Ra'iisal Wasaaraha iyo wafdi uu hogaaminayo oo si weyn loogu soo dhoweeyey
Garbahaarey
Garbahareey, March 31.2013-------Ra'iisal Wasaaraha Xukuumada Federaalka
Soomaaliya Mudane Cabdi Faarax Shirdoon Saacid iyo wafdi ballaaran oo uu
hogaaminayo ayna ka mid yihiin Wasiirada Arrimaha Gudaha iyo Gaashaandhiga,
xildhibaano iyo saraakiil kale ayaa maanta si weyn loogu soo dhoweeyey magaalada
Garbahaarey ee xarunta gobolka Gedo.
 Wafdiga ayaa waxaa garoonka ku soo dhoweeyey boqolaal dadweyne ah kuwaasoo sitay
sawirada Ra'iisal Wasaaraha, waxayna ku qeylinayeen soo dhowaada Jaallayaal,
iyaga oo lulalayay caleemo qoyan.
Ra'iisal Wasaaraha ayaa markii uu gaaray magaalada Garbahaarey waxa uu
durbadiiba guda galay kulamo uu la qaadanayo maamulka gobolka, odayaasha
dhaqanka iyo qeybaha kale ee bulshada si uu ugu kuurgalo xaaladda dhabta ah ee
degaanadan.
Odayaasha dhaqanka magaalada ayaa Xukuumada ka codsaday in laga garab siiyo
dhanka amniga, gaara ahaana sidii looga sifeyn lahaa kooxaha nabadiidka ah
degaanada gobolka Gedo ee weli gacantooda ku jira. sidoo kale odayaasha ayaa
Ra'iisal Wasaaraha u cadeeyay in aysan wax lug ah ku laheyn shirka Kismaayo ka
socda, cid reer Gedo ahna aaney ka qeybgalin.
Odayaasha ayaa sidoo kale, Ra'iisal Wasaaraha iyo wafdigiisa u xaqiijiyay inay
diyaar la yihiin inay ku wareejiyaan hantidii dawladda iyo xarumihii ay dawladdu
laheyd, si loogu adeego bulshada.
Dhanka kale, Ra'iisal Wasaaraha iyo xubno ka tirsan wafdigiisa ayaa galabta soo
booqday qabriga madaxweynihii hore ee Jamhuuriyadda Soomaaliya Marxuum Maxamed
Siyaad Barre, waxayna halkaasi ku dul aqriyeen Iqlaas, iyaga oo u duceeyey.
Ugu dambeyntiina, Ra'iisal Wasaare Saacid ayaa ducada kadib, alle uga baryay
inuu u dambi dhaafo "Wixii uu qabtay runtii waa wax muuqda, illaaheyna dembi
dhaaf ayaan uga baryeynaa" ayuu yiri.
............
Ra’iisul Wasaaraha Ayaa Booqday Gobolka Shabeelada Dhexe Kulamana La Qaatay
Bulshada Qabaheeda Kala Duwan. Muqdisho, 30, Mar, 2013….Ra’iisul Wasaaraha Xukuumadda Federaalka Soomaaliya
Mudane Cabdi Faarax Shirdoon (Saacid) iyo wafti uu hogaaminayo oo ay ka mid
ahaayeen Wasiirka Arrimaha Gudaha Cabdikariin Xuseen Guuleed, Wasiirka
Gaashaandhiga Cabdixakiin Fiqi, Wasiiro ku xigeeno, Xilidhibaano iyo Siyaasiyiin
ayaa maanta booqasho ku tagay gobolka Shabeelada Dhexe, iyadoona loo sameeyey
soo dhaweyn aad u balaaran. Safarka Ra’iisul Wasaaraha ayaa wuxuu qayb ka ahaa safaradii uu ugu kuur galayey
xaaladaha ka jira gobolada dalka oo uu dhawaanahaan booqanayey, si u ogaado
nolasha dadka ee dhanka dhaqaalaha iyo amniga. Ugu horayntii Ra’iisul Wasaaraha iyo waftigiisa ayaa kulan xog waraysi ah la
yeeshay odayaasha dhaqanka oo aad uga waramay dhibaatooyinka ka jira gobolka,
waxayna ka codsadeen dawladda inay wax ka qabato sidii gobolka meelaha dhiman
looga xorayn lahaa kooxaha nabad diidka ah, in dawladdu xooga saarto sidii loo
dhisi lahaa jidka isku xira Muqdisho iyo Jowhar oo uu ka muuqdo bur bur lixaad
leh iyo in maamul ay dadku soo doorteen loo sameeyo gobolka marka la xoreeyo
degmooyinka dhiman. Gudoomiyaha Gobolka Shabeelada Dhexe Mudane Cabdi Jiinow Calasow ayaa ka
warbixiye xaalada gobolka ee dhanka nabad galayada iyo baahiyaha kala duwan ee
ay qabaan dadku.
