKMG Xuseen Saalax ayaa sheegay inay aad uga xun yihiin
Go’aanka ay Imaaraadka Carabtu ku mamnuucday Baasaboorka Soomaaliga... Guji..
MAY 10: Warar ayaa waxay
sheegayaan in dowladda Imaraadka Carabta ay fulineyso qoraal ay
dowladda KMG ah horey ugu dirtay ee ahaa in ay soo sameysanayso
Baasaboor, kaasoo la sheegay in ay bixin doonaan safaaradaha
Soomaaliya ku leedahay dalalka Jaamacadda Carabta.
Guji..
DGPL: Maya Baasaboorka Kenya
Puntland oo Mamnuucday Baasaboorka Kenya
Kenya oo mamnuucday in dalkeeda
lagu soo galo baasaboorka Soomaaliga
|
Dawladda Ku Meel Gaarka
ah ee Somalia, ayaa markii ugu horaysay sheegtay inay samaynayso Hanaan lagu
Xakamaynayo Baasaboorka Soomaaliga oo meelo badan oo Caalamka ah laga
mamnuucay.
Wasiirka Arrimaha Gudaha
ee Xukuumadda Ku Meel Gaarka ah, Axmad Gacal Caraboow ayaa Shir Jaraa’id oo
uu maanta ku qabtay Muqdisho waxa uu ku sheegay in Dawladdu ay diyaarinayso
Calaamado lagu dhajiyo Baasaboorka Soomaaliga ah si looga hortaggo in cid
walba ay iska qaadata Baasabooradda Soomaaliya. Wuxuuna sheegay in
Calaamadaasi ay soo diyaariyeen Khuburo Dhinaca Socdaalka ah. Isla markaana
ay adag tahay in la been abuuro.
Caraboow waxa uu sheegay
inay xiriiro la soo sameeyeen Dawladdo badan oo Caalamka ka tirsan isla
markaana ay waydiisteen in la xakameeyo Baasaboorka Soomaaliga ah. Wuxuuna
sheegay in iyaga oo maraya Shuruucda Caalamiga ah maadaama ay ka tirsan
yihiin Qaramadda Midoobay. Midowga Afrika. Jaamacadda Carabta iyo Ururo kale
oo Caalamiya ay dal kasta u gudbin doonaan Astaanta ay ku dhajinayaan
Baasaboorka Soomaaliya si loo joojiyo Dadka ku safra Dukumintiyadda Been
abuurka ah ee Soomaaliya.
Baasaboorka Soomaaliya
ayaa waxa uu ahaa baylah tan iyo markii ay bur burtay Dawladii dhexe ee
Somalia. Waxaana Baasaboorka Soomaaliya laga bixiyaa Suuqa Cabdalla Shideeye
ee Bakaaraha oo buuxiyay Shaqooyinkii ay qaban jirtay Laantii Socdaalka ee
Somalia. Iyadoo taasina ay fursad u siisay in cid kasta ay qaadato
Baasaboorka Soomaaliya.
Guddoomiyaha Gobalka
Shabeeladda Hoose. Shiiq Yuusuf Maxamed Siyaad Indhacade ayaa ku eedeeyay
Hay’adaha Samafalka ee ka hawl galla Soomaaliya inay iyagu sabab u yihiin
Dhibaatadda ka jirta Somalia.
Indhacade oo ay soo
xiganaysay Jariirad Maalinle ah oo ka soo baxda Muqdisho ayaa sheegay
inaysan Hay’adahu u joogin Somalia hawlo samafal. Balse waxa uu sheegay inay
faraha galeen Arrimo Siyaasadeed oo ka baxsan Hawlaha Bini’aadanimo ee ay u
yimaadeen. Wuxuuna sheegay in Dhaqaalaha loogu talagalay Somalia ay ku
bixiyaan Hay’adaha Samafalku Hurinta Colaada Sokeeye ee aafaysay Soomaalida
14 ka sanno Dawlad La’aanta ah.
