Warsaxaafadeed
Ra’iisul Wasaaraha Xukuumada oo maanta kormeeray bixinta mushaaraadka
shaqaalaha rayidka oo ka bilaabtay Bankiga dhexe
Muqdisho, August 29, 2013----Ra’iisul Wasaaraha Xukuumada Federaalka Soomaaliya
Mudane Cabdi Faarax Shirdoon (Saacid), ayaa saaka kormeer ku tegay xarunta
Bankiga dhexe ee Soomaaliya, halkaasoo ay ka soconeyso bixinta mushaaraadka
shaqaalaha rayidka ee hay’addaha dawladda, sida Wasaaraddaha, iyo hay’addaha.
  Mashruucan
mushaarbixinta oo ay iska kaashanayaan dawladda Soomaaliya iyo dawladda Norway
ayaa waxaa fulinaya Wasaaradda Maaliyadda waxaana loo adeegsanayaa qaab casri
ah, waana markii ugu horeysay oo qaabkan loo adeegsanayo Teknolojiyada casriga
ah oo ay ku dhantahay xogta shaqsiga (Bio metric System), wuxuuna Ra’iisul
Wasaare Saacid mid mid u galay xafiisyada iyo goobaha ay howshu ka soconeysay,
iyadoo xilligaasi safaf dhaadheer ay ku jireen qaar ka mid ah shaqaalaha
dawladada oo qaadanayay mushaarka.
Kormeerkan Ra’iisul Wasaaraha waxaa ku wehlinayay Wasiirka Maaliyadda Mudane
Maxamuud Xasan Suleymaan, isaga oo uga warbixiyay qaabka lacag bixinta iyo cida
ka taageereysa oo uu sheegay in dawladda Norway ay ka taageereyso qorshahan
mushaar bixinta uguna deeqday dhaqaalaha.
“Bankigu maanta wuxuu bilaabay mushaar bixintii ugu horeysay ee oo laga bixinayo
xisaabta mashruuca loo yaqaano Special Financial Facility (SFF), waana mashruuc
ay iska kaashanayaan dawladda Soomaaliyeed iyo dawladda Norway oo muddo sideed
bilood ah laga soo sahqeynayay” ayuu yiri Wasiirka Maaliyadda oo xusay in
qorshani uu qeyb ka yahay maareynta dib u habeynta dhaqaalaha dawladda. (Public
Finance Management Reform).
Dhanka kale, Ra’iisul Wasaaraha Xukuumada Mudane Cabdi Faarax Shirdoon ayaa
sheegay inuu ku faraxsan yahay in shaqaalaha rayidka dawladdu ay mushaaraadkooda
helaan, isaga oo tilmaamay in dawladda federaalka dhanka kale bixisay
mushaaraadka ciidanka dawladda iyada oo adeegsaneysa qasnadda dhexe ee dawladda
Soomaaliyeed.
“Arrintani waxay tusaale cad u tahay horumarka dhanka maamulka maaliyadda ah ee
ay dawladdu sameyneyso, waana nidaam cad oo la xisaabtan leh” ayuu yiri Ra’iisul
Wasaaraha oo ku tilmaamay talaabadani mushaar bixinta guul u soo hoyatay
dawladda, waxa uuna carabka ku adkeeyey in talabaadani ay abuureyso kalsoonida
beesha caalamka.
Ugu dambeyntiina, Ra’iisul Wasaare Saacid ayaa sheegay in dawladda Soomaaliyeed
ay si buuxda u qaadatay isla markaana dhaqangelisay siyaasad cad oo ku aadan
hagaajinta illaha dhaqaalaha.
Garad Salad Hersi
Press officer, PM office
Mob.+25261-5536608
Mogadisho, Somalia
 Madaxweynaha oo soo
dhoweeyey wafdi ka socday QM & AU.
Madaxweynaha Jamhuuriyadda Federaalka Soomaaliya Mudane Xasan Sheikh Maxamud
ayaa manta xafiiskiisa ku qaabilay guddi ka wada socda Qaramada Midoobey iyo
Midowga Africa oo howshoodu tahay inay qiimeyn ku sameeyaan sidii ciidamo
Qaramada Midoobey ka socda oo nabad illaalin ah Soomaaliya loo keeni lahaa.
Madaxweynaha waxaa kulankan ku wehliyey Wasiirka Gaashandhiga, Wasiir ku
xigeenka Arrimaha Dibedda, iyo la taliyeyaasha Xafiiska Madaxweynaha. Dhanka
kale Wafdiga labada dhinac ka socda waxaa ku wehliyey kulanka Ergeyga Gaarka ah
ee Midowga Afrika iyo ku xigeenka Ergeyga Gaarka ah ee Qaramada Midoobey iyo
Taliyaha Ciidanka AMISOM.
