Waxaa maalintii Jimcihii ahayd ee aynu soo dhaafnay magaallada Zurich-Switzerland ee ah xarunta xiriirka Kubadda Cagta Adduunka ee marka magiciisa la soo gaabiyo loo yaqaanno (FIFA) lagu soo dhoweeyey wafdi uu hoggaaminayo Salaad Macallin Max’ed (Salaad Gaab),  oo ah gudoomiyaha xiriirka soomaaliyeed ee kubadda cagta Siciid Nuur Mugambe (ku xigeenkiisa) iyo Xoghayaha Guud ee Kubadda Cagta C/qani Siciid Carab, waxaana halkaasi ay kula kulmeen Guddoomiyaha Xiriirka Kubadda Cagta Adduunka Joseph Sepp Blatter, Xoghayaha Guud ee FIFA Dr. Urs Linsi iyo ku xigeenka Xoghayaha Guud Jerome Champagne, waxaana halkaasi lagu guddoonsiiyey Salaad Macallin Maxamed (Salaad Gaab) Biladda Boqol guuradii ka soo wareegatay aas-aaskii Xiriirka Kubadda Cagta Adduunka ee FIFA. 

Salaad Gaab iyo Blatter oo wada haya calanka  FIFA

Isla xafladdaasi waxa ay FIFA ku dhawaaqday in laga billaabo 8/10/2004 uu Salaad Macallin Maxamed (Salaad Gaab) yahay Guddoomiyaha Xiriirka Kubadda Cagta Soomaaliyeed (Somali Football Federation SFF), waxaana sidoo kale FIFA ay ku dhawaaqday in Salaad Gaab lagu wareejin doono dhaqaalihii ka xayirnaa labada sanadood waddanka Soomaaliya ee loogu talo galay horumarinta iyo socodsiinta Kubadda Cagta Soomaaliyeed.