Cuyuban Siyaasadeed!
Siyaasiyiintu way diideen inay ku dhaqmaan nidaamkii siyaasadeed ee Ilaahay u
dajiyey muslimiinta, waxayna doorbideen nidaam gaalo dagsatay oo lagu magacaabo
Dimoqraadi. Awoodooda waxay isugu geeyeen siday muslimiinta ugu khasbi lahaayeen
nidaamkaas. Goortii uu u meelmaray ayay haddana diideen natiijadiisii; waayo
waxaa ku guuleystay dad Ilaahay yeelay. Waa sida hadda Masar ka dhacdaye.
Taas waa markay meesha isku hayaan dad nidaamka Ilaahay doonaya laakiin markay
kaligood isku qabtaan qaybsiga xukunka ma yeelayaan in Dimoqraadiyada lagu
dhaqmo, natiijooyinkeedana ma aqbalayaan.
Siyaasiyiinta soomaalidu waxay ka midyihiin dadyowga ku ibtiloobay ku baqqista
nidaamkaas Dimoqraadiga ah, haddana aan daacada u ahayn ku dhaqankiisa. Saaka
waxaan akhriyey khabar sheegaya in magaalada Qardho dagaal ka dhacay oo yaa
diriray?, maxaase lagu diriray?.
Puntland markii la aasaasay waxaa gole shuuro laga dhigay 66 xubnood oo ninkay
codka siiyaan madaxweyne noqonayo. Marmar la kala boobay mooyee sidaas bay ku
soo socotay. Ka dib waxaa la doonay in xagga Dimoqraadiyada iyo xisbiyada badan
loo sii durko oo laga guuro 66kii nin.
Maanta dagaalka dhacay macnihiisu waxaa weeye cuyuban siyaasadeed oo ah waan
diidnay nidaamkii siyaasiga ahaa ee islaamka, dimoqraadiyadiina waa diidnay, tii
aan anagu gaar ahaan u dagsanayna waa diidnay. Mugga waa cuyuban, iyo cub iyo
cir!.
Gabagabadii waxaa hubaal ah in aan nina jacayl gaar ah u qabin dimoqraadiyada
iyo baarlamaanka 66-da ah ee nin walba wuxuu ku dhaganyahay midda uu is leeyahay
way kuugu badinaysaa, waxaase meesha ku baaba’aya ummaddii iyo daneheedii ee
siyaasiyiintu Ilaahay ha ka baqeen oo ha u tureen muslimiinta sooman, ninkii wax
qoonsadana yaanu dagaal bilaabin ee gartiisa ha jeedado.
Axmed C/samad
alwaqaar@hotmail.com
Faafin: SomaliTalk.com | July 15, 2013
| 
Daabaco
Boggan | Print
