Madaxda Dawladda Federaalka oo Cambaareeyey Qaraxii Muqdisho ka dhacay
Warsaxaafadeedyo ka soo baxay xafiisyada Shiikh Xasan, Shirdoon iyo Jawaari
ayaa si kulul u cambaareeyay qarixii ismiidaaminta ahaa ee ka dhacay wadada Maka
Al-Mukarama, ex-Fayora kuna dhagan xarunta Tiyaatarka ee degmada Xamerweyne.
Qaraxaan ayaa inta la xaqiijiyay waxaa ku dhintay 10 qof, ayna ku dhaawacmeen 15
qof. Waxaana DFS ay qaraxaas ku eedaysay in ay ka dambeeyaan Kooxda Al-shabaab.
Warsaxaafadeedyadaas hoos ka akhri:
Madaxweynaha oo aad u dhaleeceeyay qaraxii foosha xumaa ee maanta dhacay.
JS/XM/DOC/ 617/13
(Muqdisho,Soomaaliya, Maarso,17, 2013) Madaxweynaha Jamhuuriyadda Federaalka
Soomaaliya Mudane Xassan Sh Maxamuud ayaa si xoogan u dhaleeceyay qaraxii maanta
ka dhacay Magaaladda Muqdisho.
“
Waxaan tacsi u dirayaa dhamaan eheladda iyo asxaabtii ay ka geeriyoodeen
shacabkii maanta ku shahiiday qaraxii dhacay” saa waxaa yiri Madaxweynaha.
“Waxaan qiyaasi karnaa in ay qaraxan ka danbeeyaan Kooxda Al-Shabaab oo looga
guuleysanayo dagaalkii dhanka militariga ahaa. Sidaas daraadeed waxey waqtigooda
siiyeen in ay shacabka masaakiinta ah argagax geliyaan ayna si arxan darro ah u
laayaan. Waa in aan si wada-jir ah ugu hor-jeesano cadawga”
“Waan guuleysanay waana sii guuleysan doonaa, cadawgan aduunka hoy kuma laho,
sidaas darteedna waa in aan u diidnaa in Soomaaliyo uu hoy ku yeesho.”
“Mar kale Waxaan rabaa in aan u tacsiyeeyo shacabkii ku geeriyoday qaraxaas
foosha xun ee ku yimid muwadiniinta Soomaaliyeed.”
--
Communication Office
Office of the Somali President
Mogadishu, Somalia
Wixii Faah-faahin ah kala xiriir:Malik Abdalla Agaasimaha Warfaafinta, Villa
Soomaaliya, media@presidency.gov.so
Ref: XRW/OM/PR 0305/03/13 18, Mar, 2013
War Saxafadeed
Ra’iisul Wasaaraha oo cambaareeyay qarixii ismiidaaminta ee manta Ex-fiyoora
Isniin 18, Mar, 2013… Ra’iisul Wasaaraha Soomaaliya Cabdi Faarax Shirdoon Saacid
ayaa si kulul u cambaareeyey qaraxii maanta kooxaha nabad diidka ahi la
beegsadeed xarunta Ex-Fayora ee degmada Xamerweyne.
Qaraxaan ayaa inta la xaqiijiyay waxaa ku dhintay 10 qof ayadoo dad gaaraya 15
ay ku dhaawacmeen. Qaraxan ayaa ka dhacay wadada Maka Al-Mukarama gaar ahaan
ex-Fayora kuna dhagan xarunta Tiyaatarka Qaranka. Waxaa lala beegsaday
baabuurtii wadada maraysan ayadoo khasaraha ugu badana uu gaaray dad rayid ah oo
saarnaa bas rakaab ah oo marayay goobtaasi.
Ra’iisul Wasaaraha Soomaaliya ayaa sheegay in qaraxii maanta uu ahaa kii ugu
xumaa in mudaa isagoona ku tilmaamay xasuuq loo gaystay shacbi Soomaaliyeed oo
an waxba galbsan.
“Aad ayaan u cambaaraynaynaa falkaas gumaadka ah, waa wixii lagu yaqaaney kuwa
nabad diidka ah, ee gumaada shacbiga Soomaaliyeed. Waxaan u tacsiyaynayaa
dhamaan ummada Soomaaliyeed, anoo si gaar ah u tacsiyaynaya ehelada iyo
qaraabada intii ku dhimatay iyo qof kasta oo wax ka soo gaareen,” ayuu yiri
Ra’iisul Wasaaraha
Ugu dambayntii Ra’iisul Wasaaraha ayaa ugu baaqay ciidamada amniga inay habeen
iyo maalin u soo jeedaan siday shacabka uga difaaci lahaayeen dhagar
qabayaashaas.
---DHAMAAD---
Ahmed Adan
Madaxa Xafiiska Warbaahinta
Xafiiska Ra’iisal Wasaaraha
Email: media@opm.gov.so
Gudoomiyaha Baarlamaanka Oo Si Kulul U Cambaareeyey Qaraxii Bahalnimo Ee
Maanta, Tacsina U Diray Shacabkii Ku Geeriyooday….WARSAXAAFADEED
Gudoomiyaha Baarlamaanka Federaalka Soomaaliya Mudane Maxamed Sheekh Cismaan
Jawaari ayaa si kulul u cambaareeyey qaraxii bahalnimo ee ay maanta
Maleeshiyaadka argigixisada ah ku xasuuqeen dad shacab ah oo aan waxba galabsan
ayadoo dhanka kalena uu Gudoomiyaha tacsi tiiraanyo leh u diray ehellada dadkii
weerarkaasi foosha xun ku geeriyooday.
