Shalay oo Sabti ahayd saacadda markay ahayd 2:00 pm dadwaynaha Soomaaliyeed ee ku nool Minnesota ayagoo wata qalabkooda warbaahinta iyo marti sharf kaleba waxay isugu tageen masrax wayn oo ay leedahay Jaamacadda Augsberg. Waxaad moodaa in lagu aadiyay maalin Sabti ah oo dadka badankii aanay shaqaynin iskuuladana xiran yihiin. Soomaalida Minnesota ayaa u hamuuman inay siyaasadda gobolka iyo tan federalkaba door ka cayaaraan ka dib markay arkeen tirada inta codaynkarta, dadaalka ardada ugu jirto xagga waxbarasgada, waxgarad badan, ganacsi iska roon, iyo muruq maal badan.

Waxaa ka yaabiyay labadii murashaxba tirada Soomaalida soo xaadirtay iyo firfircoonida ka muuqato iyo quruxda shirka loo soo abaabulay. Wuxuu noqday shir Minnesota ka dhaca kii ugu heer sareeyay sababta dhalisay ayaa la isku raacay inay ahayd wada shaqayn xoog leh oo dhexmartay xubnaha Soomaalida Minnesota. “Ilayn Soomaali hadday isku duubato oo ismaqasho waxkasta waa qabsan karaan” hadalladan waxay ka mid ahaayeen hadal uu yiri oday Soomaaliyeed oo ka yaabay ismaqalka Soomaalida.

Wuxuu shirka ku bilowday marqaatiyaal la horkeenay murashaxiinta kuwaas oo caddeeyay dhibta Soomaalida ka haysata, guryaha, waxbarshada ardada, shaqooyinka iyo tarxiilka waaxda socdaalka. Waxaa ku xigay afar afar su’aalood oo lagu amaray murashaxiinta inay HAA ama MAYA keliya uga jawaabaan ayaguna sida lagu amray ayay yeeleen. Ka dibna murashax kasta 10 daqiiqo ayaa loo qabtaykiiba inuu hadlo, waxaa xusid mudan sida shirka Soomaalida u maamulaysay oo ay ka muuqatay awood. Waxaa meesha ka hadalay odayaal iyo waxgarad Soomaaliyeed oo dadka ku booryay in America gurigoodii noqotay oo ay hadda qasab noqotay in ay awood yeeshaan oo siyaasadda Minnesota saamayn ku yeeshaan.

Labada murashaxba si ay dadka u soo jiitaan waxay isku dayeen inay af soomaali ku hadlaan, haddaan soo qaato hadaladii murashaxiinta

Waa sidan:

Senator Paul Wellstone oo muddo 12 sano soo ahaa Senator Dimoqraadi ah ayaa afartii su’aaloodba kaga jawaabay HAA oo dadkiina ka qoslisiiyay asagoo sheegay inuu ku faraxsan yahay in Soomalida Minnesota awood yeelato, waxaa kale oo senatorka sheegay inuusan marna la safanayn maal qabeenada ee uu la safan yahay dan yarta.

Norm Coleman oo ah Republican ahna ninka la tartamaya Sematorka horena u ahaan jiray Duqa magaalada St. Paul oo lagu qadariyo sida uu usoo dhisay magaaladaaas oo ahayd mid sii dhimanaysay haddana ah magaalo ifaysa isla markaana ah saaxiibka madaxwayne Bush ayaa isgana isticmaalay kalmadaha Assalaamu calaykum iyo mahadsanidiin. Su’aalihiina shaqada, guryaha, waxbarshada wuu ballan qaaday laakiin waaxda socdaalka iyo tarxiilka soomaalida ayuu ka cudurdaartay oo wuxuu yiri hadda waxba kama aqaan waadna ogtihiin september 11 wixii dhacay waan idinla shaqaynayaa oo waan jeclahay difaac xuquuqda bani aadamka ee waqti i siiya oo aan ku soo ogaado waxa jira. Jawaabtaas dadka qaar kuma qancin, laakiin qaar ayaa yiri waa ka daacad san yahay kan kale diidmana kama aha.

Coleman oo ah nin ka soo horjeeda ilma iska soo tuurka jecelna qoysaska dhisan ayaa yiri “waan ogahay Soomaalida uma baahna cayr oo waa dad shaqo jecel ee laakiin waxay u baahan yihiin qof dhaqankooda haysta oo ilamaha u xanaaneeyo intay shaqada ku maqan yhiin.” Waxaa kale oo uu sheegay inuu ilmeeyay markii uu maqlay in Soomaalida ka maqan tahay goobaha talada iyo maamulka, ugu danbayntiina wuxuu Soomaalida uga digay inaysan dhagaysanin ballamaha badan ee siyaasiyiintu ballan qaadaan. Labada murashaxba waxay meesha ka tageen ayagoo faraxsan waayo Soomaalidu dhexdhexaadnimo ayay muujiyeen iyo inaysan qofna keligii gooni u taageerin hadda oo ay la shaqayn doonaan hadba kii soo baxa.

Minnesota waa meesha ugu Soomaali badan Maraykanka.

Qaabkii kulanku u dhacay oo faahfaahsan 

###

Ma haboon tahay Soomaalida ku nool maraykanka inay ka qayb qaadato bannaanbax looga soo horjeedo madaxwayne Bush iyo siyaasadiisa dibadda Ka akhri halkan  

Maxamuud Wardheere

mwardere@oakwood.com 

Oct 20, 2002

com