Walid Musse oo u hadlay guddiga labada dhinac ah ayaa warbixin siiyey
Madaxweynaha oo sheegey in guddigu ay booqan doonaan gobollada Bay, Kismaayo,
Beledweyn iyo Jowhar si ay qiimeyn ugu soo sameeyaan horumarka ciidamada AMISOM
iyo kuwa dowladda, caqabadaha jira iyo sidii Qaramada Midoobey ay saacidi
lahaayeen ciidanka Soomaaliyeed oo loogu heli lahaa tasiilaadkii ay ku howlgali
lahaayeen. Walid Musse ayaa sheegey in Golaha Ammaanka ee QM uu ka sugayo
warbixin ku aadan xaaladda dhabta ah ee ka jirta Soomaaliya si ciidamo
nabad-illaalin ah oo ka socda QM loo keeni lahaa Soomaaliya.
Madaxweynaha ayaa aad iyo aad uga mahadceliyey Qaramada Midoobey iyo Midowga
Africa dadaalkooda ku wajahan sidii Soomaaliya ay u nqon laheyd waddan nabad ah
oo deggen. Madaxweynaha ayaa yiri “Waxaan soo dhoweyneynaa wadatashiyada
joogtada ah ee QM iyo Midowga Africa ay la yeelanayaan Dowladda Soomaaliya,
Dowladdana waxay diyaar idiin la tahay sidii aad howlaha aad u timaadeen aad u
gudan laheydeen. Kooxaha Al-Shabaab wallow laga adkaaday haddana weli waxey
qatar ku yihiin ammaanka dalka oo ay doonayaan inay caalamka tusaan in dalku
uusan nabad aheyn. Sidoo kale ciidanka Dowladdu waa diyaar oo tababar ku filan
wey qaateen, laakin caqabado badan ayaa jira sida tasiilaadkii iyo dhaqaalihii
ay ku howlgali lahaayeen iyo xaquuqdooda aasaasiga ah. Dowladdu wey soo
dhoweyneysaa qorshaha QM ee ah in la taageero ciidanka Dowladda si ay u gutaan
howlahooda muhiimka ah.”
Ergeyga Gaarka ah ee Midowga Africa oo isna ka hadlay goobta ayaa sheegey inuu
ku faraxsanyahay horumarka ballaaran oo ay dowladdu sameysey isla markaana
sheegey in Midowga Africa ay marwalba garab taagan yihiin dowladda Soomaaliya.
- DHAMAAD -
Communication Office
Office of the Somali President
Mogadishu, Somalia
" Shacabku waxey idinka sugayaan inaad badbaadisaan oo aad sharafkooda iyo
karaamadooda illaalisaan”
 (Muqdisho Somalia,
28,August,2013)Madaxweynaha Jamhuuriyadda Federaalka Soomaaliya Mudane Hassan
Sheikh Mohamud ayaa maanta kormeeray taliska cusub ee qeybta 12ka Abril iyo
Taliska guud Wasaaradda Gaashaandhiga
Madaxweynaha oo la hadlayey ciidanka xooga dalka Soomaaliyeed ayaa ku ammaanay,
kuna dhiirigeliyey dadaalka ay ugu jiraan sugidda amniga iyo la dagaalanka
kooxaha Nabad-diidka ah.
Madaxweynaha oo la dardaarmayey ciidanka ayaa yiri " Shacabku waxey idinka
sugayaan inaad badbaadisaan oo aad sharafkooda iyo karaamadooda illaalisaan.
Waad ku ammaanantihiin dagaalka kooxaha nabad diidka, oo Shacabku waxey fursad u
heleen inay guryahooda ku laabtaan. Hase yeeshee falalka kufsiga iyo
isbaarooyinka waa amni-daro Qaran, oo ciddii lagu helo lala tiigsan doono
sharciga, lana marsiinayo ciqaabta ugu adag. Waxaan dhowaan dib-u-howlgelin
doonaa Isbitaalkii Xooga si loo daryeelo caafimaadka ciidanka. "
Madaxweynaha ayaa kormeerkan ugu kuur galayey xaaladda ciidanka, una sameynayo
dhiirigelin lagu Dar-dar gelinayo sugidda amniga.
Dowladda ayaa in muddo ah ku howlaneed dib u habeynta hay'adaha amniga ,tababaro
la siiyey ciidanka oo tayadooda kor loogu qaadayo, si loo soo celiyo haybaddii
iyo sharaftii ciidanka Soomaaliyeed.