Gudoomiyaha Baarlamaanka ayaa yiri” INAA LILAAHI WA INAA ILEYHI RAAJICUUN,
runtii waxaan dareenka murugada iyo xanuunka leh la qeybsanayaa dadka
Soomaaliyeed ee maanta ay gacanta ka gardaran ku xasuuqday magaalada Muqdisho,
runtii waa fal cadawtooyo ah oo aad u xun”
Mudane Maxamed Cismaan Jawaari Gudoomiyaha Baarlamaanka Federaalka Soomaaliya
oo hadalkiisa sii wata ayaa markale yiri” waa fal aan diinta Islaamka raad ku
laheyn in dad muslimiin ah oo aan waxba galabsan lagu haligo qarax ayaga oo
danahooda raacanaya, dadkii shacabka ahaa ee maanta ay argigixisadu goobtaas ku
dileen ma aheyn kuwo siyaasad ama dhinac la safan, wuxuuna falkaasi cadeynayaa
cadaawadda ay argigixisadu u qabaan shacabka Soomaaliyeed oo ah iney nabadda iyo
hormarka u diidan yihiin.
Dhinaca kale Gudoomiyaha Baarlamaanka Federaalka Soomaaliya Mudane Maxamed
Sheekh Cismaan Jawaari ayaa tacsi tiiraanyo leh u diray ehellada dadkii shacabka
ahaa ee goobtaasi ku geeriyooday isaga oo Alle uga baryey dadkii goobtaasi ku
geeriyooday inuu naxariistiisa jano siiyo,eheladooda iyo qaraabadoodana uu samir
iyo iimaan kasiiyo.
Ugu dambeyntii Gudoomiyaha Baarlamaanka Federaalka Soomaaliya Mudane Maxamed
Sheekh Cismaan Jawaari ayaa ku booriyey shacabka Soomaaliyeed iney meel ugasoo
wada jeestaan cadawgooda islamarkaana aysan falalka argigixisada ah ka niyad
jebin hormarka ay hiigsanayaan.
-----DHAMAAD-----
Xafiiska Warfaafinta Gudoomiyaha Baarlamaanka
Gudoomiyaha Baarlamaanka Oo Ugu Hambalyeeyey Dhigiisa Dalka Jabuuti Guusha
Uu Ka Gaaray Doorashooyinka Baarlamaanka Dalkaasi…WARSAXAAFADEED
Gudoomiyaha Baarlamaanka Jamhuuriyadda Federaalka Soomaaliya Mudane Maxamed
Sheekh Cismaan Jawaari ayaa ugu hambalyeeyey dhigiisa Dalka Jabuuti Mudane
Idiris Arnaa’uud Cali guusha uu ka gaaray doorashooyinka Baarlamaanniga
Dalkaasi.
Mudane Maxamed Cismaan Jawaari Gudoomiyaha Baarlamaanka Dalka ayaa ugu horeyn
yiri”waxaan rabaa ugu horeyn inaan halkaan ku muujiyo dareenkeyga ku aadan
walaalkeeyga Idiris Arnaa’uud Cali oo mar labaad dib loogu doortay inuu noqdo
hogaamiyaha Golaha Xildhibaannada Qaranka reer Jabuuti aad iyo aad ayaan ugu
faraxsanahay in walaalkeyga uu mar labaad kusoo noqday jegada Gudoomiyaha
Baarlamaanka Jamhuuriyadda aynu walaalaha nahay ee Jabuuti”
Gudoomiyaha Baarlamaanka oo hadalkiisa sii wata ayaa markale yiri”
walaalkeyga Idiris waa nin waayo arag ah oo wadaninimo,aqoon iyo akhyaarnimo
isku darsaday oo hogaaminkara Baarlamaanka Jabuuti mudadii koobneyd ee uu soo
booqday halkaan Muqdisho waxa uu aad noogu dhiirageliyey inaan sii wadno howlaha
aan u heyno shacabka Jamhuuriyadda Federaalka Soomaaliya, mar labaad waan u
Hambalyeynayaa”
Ugu dambeyntii Gudoomiyaha Baarlamaanka Federaalka Soomaaliya Mudane Maxamed
Sheekh Cismaan Jawaari ayaa Alle uga baryey in Gudoomiyaha iyo Xildhibaannada
cusub ee dalka Jabuuti uu la garabgallo xilka loo dhiibay islamarkaana ay ka
shaqeeyaan ilaalinta danaha shacabka Jabuuti iyo Soomaaliya, Towfiiqdana Alle
waafiyo , sidoo kalena waxa uu Gudoomiyuhu kula dardaarmay Baarlamaanka Dalka
Jabuuti iyo hogaankoodaba iney hirgeliyaan rabitaanka shacabkooda iyo shuruuc
Dalkooda hormarineysa “HAMBALYO HAMBALYO HAMBALYO, ALLE HA IDIINLA GARAB GALLO”
-----DHAMAAD-----
Xafiiska Warfaafinta Gudoomiyaha Baarlamaanka
Faafin: SomaliTalk.com | March 18, 2013
| 
Daabaco
Boggan | Print
