Guddiga Arrimaha Gudaha iyo Amniga Qaranka ee Baarlamaanka oo Walaac ka
Muujiyay Xaaladda Amniga ee Magaalada Muqdisho.
Wasiirka Arrimaha Gudaha iyo Amniga Qaranka oo looga yeerey Xarunta Baarlamanka
 Xildhibaan
Daahir Amiin Jeesow Guddoomiye ku Xigeenka Guddiga Amniga ee Barlamaanka
Federaalka Soomaaliya ayaa ka hadlay xaaladda ammaan ee magaalada Muqdisho oo
maalmahaan si aad ah uga dareysey Xildhibaan Jeesoow ayaa sheegay in Xukuumaddu
ay ku fashilantay isla markaana ay wax ka qaban weyday falalka Qaraxyo oo
muddooyinkii dambe ku soo badanayay qaybo ka mid ah Magaalada Muqdisho.
Xildhibaanka oo hadalkiisa sii wata ayaa intaa ku daray in maalmahan dambe
Magaalada Muqdisho ay ka dhacayeen Dilal Qorsheysan iyo waliba Qaraxyo lagu
qaadayo Goobaha ay Maamusho Dawladda Federaalka Soomaaliya taasoo uu sheegay in
ay ka dhasheen falal isugu jira Dhimasho, Dhaawac iyo burbur.
Guddoomiye ku Xigeenka ayaa ugu baaqay Hay’adaha Ammaanka ee Xukuumadda
Federaalka Soomaaliya in ay wax ka qabtaan Qaraxyada iyo falalka liddiga ku ah
Ammaanka guud ee Dalka gaar ahaana Magaalada Muqdisho oo haatan faraha ka sii
baxaya.
Hadalkan Xildhibaanka ayaa imaanaya xilli maalinimadii shalay Degmada Xamar
Weyne Qarax lagula beegsaday laba Mudane oo ka tirsan Barlamaanka ka gadaal
markii Gaari ay wateen lala eegtay Qarax in kastoo ay ka badbaadeen Qaraxaas .
Si kastaba ha ahaatee dhawaan ayuu Wasiirka Warfaafinta ee Xukuumadda Federaalka
Soomaaliya Ciilmooge uu sheegeyin todobaadkan wax badan laga qaban doono
Ammaanka Muqdisho isla markaana maalmaha soo socda lagu arki doono Magaalada
Muqdisho Ciidamo aan weligeed hore loogu arag oo ammaanka sugaya.
Dhinaca kale waxaa Baarlamaanka Dowladda Federaalka ay waxa Maalinta Axadda ah
ay u yeertey Wasiirka Arrimaha Gudaha iyo Amniga Qaranka Cabdikariim Xuseen
Guuleed in uu Hor yimaado Golaha Baarlamaanka Dowladda si wax looga weydiiyo
Arrimo fara badan oo la xiriira Amaanka sii Xumaanayo ee Magaalada Muqdisho
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | July 25, 2013
| 
Daabaco
Boggan | Print
