Xildhibaan Xiddig oo Dagaalada Kismaayo ku Eedeeyay Dawladda Federaalka
Soomaaliya
iyo Maxamed Cabdi Kaliil oo ku Eedeeyey Ciidamada Kenya in ay Dhinac la
Safteen Beelaha isku haya Kismaayo.
Xildhibaan Cabdirashiid Maxamed Xiddig oo mar ahaa Wasiir ku Xigeenka
Gaashaandhigga Xukuumaddii ku meel gaarka ahayd ayaa si kulul uga jawaabay
Eedeyn Xukuumadda Federaalka Soomaaliya Dawladda Kenya ay ku Eedeysey in ay qayb
ka noqotay Dagaaladii ka dhacay Magaalada kismaayo ee Gobolka jubada
Hoose.Xildhibaanka ayaa Eedda dagaalkaas dusha uga tuuray Dawladda federaalka
Soomaaliya oo iyadu uu sheegay in dagaalkaas ay abaabushay, Bilowdey isla
markaana ay Maalgalisay.
Xiddig
ayaa soo hadal qaaday Wasiirka Gaashaandhigga ee Dawladda Federaalka Soomaaliya
inuu rasaas iyo Lacagba uu geeyay Magaalada kismaayo isla markaana uu isagu
dagaalkaas bilaabay isagoona hoosta ka xarriiqay in laga soo abaabulay Magaalada
Muqdisho.
Cabdirashiid Maxamed Xiddig ayaa meesha ka saaray Eedeynta loo soo jeedinayo
Ciidamada Kenya oo qayb ka ah Dagaaladii ka dhacay Magaalada Kismaayo isagoona
Dagaalkaas dusha u saariyay inay wadday Xukuumadda oo qaar ka mid ah
Wasiiradeeda halkaas ay u tageen si ay dagaalkaas u abaabulaan.
Hadalkan ka soo yeeray Xildhibaan Xiddig ayaa waxa uu imaanayaa xilli Maalintii
shalay gelinkeedii dambe Magaalada Muqdisho uu Shir jaraa’id ku qabtay Wasiir ku
Xigeenka WarFaafinta Boostada iyo Is gaarsiinta Cabdishakuur Cali Mire kaasoo
sheegay in Ciidamada Kenya ay dhinac la safteen isla markaana ay ka qayb qaateen
Dagaaladii ka dhacay Magaalada kismaayo .
Dhinaca kale Maxamed Cabdi Kaliil Guddoomiyaha Maamulka Dawladda ee Gobolka Gedo
ayaa ka hadlay Doorka Ciidamada Kenya ee Dagaaladii maalmahanba ka dhacayay
Magaalada Kismaayo ee Gobolka Jubada Hoose.Guddoomiyaha ayaa sheegay in Ciidamo
ka tirsan Xukuumadda oo dhawaan gaaray Gobolka Jubada Hoose qaybna ka ahaa
Ciidamo ay Dawladdu u bedeshay Gobolkaas in Dagaaladaas lagu Xasuuqay
arrintaasina ay ka dambeysey Xukuumadda Kenya.
Kaliil oo hadalkiisa sii wata ayaa intaa raaciyay in Ciidamada Kenya aysan u
kala aaba yeelin Ciidamadaas oo Cir iyo Dhulba ay ka garaacday illaa ay
Magaalada ka saarto.Maxamed Cabdi Guddoomiyaha Gobolka Gedo ayaa sheegay in
Ciidamada dawladdu marnaba aysan ka filaynin Ciidamda Kenya inay Dagaal kala hor
imaanayaan isla markaana dhinac ay la soo safanayaan isagoona Cambaareyn kulul
dusha uga tuuray Ciidamada kiinyaanka ee qaybta ka ah hawl galka Amisom ee
Gobolka Jubada hoose.
Guddoomiyaha Gobolka Gedo ee Maamulka Dawladda Federaalka Soomaaliya ayaa hoosta
ka xarriiqay in dagaalkaas ay ku dhinteen illaa Boqol iyo Konton Askari halka
dhaawucuna uu ku sheegay illaa laba Boqol oo Askari oo qaarkood sida uu sheegay
dhaawacooda la dhamays tiray.
Kaliil ayaa sheegay in Ciidanku ahaa Ciidan Dawladeed isagoona meesha ka saaray
in ay jireen Ciidamo uu leeyahay Col. Barre Hiiraale Korneylkuna uu yahay
Shakhsi Gobolkaas u dhashay waxase lala dagaalamay ay yihiin Ciidamadii dawladdu
Gobolkaas u dirtay.
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | July 1, 2013
|