Indhacadde waxa uu sidoo
kale sheegay inay Hay’aduhu arrimo Siyaasadeed uga shaqeeyaan Gobalo aysan
nabadi ka jirin. Isla marakaana ay iska indha taraan Nabadda ka jirta
Gobalka Shabeeladda Hoose. Wuxuuna sheegay inay fureen Garoonkii Diyaaradaha
ee Ceel Axmed oo ku yaala Duleedka Marka sidaas darteedna uu la yaaban yahay
sababta ay Garoonka Ceel Axmed u imaan la yihiin Diyaaradaha Samafalka oo
sheegtay inay Diinsoor Nabadgalyo xummo uga carareen.
Ma ahan markii ugu
horaysay ee eedayn loo jeediyo Hay’adaha Samfalka. Horay ayaa Madaxwayanaha
Dawladda Ku Meel Gaarka ah ee Somalia, C/qaasim Salaad Xasan waxa uu eedayn
kulul u jeediyay Hay’adaha Samafalka oo uu sheegay inay ku takrifalaan
dhaqaalaha Somalia ay Beesha Caalamku ugu tala gashay. Wuxuuna C/qaasim ku
hanjabay inay ka mamnuuci doonaan Hay’adaha Somalia. Haddii aysan wax qabad
dhab ah la imaan.
Somali Land oo maanta
laga xusayo Sannadguuradii 13 aad ee ka soo wareegtay markii ay ku
dhawaaqeen inay Soomaaliya inteeda kale ka go’een.
Munaasibad si heer sare
ah loo soo agaasimay oo lagu maamuusayo Sannad Guuradii 13 aad ee ka soo
wareegtay markii ay Somali Land ku dhawaaqday inay ka go’day Soomaaliya
inteeda kale ayaa ka soconaysa Fagaaraha Khayriyadda ee Magaaladda
Hargaysa.
Dadwayne aad u farabadan
ayaa isugu soo baxay Fagaaraha Wayn ee Khayriyadda. Waxaana ay dadkaasi
lulayaan Calanka Somali Land iyo Boorar ay ku qoran yihiin Halku dhigyo ay
ku taageerayaan Kala go’a Somalia. Iyadoo qaarkood ay ku dhawaaqayeen Erayo
ay ka mid ahaayeen Soomaaliya lama Midoobi Karno. Iyo gorgortan ka galin
mayno Madaxbanaanideena aan halganka dheer u soo galnay.
Kooxaha Bambooyda ayaa
iyaguna fagaarahaasi ka tumaya Astaamaha gooni isu taaga Somali Land.
Waxaana sidoo kale iyaguna Munaasibadaasi door muuqda ka ciyaaraya Kooxaha
Fanka oo illaa iyo Saaka Waabarigii ku cel celinayay Heesta Caanka ah ee
Somali Land waa Dalkayga. Somali Land Waa Dadkayga. Iyado Dadwaynaha
Fagaarahaasi tubana ay gadaal ka wada jiibinayaan Heestan oo la hanaqaaday
gooni isu taaga aan la Ictiraafin ee Somali Land.
Somali Land ayaa 13 sanno
kadib markii ay ku dhawaaqday inay ka go’day Soomaaliya inteeda kale waxay
Maanta ku dabaal dagaysaa iyadoo aan wali Aqoonsi ka helin Beesha Caalamka
isla markaana aysan muuqan ifafaale muujin kara in Somali Land loo aqoonsado
dal ka madax banaan Soomaaliya inteeda kale.
Daahir Riyaale oo
maanta Fagaaraha Khayriyadda ka jeediyay Khudbad ku aadan 13 guuradii ka soo
wareegtay markii Somali Land ay sheegtay inay ka go’day Soomaaliya inteeda
kale.
Madaxwaynaha Maamulka la
Magac Baxay Somali Land. Daahir Riyaale Kaahin ayaa sheegay inaysan marnaba
wax xiriir ah la samayn doonin Kooxaha Koonfurta Soomaaliya ee ku shirsan
Dalka Kenya.