--
Communication Office
Office of the Somali President
Mogadishu, Somalia
---------------
Ra'iisal Wasaaraha oo u aqonsatay, 27 August Maalinta Xuquuqal Insaanka
Soomaaliya
Muqdisho, August 27, 2013....... Ra'iisal Wasaaraha Xukuumada Faderaaliga ah
Cabdi Faarax Shirdon "Saacid" ayaa maanta u aqoonsaday Maalinta Xuquuqal
Insaanka Soomaaliya kadib markii ay Goloha Wasiiradu ansiyeen qorshaha geedi
socodka xuquuqal insaanka dalka. Qorshahan ayaa loo soo bandhigay dawladda si
wax looga qabto xadgudubyada ka dhaca dalka gudihiisa. Waxaa loo soo bandhigiay
dawladda ka dib markii ay mudo ka soo shaqaynayeen xubno ka tirsan dawladda,
baarlamaanka iyo ururada bulshada.
Ra'iisal Wasaaraha ayaa sheegay in qorshahani udub dhexaad u yahay barnaamijka
dawladdu ay ku difaacayso kuna hormarumarinayso xuquuqda muwaadiniinta
Soomaaliyeed. Waxaa kaloo uu tibaaxay in uu yahay mid qeexaya masuuliyada
dhinacyada kala duwan ee ku lug leh horumarinta xuquuqda aas aasigaa ee
muwaadinka.
"Maanta waxaan u aqoonsanay inay tahay maalinta xuquuqal insaanka Soomaaliya.
Dawladdu waa ay taabo galinaysaa qorshahan dalka oo dhan. Waa mid aan qaadanay
oo aan sii balaarin doono gaarsiina doono dalka oo dhan," ayuu yiri Ra'iisal
Wasaaruhu.
Ra'iisal Wasaaraha ayaa dhanka kale tibaaxay tilaabooyinka ay dawladdu u
hirgalisay dhanka hiigsiga sugida xuquuqda muwaadiniinta sida kuwa la xariira ka
qeyb-galka siyaasada ee dumarka iyo qabiilada laga tiro badan yahay.
Uqaabilsanaha Arrimaha Xuquuqal Insaanka Soomaaliya, Dr. Shamsul Bari oo ka
hadlay munaasabadii daah-furka qorshaha xuquuqal insaanka ayaa sheegay in
Soomaaliya ay horumar la taaban karo ka gaartay dhawrista xuquuqal insaanka.
Waxaana uu intaas ku daray inay cadahay in dawladda Soomaaliya muujisay
masuuliyad dheeri ah ayna iska xil-qaantay dhawrista xuquuqada muwaadiniinta
Soomaaliyeed.
"Is-badal weyn ayaa ka dhacay Soomaaliya shantii sano ee la soo dhaafay. Waxaa
nasiib wanaag ah in rajada dalku soo raynayso Soomaaliyana ay tusaale u tahay
caalamka intiisa kale markay noqoto dib-u-dhiska qaranka ayadoo dareensa
masuuliyada ka saaran dhawrista xuquuqal insaanka," ayuu yiri Shamsul Bari oo
intaas ku daray inay muuqato in dawladda Soomaaliya ka go'antahay fulinta dawlad
wanaaga iyo hirgalinta sharciga.
Wasiirka Cadaalada mudane Cabdullahi Nuur Abyan ayaa sheegay in dawladdu masuul
ka tahay illaalinta xuquuqda muqaadiniinta sida ku cad shuruucda dalka iyo
diinta Islaamka oo si balaaran u qeexday xuquuqda rasmiga ah ee shaqsigu
leeyahay. Waxaa sidoo kale wasiirku sheegay in dawladdu dib-u-habayn buuxda ku
samaynayso laamaha cadaalada si waafaqsan caalamka.
Ugu dambayntii, Ra'iisal Wasaaraha ayaa bilad sharaf gudoonsiiyay dhawr masuul
oo dadaal dheeri ah u galay difaaca xuquuqal insaanka Soomaaliya.
Masuuliyiintaas waxaa kamid ahaa: Dr. Shamsul Bari, uqaabilsanaha arrimaha
xuquuqal insaanka Soomaaliya; Dr. Miranda Ruth Brown, Madaxa Bariga iyo Kuurta
Africa, Waaxda Labaad ee Xafiiska Masuulka ugu sareeya Arrimaha Xuquuqal
Insaanka; Al Hajj Idrissa Aumar Kane, Agaasimaha Bariga afrika ee isla
xafiiskaas, iyo Danjire Yusuf Maxamed Ismaaciil "Bari-Bari" oo ah safiirka
Soomaaliya u fadhiya Geneva ahna wakiilka Soomaaliya ee Qaramada Midoobay ee
fadhigeeda Switzerland.
DHAMAAD
Ahmed Adan
Prime Minister's Media Office
Mogadishu, Somalia.
Phone: +252 (0) 616 44 00 28
Email: media@opm.gov.so
Faafin: SomaliTalk.com | Aug 29, 2013
|
Daabaco
Boggan | Print
