Wq. Ibraahim Maxameddeeq
SomaliTalk Nairobi
March 6, 2003
Iyadoo uu shirka dib u heshiisiinta
Soomaalida ee magaalada Nairobi ka socdaa beryahan ku jirey khilaafaad u
dhexeeyey gudiga farsamada IGAD iyo qaar ka mid ah madaxda siyaasadda
Soomaalida ayeey maanta qaar ka mid ah ergada dawladda ku meel gaadhka ahi si
toos ah ugu soo xeroodeen madasha loogu talo galay inuu shirka Soomaalidu ka
socdo tan iyo inta laga gaadhayo geba-gebada shirka. Ergada dawladda ku meel
gaadhka ah shirka uga qayb gelaysa ayaa tan iyo intii Eldoret shirka laga soo
raray ku gacan saydhay inay degaan melihii ay gudiga farsamadu u qoondeeyeen,
waxayna deganaayeen Hotel 680 oo badhtamaha magaalada Nairobi ku yaal.
Warar la isla dhex marayo oo aanan caddayn
adag u helin ayaa carrabaabaya inay iminka ergada TNG ku kala qaybsantay in ay
ku xeroodaan madasha shirka iyo in kale, laakiin mudane ka mid ah mudanayaasha
baarlamaanka DKG oo lagu magacaabo Daahir Xaaji Khaliif oo aan xarunta shirka
saaka kula kulmay ayaa ii sheegay inaysan kala qaybsanaantaasi jirin ee ay
wufuudda intooda kalena ilaa berri soo xeroon doonaan. Waxaa kaloo iyana jira
xildhibaano iyo wasiiro ka tirsan DKG ah oo saaka shir saxaafadeed ku qabtay
xarunta shirka, taas oo ay ku caddeeyeen inaysan ergada shirka ka maqan la
qabin figradda ay shirka kaga maqan yihiin.
Dhinaca kale gudiyadii khilaafaadka ayaa weli
ku guda jira shaqooyinkoodii, waxaana lagu wadaa inay bishan dhexdeeda soo
af-jaraan shaqooyinka ay ku hawlan yihiin si dabeeto loo guda galo wejigii
3aad ee shirka oo noqon doona talaabada ugu dambaysa ee shirka. Mbkathi oo ah
xarunta uu guddoomiyaha cusub ee gudiga farsamada IGAD u doortay inuu shirku
ka socdo ayaa ah madal aad u qurux badan oo ay wax ku bartaan ardayda doonaysa
inay bartaan xirfadaha ay jecel yihiin inay mustaqbalka ku shaqaystaan, waxay
leedahay hoolal waaweyn oo si casriya u qalabaysan oo aad uga wanaagsan
hoolalkii Eldoret, looguna talo galay in lagu qabto shirarka waaweyn, waxaa
kaloo ku yaalla hoteelo aad u heer sareeya, waxayna tahay goob ay jardiinooyin
dhir waaweyni hadhaysay camimeen. Ergooyinka ayaad arkaysaa iyagoo geedaha
hooska waaweyn dhex runduda oo sheekooyin kala gaar gaar ah si isku lid ah u
haysta. Halkan su’aasha uu wax garadka Soomaaliyeed is weeydiinayaana waxay
tahay: “Muxuu shirka ay IGAD hogaanka u haysaa ku dhamaan doonaa?.
Waxaa isku soo dubaridey
Ibraahim Maxameddeeq
SomaliTalk, Nairobi, Kenya
E-mail: imdeeq@hotmail.com
... ELDORET:
Taxanahii Wararka com
imdeeq@hotmail.com