Daahir Riyaale oo ka
hadlayay Maanta Fagaaraha Khayriyadda oo ay isugu soo baxeen Dadwayne
xusayay Sannadguuradii 13 aad ee ka soo wareegtay markii ay Somali Land
sheegatay inay ka go’day Soomaliya inteeda kale ayaa sheegay inuusan isagu
aaminsanayn in wax xiriir ah lala sameeyo Kooxaha Koonfurta Soomaaliya oo uu
sheegay inay iyagu dhexdooda heshiin waayeen. Wuxuuna sheegay in Somali Land
aysan waxba ka qusayn Shirka Soomaalida uga socda Kenya.
Riyaale waxa uu sheegay
in Somali Land Mudadii ay jirtay ay soo baxeen Cadaw Farabadan oo Qatar ku
ah sida uu sheegay Qaranimadda Somali Land. Wuxuuna sheegay in cadawgaasi ay
ka gaysteen weeraro dhawr ah oo Argagixiso Deegaanadda Somali Land. Laakiin
waxa uu ka gaabsaday inuu sheego cidda uu arko Cadowga Somali Land.
Riyaale waxa uu Sheegay
in Socdaaladii uu ku tagay Dalal ka mida Yurub ay Tusaale wacan u yihiin
Dadaaladda ay Somali Land ku raadinayso Aqoonsi Caalamiya. Wuxuuna
waydiistay Beesha Caalamka inay u aqoonsadaan Somali Land oo sida uu sheegay
Xornimadeedii kala soo laabatay Soomaaliya inteeda kale.
Riyaale waxa uu dhinaca
kale wax lala yaabo ku tilmaamay in Somali Land loo diido Shirarka Caalamiga
ah iyo Kuwo Heerka gobal ah. Taas badalkeedana loo oggolaaday sida uu
sheegay C/qaasim oo xittaa aan xukumin Xaafad ka mida Muqdisho. Wuxuuna
Midowga Afrika. Iyo Jaamacadda Carabta ku eedeeyay inay si gaar ah u buun
buuniyaan Mansabka Siyaasadeed ee uu sheegto C/qaasim oo uu ku tilmaamay
Hogaamiye aan cidna xukumin.
Riyaale waxa uu sidoo
kale sheegay in Doorashooyinka Baarlamaanka ay ka billaaban Doonaan Somali
Land Bisha March ee Sannadka 2005-ta. Wuxuuna dhinaca kale sheegay inuu wax
ka qabanayo Adeegyadda Bulshadda ee ay ka midka yihiin Korontadda, Biyaha,
Caafimaadka iyo adeegyadda kale ee Lagama maarmaanka ah.
Intii uu socday
Dibadbaxayaasi Laakiin uu Goobta Banaanbaxa ka tagay Riyaale ayaa waxaa ka
dhinac furmay Banaanbixiii waynaa ee Khayriyadda mid kale oo looga soo
horjeedo Dawladda Daahir Riyaale. Waxaana koox dhalinyaro ah oo socod ka
billaabay Fagaaraha Khayriyadda ay dalbanayeen inuu Riyaale Xukunka isaga
dago. Laakiin markii ay dhalinyaradaasi tageen Madaxtooyadda iyaga oo ku
dhawaaqaya Dooni Mayno Riyaale ayaa waxaa rasaas ku kala cayriyay Illaaladda
Madaxtooyadda Somali Land. Waxaana warar goor dhawayd na soo gaaray
sheegayaan inay ku dhaawacmeen 3 qof halka wararka qaarna ay Tiradda dadka
dhaawacmay ka badinayaan intaasi.
Dabaylihii Maansoonka
oo ka billawday Xeebaha Koonfurta Soomaaliya. Iyadoo aysan Doomaha iyo
Maraakiibta yar yar ku soo xiran Karin Dekadaha Macmalka ah ee Koonfurta
Soomaaliya.
Xilliga Bad Xiranka ayaa
la xaqiijiyay inuu ka billawday Xeebaha Somalia. Iyadoo Doomaha Yar yarna
aysan Isticmaali Karin Badwaynta Hindiya ee ku dherersan Somalia.
