Magaalada Muqdisho oo ah Caasimadda Soomaaliya waxaa 15-kii sano oo ay socdeen dagaalada Sokeeye  waxaa ka dhacay dagaalo soo noq noqday oo xoogoodu ay ku dhinteen dad rayid ah oo aan waxba galabsan, kuwo fara badana ay ku dhawacmeen.

Marka lagu dhex dagaalamo dadka Rayidka ah waxaa dagaalkaas uu keenaa dhimasho, dhaawac iyo barakac oo intiisa badan ku dhaca dadka rayidka ah, Marka aan dib u qooraansano dagaalkii dhex maray Cali Mahdi iyo Caydiid, Madaafiicdii habowga ahayd waxay inta badan ay ku habsanayeen dad rayid ah oo guryahooda iska dhex joogay, sidoo kale Madaafiicdaasi waxa ay galaafteen qoysas fara badan oo iyana madaafiicdu ugu tagtay guriyahooda, waagaas waxay indhaheygu qabteen qoys ka koobnaa lix qofood oo madfac ku habsaday dhamaantoodna halkaas ku geeryooday.

 Sidoo kale dagaalkii dhex maray Caydiid iyo Cismaan Caato ayaa iyana Madaafiicdii la is weydaarsanayay waxaa inta badan ku baaba’ayay dadka rayidka ah, waxaana waqtigaas indhaheygu qabteen madafac la soo riday oo ku habsaday qoys ka koobaa sagaal qof oo ay ka badbaaday keliya Hooyadiii qoyska oo iyana labada lugood ka go’day, waa naxdin iyo anfariir ay ummaddu soo martay oo qofkii ka sheegeeyaa uu aad u murugoonayo.

Dagaaladii xooga lahaa ee ka dhacay Magaalada Muqdisho ayaa waxaa ka mid ahaa kii dhex maray Muuse Suudi iyo Cumar Finish, iyadoo madaafiicdii ay is weydaarsanayeen labada dhinac  waxa uu ku habsaday qoys ka mid  ahaa dadka soo barakacay oo iyagu soo magansaday Magaalada Muqdisho kana koobnaa 11-qofood ayaa waxaa ka haray Gabar shan sano jir ahayd oo magaceeda la oran jiray Sahro Cusmaan, waxaana gabadhaan aakhiritaankii kafaala qaaday nin Sucuudiyaan ah, sidoo kale dagaaladii iyana soo noq noqday kana dhacay Magaalada Muqdisho ayaa waxaa ku dhintay dad fara badan oo rayid ah, qaarkood iyagoo qaxaya xitaa oo gaarigii ay saarnaayeen uu madfac la tagay halkaas oo ay kuwada baaba’een.

Qabqablayaasha dagaalka ee waqtigaasi haddii la weydiiyo sababaha ay ugu dhex dagaalamayaan bulshada rayidka ah, waxay u muuqdeen kuwo aan u jeedin masaakiinta le’eneysa, waxana uuna mid walba midka kale ku eedeenayay in isagu sabab u yahay in bulshada dhexdeeda lagu dagaalayo.

Dhawaan ayaa Madaxweynaha Dowladda Federaalka C/llaahi Yuusuf mar uu ka hadlay dagaalada ka dhaca Magaalada Muqdisho oo ay ku dhintaan dadka rayidka ah ayaa waxa uu yiri “Hawiyaha kama waantoobo miyaa in ay ku dhex dagaalanka Bulshada Masaakiinta ah, anagu markaan dagaalamaneyo bannaanka ayaan iskula baxnaa, fiiri dagaaladii ka dhacay Puntland intooda badani waxay ka dhaceen meelo ka baxsan Magaalooyinka si ay ugu danqano dadka rayidka ah”,  warka C/llaahi ka soo yeeray waxa uu ku soo beegmay xili markii ay socdeen dagaaladii ka dhacay Boondheere dhawaan, waqtigaas oo uu Madaxweynuhu baaq u jeedinayay dadka dagaalamaya.

Haddaba maalintii doraad ahayd waxaa duleedka Magaalada Muqdisho uu dagaal ku dhex maray maleeshiyooyin kala taageersan Barshiir Raage iyo Abuukar Cumar Caddaan dagaalkaan oo lagu adeegsaday hubka fudud iyo midka Culus ayaa waxaa dadka qaarkii ay tilmaameen haddii uu ka dhici lahaa Magaalada Dhexdeeda in uu dad fara badan halaagi lahaa.

Dagaalkaani oo ka duwanaa kuwii ka dhici jiray Magaalada Muqdisho, maadaama uu ka dhacay meel ka baxsan Magaalada ayaa dadka qaarkii waxay ku micneeyeen in labada Ganacsade ay wax ka fahmeen hadalkii C/llaahi Yuusuf Axmed ee ahaa “Hogaamiyaasha Hawiye waxay ku kor dagaalamaan Bulshada rayidka ah”,

Haddaba arrinta ay bilaabeen Bashiir Raage iyo Abuukar Caddaani, ma laga yaabaa in ay ku daydaan ragga kale gaar ahaan kuwa u heelan in ay ku dagaalamaan bulshada dhexdeeda, ilaa iyo haddana ma cadda sababaha ay bulshada ugu dhex dagaalamaan raggaasi, ma waxay  ka tahay tababar yari si ay ugu gambadaan xaafadaha dhexdooda mise waa u caado, Dhaqanka Soomaalida, xitaa Raggaani ma aysan fulin, waagii hore marka laba qof ay is maagaan waxaa la isugu keeni jirey  meel la yiraahdo Kala Reebto, halkaas ayayana ku kala bixi jireen oo dhibtaadoodu ma soo gaari jirin bulshada inteeda badan, xitaa reer Magaalku dhaqan ayay lahaayeen oo labadii qof ee is maaga waxay is oran jireen “na keen Luuqa”.

Isku soo wada duuboo ragga is doonaya waa in ay isugu baxaan Kala Reebtada si ay bulshada dagaalkoodana kor uga daawato oo aysan soo gaarin waxyeeladooda, bulshada waxaa la gudboon  in ay iska jiraan kuwa Karfantooda tolaya.

W/D: Amiin Yuusuf Khasaaro

E-Mail: amiinkhasaro@hotmail.com

Faafin: SomaliTalk.com | Jan 15, 2006

---

Xaggee Mareysaa Cayaartii xiisaha badneyd ee Jowhar iyo Muqdisho: Qaybtii 13aad -Qore: Amiin Yuusuf Guji...