Tarjumadii Ibraahim Saalax |  SomaliTalk Yurub | ibra88@hotmail.com | March 22, 2003

TIXRAAC: 

• http://aljazeera.net/news/arabic/2003/3/3-22-13.htm 
• http://news.independent.co.uk/world/middle_east/story.jsp?story=389497 

Daawo Warkaan oo Video ah [Al Jazeera TV]

Diyaaradaha dagaalka ee USA, Sawirka IOL

Ugu yaraan 50 qof oo ciraaqiyiin ah uuna ku jiro nin u dhashay dalka Ruushka ayaa ku dhintay weeraradii qallafsanaa ee ciidamada Mareekanka ay xaleey la beegsadeen magaallada Basra ee ku taalla koonfurta Ciraaq. Sidaas waxaa shaaca ka qaaday weriyaha taleefishinka Aljazeera u jooga Basra.

Weriyaha ayaa intaas raaciyay inuu dhimashadan helay kadib markii uu booqday cusbitaalka ku yaalla Basra, halka dadkii dhaawaca ahaa uu ku qiyaasay wax ka badan 100 qof. 50-ka qof ee weerarada ku dhintay ayaa 4 ka mid ah ay ka soo jeedeen hal qoys oo uu mid ka mid ah yahay cunug yar oo da’diisu tahay 2 jir.

Dhinaca kale waxaa soo shaac baxaya wararka sheegaya inay ciidamada Mareekanka iyo xulafadiisuba ay gacanta ku dhigeen magaalooyinka ay ka mid yihiin Umm Qasr, Naasiriyah, Faaw, Umm shuyuukh iyo kuwa kale, halka ciidamada Ciraaq ay si xoog leh u beeninayaan. “Umm Qasr, Faaw, Naasiriyah iyo Umm Sheekh waxaa weli ka socda dagaal aad u qaraar, jab weyna wuu ka soo gaaray safafka cadoowga, halka qaar kalena ay dib u gurteen” ayuu yiri Maxammed Saciid Saxaaf oo ah wasiirka warfaafinta Ciraaq.

Ilma yar oo ku dhaawacmay dagaalka Ciraaq, Sawirka IOL

Daqiiqad kasta gantaal ayaa ku habsanayay Baghdad:

 Dhinaca kale, gantaallihii lagu soo ganayay magaallada Baghdad ayaa daqiiqaddiiba mar soo dhacayay, gantaalladaasoo aan horey loo arag. Sidaas waxaa si kooban u yiri weriyaha wargayska Independent Ropert Fisk ee hadda jooga Ciraaq. Laga soo billaabo jumcadii waxaa magaallada Baghdad lagu riday wax ka badan 320 gantaal.

Fisk ayaa ku sheegay maqaal ay maanta wargayska Independent ku daabacday hadalkan “waxaan arkayay daarihii uu lahaa Saddaam ee ka koobnaa 20-ka dabaq oo burburay, waxaan maqlayay sawaxankii qaraxyada oo saameeyay maqalkaygii muddo saacad ah”

Ropert Fisk ayaa ku tilmaamay inay weeraradii xaleey lagu qaaday Baghdad ay ahaayeen mid aad u weyn 20-kii sanno ee ugu danbeeyay, wuxuuna intaa raaciyay in qaraxyadii Mareekanka iyo Ingiriiska ay qaadeen uu dhammaan magaallada si weyn u gilgilayay. “waxaan maqalnay cod aad u weyn oo sababay in muraayadihii guryaha ay burburaan , daqiiqad kadib waxaan aragnay gantaalladii waaweynaa oo duqeynaya caasimadda” ayuu yiri weriyaha Independent, wuxuuna markale yiri isagoo wata hadalkiisa “ciraaqiyiintii ayaa dhinacayga soo istaagay iyagoo doonaya inay daawadaan qaraxyada, dhimbilaha dabka waxay ka kacayeen guriga madaxtooyada Ciraaq, waxayna ku jeedeen xagga cirka”.

Weerarada ka socda Ciraaq oo ay hoggaaminayaan ciidamada Mareekanka iyo Britain ayaa billawday subaxnimadii khamiistii la soo dhaafay.

Dagaalka Ciraaq lagu qaadayo oo sababay maslaxado badan oo ciidamada isbahaysiga ay ka leeyihiin gobolka, ayaa waxaa hubaal ah inay ka dhalan doonaan khasaare insaaniyadeed iyo kuwo kale, taasoo tusaale looga qaadan karo khasaarihii uu dhaliyay dagaalkii gacanka ee 1991-kii.

Wararka Ugu Dambeeyey ee Daalka Ciraaq

<><><>

QORAALADII HORE EE IBRAAHMI SAALAX: http://www.somaliatalk.com/ibraahim/ 

<><><>

»»VIDEO: Mucjisooyinka Quraanka... [English]