Kabtan C/qaadir Maxamed
Cabdi oo ah Badmareen Soomaaliyeed ayaa sheegay inay shalay billawdeen
Dabaylaha Maansuunta ee Koonfur Galbeed Somalia. Wuxuuna sheegay Kabtanku
inaysan Badwaynta India isticmaali Karin Doomaha iyo Maraakiibta yar yarka
ah ee Badeecooyinka Soomaaliya uga keena Imaaraadka iyo Kenya. Iyadoo uu
sheegay in Dekaddaha Macmalka ah ee Koonfurta Soomaaliya ay ku soo xiran
karaan oo kaliya Maraakiibta waawayn oo laf ahaantooda ay Qatar soo wajihi
karto.
Kabtan C/qaadir waxa uu
sheegay in Xawaaraha Dabaysha Maansuuntu ay jarayaan Saacadiiba 8 Nut oo u
dhiganta sida uu sheegay 16 Kiiloo Mitir. Wuxuuna sheegay in Xawaaraha
Dabayshu ay Qatar ku noqon karto Maraakiibta Waawayn ee Imaanaya Somalia.
Iyadoo xillga Bad xirankuna uu socon doono illaa iyo Bisha September ee
Sannadkan.
Xilliga Bad Xiranka ayaa
Somalia marka uu ka billawdo waxaa kor u kaca Ascaarta Badeecooyinkii
Soomaaliya uga imaan jiray DIbadaha. Iyadoo ay Maciishadda iyo wax walba oo
aadanuhu u baahan yahay ay sare u kacaan Xilligan oo kale. Mana jirto Hay’ad
Qaran oo ka sii taxadarta inay wax ka qabato Xilliga Badxiranka.
Qaar ka mida
Hay’adaha Samafalka ee ka hawl gala Koonfurta Soomaaliya ayaa sheegay inay
dib u billaabayaan Duulimaadyadii ay Diyaaradahoodu ku tagi jireen Gobaladda
Koonfurta Soomaaliya.
Madaxa Hay’adda MSF ee
Soomaaliya. Mr David Querol oo ka hadlayay Nairobi ayaa sheegay inay isla
garteen inay sii wadaan Hawlahii Samafalka ee ay ka hayeen Soomaaliya. Kadib
markii ay damaanad qaad Buuxa oo ammaankooda ah ka heleen Maamuladda ka jira
Gobaladda Koonfurta Soomaaliya. Wuxuuna sheegay in Afar Shaqaalahooda
Ajanabiga ah oo ay kala soo baxeen Koonfurta Soomaaliya ay dib ugu
celinayaan Goobihii ay ka shaqaynayeen.
Querol waxa uu qiray inay
jirto Qatar Dhinaca Ammaanka ah. Wuxuuna sheegay in Miinadii laga helay
Garoonka Diyaaradaha ee Diinsoor la xaqiijiyay inay ahayd nooc ka mida
Miinooyinka laga haga goobaha fog fog ee ay isticmaalaan Kooxaha
Argagixisadda ah. Isla markaana la dhigay Garoonka Labo Maalmood ka hor
intii aan la arkin. Laakiin Waxa uu sheegay in Haddii Maamuladda ka jirta
Koonfurta Soomaaliya ay taxadar dheeriya muujinayaan ay taasi keenayso inay
yaraato Walwalka dhinaca Ammaanka ah ee ay qabaan.
MSF ayaa noqotay hay’adii
ugu horaysay ee ku dhawaaqda inay dib u billaabayso Hawlihii ay ka haysay
Somalia. Laakiin Hay’adaha kale ee Midowga Yurub iyo Qaramadda Midoobay
ayaan iyagu illaa iyo hadda ku dhawaaqin inay ka laabteen Go’aankoodii hore
iyo in kale.
Dawlada Kenya oo
baabi’isay Kiiska Dilkii Xildhibaan Ibraahim Xuubcaaro.
Mid ka mida Dadkii loo
xiray Dilkii Nairobi loogu gaystay Xildhibaan
Shiiq Ibraahim Cabdulle Xuub
Caaro oo ka tirsanaa Baarlamaanka Somalia ayaa Xabsiga laga sii daayay.
Iyadoo aan wax Maxkamad ah la soo taagin.
