Madaxweyne Xasan oo kulan la qaatay Guddiga New Deal
Muqdisho 13 July 2013 - Madaxweynaha Jamhuuriyadda Federaalka Soomaaliya Mudane
Xasan Sheekh Maxamuud ayaa maanta xafiiskiisa kula kulmay Guddiga Soomaaliga ee
New Deal oo u qaabilsan diyaarinta shirka Brussels ee 16ka September 2013. Waxaa
kulankan goob joog ahaa Wasiirka Maaliyadda iyo Qorsheynta Maxamud Xasan
Suleebaan iyo Wasiiru Dowlaha Arrimaha Gudaha & Amniga Qaranka Mahdi Maxamud
Cali iyo xubnaha guddiga New Deal.
Madaxweynaha ayaa guddiga kula dardaarmay sidii qorshaha qabanqaabada shirka
16ka September uu u noqon lahaa mid heer sare ah oo dhammaan dokumentiyada la
horgeynayo shirka ay noqdaan kuwa lala tashtay shacabka Soomaaliyeed.
Madaxweynaha ayaa guddiga ku yiri “Waa in isbedel dhab ah uu ka muuqdaa
hab-dhaqanka dowliga ah oo maanta oo aan heysanno dowlad rasmi ah waa in
qorsheyaasha la idiin igmaday ay noqdaan kuwa si aad ah loogala tashto shacabka
Soomaaliyeed isla markaana aad si heer sare ah isu abaabushaan si shirkaas uu u
noqdo mid guuleysta. “Qorshaha COMPACT oo aad diyaarineysaan waa inaad si taxadar ah uga fikirtaan oo
dhammaan hay’adaha dowliga ah ay idinkala qeybqaataan, si qorshaha la gudbinayo
uu u noqdo mid la jaanqaadi kara baahida shacabka Soomaaliyeed. Bacdamaa dib-u-dhiska
dalka uu u baahanyahay uu aad iyo aad u tiro badan yahay haddana waa in shacabka
lagala tashtaa waxyaabaha ay rabaan in mudnaanta gaarka ah loo siiyo, iyadoo la
tixgalinayo duruufaha qaaska ah ee gobollada qaarkood. Waana in guddiga uu si
joogta ah u wargeliyaa shacabka si ay ula socdaan horumarka guddiga iyo
qabanqaabada shirka Brussels oo shacabka Soomaaliyeed ay si aad ah u sugayaan.” Wasiirka Maaliyadda & Qorsheyna Qaranka oo guddiga madax ka ahaa ayaa u
ballanqaaday madaxweynaha inay dadaalayaan oo qorsheyaasha qaarkood ay diyaar
yihiin, isla markaana dib-u-habeyn lagu sameeyey hay’adihii maaliyadda si
shacabka iyo caalamkuba ay kalsooni buuxda ugu qabaan habka loo maareynayo
dhaqaalaha dib-u-dhiska dalka. - DHAMAAD - Abdirahman Omar Osman (Eng. Yarisow), Senior Advisor & Spokesperson to the
Office of the President, engabdirahman@gmail.com +252615479911 or +252 699
998854
Ra’iisul Wasaaraha oo la kulmay dhalinyarada, kuna dhiirageliyay inay
nabadda ka qeyb qaataan
  Muqdisho
July 13, 2013----Ra’iisul Wasaaraha Xukuumada Federaalka ee Soomaaliya Mudane
Cabdi Faarax Shirdoon Saacid, ayaa galabta kulan ballaaran la qaatay dhalinyaro
tiradoodu gaareyso 250 isugu jiray rag iyo dumar, kuwaasoo ka kala socday
ururada dhalinyarada, ardayda Jaamacaddaha iyo kuwa dugsiyada sare ee gobolka
Banaadir.
Kulankan ayaa looga gol lahaa in lagu dhegeysto aragtida dhalinyarada iyo dowrka
kaga aadan nabadda iyo horumarinta dalka, kaasoo hal ku dheg looga dhigay
kulanka maanta, sidoo kalena loogu gudbiyo fariinta dawladda, waxaana ku
wehliyay kulanka Wasiirka Arrimaha Gudaha iyo Amniga Mudane Cabdikariin Guleed,
Wasiirka Gaashaandhigga Mudane Cabdixakiin Faqi iyo Wasiirka Horumarinta Adeegga
bulshada Drs. Maryam Khaasim.
Dhalinyaradan ayaa ka hadlay xaaladda ay dhalinyarada ku sugan yihiin, waxayna
xuseen inay diyaar u yihiin inay qeyb ka qaataan dib u soo celinta nabadda iyo
horumarinta dalka, iyaga oo dhanka kalena ka codsaday madaxda in lagu taageero
himiladooda mustaqbalka isla markaana fursado loo abuuro.
Ra’iisul Wasaaraha Xukuumada Mudane Cabdi Faarax Shirdoon oo la hadlay dhalintan
ayaa u sheegay inay yihiin mustaqbalka dalka, isla markaana ay ka fogaadaan
qabiilka, argagixisada iyo xumaanta.
“Dhalinyarada maanta iga hor muuqata waxaan ku baraarujinayaa inay ka qeyb
qaataan sugidda amniga iyo xasilinta dalka, haddii aan dawladdu helin kaalinta
dhalinyarada ee sugida amniga runtii wey adkaaneysaa in la helo amni, maalin
kastana waxaad arkeysaan walaalihiina iyo waalidiintiina oo hortiina lagu
leynayo si gardarro ah” ayuu yiri Ra’iisul Wasaaraha oo dhalinyarada ku adkeeyey
in ay xiriir wada shaqeyn dhow la yeeshaan hay’addaha amniga ee dawladda si
looga hortago qaraxyada iyo falalka kale ee nabadda lidiga ku ah.
“Waxaad tihiin madaxdii mustaqbalka hogaamin laheyd dalka, anagu waxaan diyaar u
nahay inaan idinku wareejino kuraasta, balse idinkana waxaa la idinka doonayaa
inaad noqotaan dhalinyaro xil kas ah oo hufan” ayuu mar kale yiri Ra’iisul
Wasaaraha oo tusaale u soo qaatay dhalinyaradii SYL ee dalka u horseeday
xornimada.
Gabagabadii, Ra’iisul Wasaaraha Xukuumada Federaalka ayaa soo jeediyay kulan
ballaaran oo loogu magac daro “Shirweynaha Dhalinyarada”, inay soo agaasinto
Wasaaradda adeegga bulshada oo ay hoostagto Wasaaradda Dhalinyarada, kaasoo
socon doona muddo 3 cisho ah, si loo helo talo wadaag dhalinyarada iyo dawladda
dhex mara.
Kulankan galabta dhex maray dhalinyarada iyo Ra’iisul Wasaaraha oo ay wehliyaan
xubno ka tirsan golaha xukuumada ayaa qeyb ka ah, qorshaha cusub ee uu dhowaan
ku dhawaaqay Ra’iisul Wasaaraha kaasoo looga gol leeyahay iskaashi buuxa oo dhex
mara qeybaha kala duwan ee bulshada iyo xukuumada, si loo horumariyo nabadda iyo
degaanshaha dalka 22 sano kadib.
Garad Salad Hersi
Press officer, PM office
Mob.+252-61-5536608
Mogadishu, Somalia
|
Daabaco
Boggan | Print
