WARKII OO FAAHFAAHSAN:
32 XUBIN OO MIHIIM AH OO LAGA SAARAY XISBIGA SEPDF EE QOOMIYADA SIIDAMAHA:
32 xubnood oo ka tirsanaa xisbiga been-abuurka ah ee maamulka Itoobiya uu u
sameeyay qawmiyadda Sidama ee SEPDF, oo hoos yimaadda isbaheeysiga EPRDF, ayaa
seddexdii toddobad ee ina dhaafay si rasmi ah looga saaray xisbiga.
Dhamaan xubnahaasi waxaa lagu eedeeyay in ay gacansaar hoose la leeyihiin
Jabhadda Xoreynta Sidaamaha ee SLF. Sida wararka sheegayaan 18 ka mid ah
xubnahaasi ayaa ka tirsanaa golaha dhexe ee xisbiga SEPDF.
Dhinaca kale Dr Kasu Ilala oo ahaa guddoomiyaha xisbiga SEPDF ayaa xilkaas laga
qaaday, waxaana lagu beddalay Haile Mariam Dessalegn oo ah madaxweyne ku sheega
gobolka qowmiyadaha koonfureed.
MELES ZENEWI OO XILKII KA XAYUUBIYAY DAWLADA HOOSE EE ADIS ABABA::
War naga soo gaadhay wariyaheenaa Magaalada Addis Ababa ayaa sheegaya in Meles
Zenaawi casilay dhamaan dawaladdii hoose ee magaalada Addis Ababa iyo tii
Gobolkaba.
Arintan oo fajac ku noqotey maamulka dawladda hoose iyo kan Gobolkaba, waxaa la
sheegayaa inay dadka magaalada ku abuurtey walwal hor leh.
Warku wuxuu intaas ku darayaa in Melese Zenawi uu maamulka dawladda hoose ee
Addis Ababa u magacaabay xubin sare oo ka mid ah xisbiga TPLF, waxaana masuulka
lagu magacaabaa Arekebe Iqubay oo hadda ku magacaaban ku xigeenka Madaxweynaha
Gobolka Tigrea.
Dadka siyaasadda Meles khibradda u leh waxay falkan ku tilmaameen inuu yahay mid
uu ku doonayo inuu ku wiiqo dhamaan maamullada, isla markaana si toos ah u
faraha ugula jira maamulada degmooyinka, xaafadaha ama waxa ay ugu yeedhaan
maamulada KEBELE_YADA.
ITOOBIYA OO EEDAYSAY CIIDAMMADA QARAMADA MIDOOBAY EE KU SUGAN SOOHDINTA AYAGA
IYO ERITREA:
Itoobiya ayaa eedayn u soo jeedisay ciidamada Jimciyadda Quruumaha ka dhaxaysa
ee ku sugan soohdinta u dhaxaysa iyada iyo Eritrea.
Jamciyadda Quruumaha ka dhaxaysa ayaa hadda ka hor cabasho u gudbisay dawlada
Itoobiya, ka dib markii malleeshiyo ka mid ah ciidamadeedu ay tacshiirad ku
fureen Ciidamada Hindiya ee ka socda Jimciyadda Qurumaha ka dhexaysa ee ilaaliya
sooddinta u dhaxeysa Eritria iyo Itoobiya.
Haddaba Itoobiya ayaa ka carootey sababta qalalaasahaas ay dhigeen Ciidmaadeedu
loo gaarsiiyey warbaahinta, iyadoo tilmaantey in la bixiyey war sir ah.
Si kastaba ha ahaatee, Itoobiya in mudo ahba kuma faraxsaneyn Ciidamada
Jimciyada Qurumaha ka dhexaysa ee jooga soodintaas, tan iyo intii maxkamada
aduunku go’aamisay dhulka ay isku haystaan wadanka Eritrea, mana aha
markii ugu horeysay ee is af garan waa soo dhexgalo.
SOOMAALIDA QURBAHA IYO ARAGTIDA AY KA QABAAN SHIRKA ELDORET:
Wararka ka soo baxaya Jaraa'idyada Caalamka ee wadamada Soomalidu ku
badantahay, ayaa qorey fikradaha Soomalida ku nool wadamadaas ee ku aadan shirka
Eldoret ee dib u heshiisiinta Soomalida.
Dadka soomaaliyeed ee dalalkaas ku dhaqan waxay intooda badani ka
biyo-diidanyihiin shirka dib u heshiisiinta Soomaliya, waxaana la tilmaamayaa
inay ra'yigooda saladhig uga dhigayaan shirarkii hore ee la soo qabtey.
Dad badan oo soomaali ah ayaa rumaysan in hooggaamiye kooxeedyadu ayna isku
raacaynin in la dhiso dawlad Soomaaliyeed oo loo dhan yahay, waxaana sabab u ah
bay leeyihin in hooggaamiye kooxeedyadu ay horey heshiisyo badan u galeen,
haddana ay ka baxeen.
Dadka siyaasdda geeska Afrika ku xeel dheer ayaa iyaguna sheegaya in intay
Itoobiya ka muuqato miiska wada-xaajoodka aysan wax guul ah ka soo bixi doonin
shirka dib u-heshiisiinta.
Hibaaq Samatar.
Radio Xoriyo
radioxoriyo@aol.com
radioxoriyo@ogaden.com
Xusuus: Radio Xoriyo waxaad ka dhegaysan kartaa Mawjadda 19 MB ee dhererkeedu
yahay 15580 KHZ, Maalmaha Talaadada iyo Jimcaha 7: 30PM waqtiga
Afrikada Bari
Dhegeyso
warkan oo Cod ah
KAYDKA WARARKA
RADIO XORIYO - NEWS ARCHIVE
AFEEF: Afkaarta qoraalkaan waxaa leh gaarna ay u tahay Radio Xoriyo, kana tarjumimaayo aragtida SomaliTalk