Aadan Keynaan oo ah
Mudane ka tirsan Baarlamaanka Kenya isla markaana laga soo doorto Gobalka
Waqooyi Barre ayaa marar dhawr ah oo la soo taagay Maxkamadda Sare ee Kenya
waxaa dib loo dhigay Dacwadii loo haystay. Waxaana imminka sii dayntiisu ay
timid iyadoo aan Keynaan lagu soo oogin Dacwadda loo haysto. Isla markaana
aysan Maxkamadi xukumin sii dayntiisa.
Shiiq Ibraahim oo ahaa
Mudane ka tirsan Baarlamaanka Ku Meel Gaarka ah ee Somalia ayaa waxaa
sannadkii hore lagu dilay Magaaladda Nairobi xilli uu gaari yar watay.
Waxaana dilkiisa loo xiray dhawr qof oo uu ku jiro Keynaan oo ay dano
ganacsi ka dhaxeeyeen Shiiq Ibraahim. Iyadoo marki ugu dambaysay ee
Maxkamadda la horkeeno Keynaana la soo hor istaajiyay Maxkamadda Horteeda
dad Marqaatiyaal oo cadaynaya ku lug lahaanshaha Kenyaan ee dilkaasi.
Waxaana Sidoo kale Maxkamadda la soo hordhigay Dukumintiyo laga soo helay
Guriga Keynaan oo muujinaya ku lug lahaanshaha Mu’amaradaasi.
Marxuum Shiiq Ibraahim
Xuub Caaro waxa uu ka mid ahaa Ergadda Soomaalida ah ee ka qayb galaysay
Shirka Kenya. Waxa uuna ka mid ahaa tiro ergo ah oo la dilay intii uu socday
Shirka Kenya. Iyadoo Dawladda Shirkaasi marti galinaysana aysan wax ahmiyad
ah siin inay soo qabato Dambiilayaasha Dilalkaasi gaystay.
Karbala oo wali ay ka
socdaan dagaalo Qaraar.
Magaaladda Karbala ee
Dalka Ciraaq ayaa lagu soo waramayaa inay Maalintii Afaraad ka socdaan
dagaalo Qaraar.
Dagaalkan oo la isku
adeegsday Hubka noocyadiisa kala duwan ayaa u dhaxeeya Ciidamadda Maraykanka
iyo Ciidamo Taageersan Wadaadka Shiicadda ah ee Muqtada Sadr. Waxaana
dhinaca Ciidamadda Mahdiga ee Shiicadda dagaalkaasi uga dhintay 9 Askarta
daacadda ah Sadri ka mida.
Ma jiraan illaa iyo hadda
faah faahin uu Maraykanku ka bixiyay Khasaaraha dagaalkaasi ka soo gaaray.
Laakiin wariyayaasha la socda Ciidamadda Maraykanka ayaaa soo sheegaya inay
arkeen Dhawr askari oo dhaawac ah isla markaana laga qaadayo goobta
dagaalka.
Xaafadda Sadr ee Baghdaad
ayaa iyadana lagu soo waramayaa inay wali iskaga soo horjeedaan
Maleeshiyooyinka Shiicadda ah iyo Ciidamadda Maraykanka. Waxaana heshiis
qabyo ah ay labada dhinac ku gaareen in Maraykanka la siiyo Waddo uu uga
baxo Xaafadaasi.
Ammaanka Dalka Ciraaq
ayaa faraha ka sii baxaya. Waxaana isi soo taraya Iska hor imaadyadda u
dhaxeeya Shacabka CIraaq iyo Quwadaha Xooga ku qabsaday.
Hogaamiyayaal ka Biyo Diidsan Shirka Kenya
Faarax Wehliye Cadoow Sendiko oo ka
mida Hogaamiyayaasha Siyaasadda ku soo biiray intii uu socday Shirka Kenya
ayaa
Guji
18/5
W/Q.Abdi Wali Ibraahim
Aadan (Garyare)
Garyare20@hotmail.com
Garyare@msn.com
Garyare20@yahoo.com
Faafin: SomaliTalk May 18, 2003
WARGEYSYADA CAALAMKU WAXYAABIHII AY KA QOREEN
SOOMAALIYA
<><>....
Copyright
& Islaamku wuxuu ka qabo.... Akhri
Kulaabo bogga hore ee www.somalitalk.com
|