 “Mudane Ra’iisul Wasaare waxaa gobolka la xoreeyey 09, Dec, 2012 mana jiro ilaa
iyo hada wax ciidan boolis ah oo ka howl gala gobolka, waxaana hada amniga suga
ciidanka xooga, waana lama huraan in la helo ciidan nabad sugid iyo boolis isugu
jira, dawladu waa ay hilmaantay gobolka mana jiraan wax mucaawino ah oo soo
gaaray ilaa iyo intii laga xoreeyey nabad diidka” ayuu yiri Gudoomiyaha Gobolku
isagoona dhanka kale xusay in waqtigaan lagu jiro xili roobaadkii Gugga oo uu
wabigu sameeyo fatahaad, hadii aysan dawladdu ka qayb qaadan sidii looga hortagi
lahaa biyo baxdadaas ay keeni karto dhibaato soo gaarta isu socodka gaadiidka
iyo beeralayda. Sidoo kale Ra’iisul Wasaaraha ayaa qudbad dheer u jeediyey shacab aad u tiro
badan oo ka qayb qaadanayey soo dhaweynta waftiga, isagoona aad uga mahadceliyey
sida sharafta leh oo ay u soo dhaweeyeen, “Waxaan aad ugu farax sanahay sida wanaagsan oo aad noo soo dhaweyseen, iyo
ciyaaraha kala duwan oo aad soo bandhigteen sida Shiribka, Beereyda, Kabeebeyda,
iyo Dhaantada, Waxaana halkaan iiga muuqda sida reer jowhar diyaar ugu yihiin
dawladnimada, waxaana naga go’an inaad heshaan cadaalad, iyo sinaan taas oo ah
siyaasadda dawladda lagu dhisay, qaybaha kala duwan ee bulshada oo maanta ka
hadlay goobtaan waxay noo muujiyeen dareenkooda iyo dowlada jacaylkooda, taas
ayaan sabab u ah inaan booqanay gobolo badan oo ka tirsan dalka si aan u
qiimayno rabitaanka dadka” ayuu yiri Ra’iisul Wasaare Saacid Ra’iisul wasaaraha ayaa dhanka kale u sheegay dadka reer Jowhar in dawladdu wax
weyn kala qaban doonto soo jeedintooda oo ay ku sheegeen suugaanta. “Waxaan diyaar u nahay wax kasta oo ay dowladu idiin qaban karto in aan
dadajino, wixii aad ka tabateen maamulka hada jira oo caddaalad daro ah,
dawladdu si aan leex leexad lahayn ayeey wax uga qabanaysaa, maalintii la
xoreeyey gobolka ilaa maanta markasta dawladdu waxay u soo diraysay wafti la
socda xaalada gobolka” ayuu yiri Ra’iisul Wasaaruhu isagoona dhanka kale xusay
in gobolka shabeelada dhexe ay dawladdu dadaal u gali doonto sidii wax looga
qaban lahaa dhanka horumarka. Ugu danabayntii Ra’iisul Wasaaraha iyo waftigiisa ayaa casho sharaf loogu
sameeyey Warshadii Dharka ee Balcad oo noqotay warshada kaliya ee ka bad baaday
burburkii soo maray kaabayaasha dhaqaalaha ee dalka, wuxuuna Ra’iisul wasaaruhu
ku aamanay reer Balcad inay yihiin dada wadaniyiin ah dawladuna ay siin doonto
abaal gud
--
Garad Salad Hersi
Press officer
Mob.+25261-5536608
Garbaharey, Somalia
Faafin: SomaliTalk.com | March 31, 2013
| 
Daabaco
Boggan | Print
