Qaybtii 5 aad

W/D: Amiin Yuusuf Khasaaro

E-Mail amiinkhasaaro@hotmail.com

Muqdisho, Soomaaliya

---

 Ciyaaryahan Geeddi ayaa waxa uu soo xiray line aad loogu riyaaqay oo ah in kooxda Muqdisho laga joojiyo Duulimaadyada diyaaradaha ee ay isticmaalaan ciyaartoyda kooxda ee ay safarrada ugu kicitamaan marka ay ka qayb galayaan tartammada Heerka Qaaradeed, heer Caalami iyo heer Gobol, inkastoo Cali Max’ed Geeddi uu isagu daaha ka qaaday in gebi ahaanba la xiray garoommada ciyaartoyda kooxda Muqdisho ee Dayniile iyo Ceel Axmed, haddana mid ka mid ah Difaacyada ugu ad-adag kooxda Muqdisho oo aan si sahal ah lagu mari Karin, laguna magacaabo ciyaaryahan Qanyare ayaa dowladda Kenya waxa uu ka dalbaday in ay arrintaasi ka hadasho, waxaana warkan xiritaanka garoommada Ceel Axmed iyo Dayniile uu ahaa dharbaaxadii ugu xumeyd ee soo gaarta kooxda, inkastoo duulimaadyadii diyaaradaha ay weli sidoodii u shaqeynayaan.

            Ciyaaryahan Geeddi ayaa ka soo degay garoonka Diyaaradaha ee Jowhar isagoo wehliyaan ciyaartooy u ciyaari jirey kooxda Muqdisho, markii la arkay ayaa sacab iyo sawaxan cirka isku shareeray “Qac…..Qac….Qac”, taageerayaashii kooxda Jowhar oo albaabka diyaaradda indhaha ku hayay ayaa waxay is weydiinayeen “War aawaya ciyaartoyda uu ciyaaryahan Geeddi sheegayo wax soo degaya ma aragnee!?”, mar dambe ayaa diyaaraddii waxaa ka soo degtay Dhaqtarad Qamar Aadan Cali iyo ciyaaryahan Cali Baashi iyo ciyaartooy kale, Saxaafadda ayaa markiiba ku soo xoontay ciyaaryahan Cali Maxamed Geeddi, su’aashii ugu horreysay ee ay weydiiyeenna waxay ahayd “Ciyaartoydii aad ku hanjabaysay ma kuwan baa?”, inta qoslay ayuu wuxuu yiri “Gadaal ayay ka imaan doonaaan oo wax badan ayaan ka war qabaa”, hase yeeshee taageerayaashii kooxda Jowhar ayaa hadalladoodii waxaa ka mid ahaa “Wallaahi lacagtii loogu dhiibay ciyaaryahan Geeddi in uu ciyaartooy cusub naadiga ugu soo iibiyo ma uusan ku soo gadin, wuxuuba keensaday ciyaartooy muddo kursiga keydka kooxda Muqdisho ku jirtay”, mid kale oo taageerayaasha ka mid ah ayaa waxa uu yiri “Weliba wuxuu keenay ciyaartooy ay ka kaaftoontay kooxda Muqdisho, magac saa u sii dheerna aan lahayn”.

            Ciyaaryahan Muuse Suudi ayaa hadba dhinac u cararaya, wuxuuna ku hayaa “War waa nalaga adkaan rabaaye maan kubadda si fiican u ciyaarno oo aan iska dhaafno caajiska iyo kubadaha la isku hallaynayo”, waxaana mararka qaarkood uu taleefoon kula xiriirayaa ciyaaryahan Qanyare oo uu ku oranayo “Waa in aan abaabul sameynaa oo labadeenana hantida jeebkeenna aan ku raadinnaa ciyaarooy cusub, maadaama aan nahay raggii kooxda ugu fir-fircoonaa”, wuxuuna xusay in kooxdu ka cabanayso qalab la’aan iyo weliba tababare la’aan.

            Kooxda Muqdisho waxaa si lama filaan ah uga tegay ciyaaryahan hadda ka hor gool u dhaliyey kooxda Muqdisho, goolkaasi oo ahaa kii (Liibiya) oo lagu magacaabo Ciyaaaryahan  Cismnaan Cilmi Boqorre oo isagu qiimo jaban oo aan u qalmi ay kula wareegtay kooxda Jowhar, markii uu ka soo degay garoonka diyaaradaha Jowhar taageerayaashu soo dhoweyn sidaasi u buuran uma aysan samayn, maadaama uu hadda ka hor ka dhaliyey goolkii (Liibiya). ,Ka tegista ciyaaryahan Boqorre waxay naxdin ku abuurtay kooxda Muqdisho oo waxaa ka soo haray af kala taag iyo amakaag, waxayna ciyaartoyda qaarkood oo deggan Hotel Saxafi International ku dhawaaqayeen “War ciyaaryahan Cismaan maxaa ku dhacay?”, mid kale ayaa hadalkii qaatay, wuxuuna yiri “wuxuu ka careysnaa tababare la’aanta kooxda iyo mushaar dhimis lagu sameeyey, maadaama dhaqaalihii naadiga uu hoos u dhac ku yimid”, waxaa hadalkii qaatay ciyaaryahan saddexaad, wuxuuna yiri “War kuleyl iyo qabow naguma hayo ciyaaryahankaasi, haddii aan weli haysanno ciyaartoydeenna lafdhabarta ee Muuse iyo Qanyare”. Kooxda Muqdisho waxay qaban-qaabo iyo qal-qaallo ugu jiraan sidii ay kooxda ugu soo biirin lahaayeen ciyaaryahan lagu magacaaabo Maxamed Siciid Xirsi Moorgan, inkastoo dhinaca farsamada kala taliyo kooxda Muqdisho, haddana dhowr jeer ayaa loo bandhigaya in uu ciyaaro oo ku soo biiro ciyaartoyda kooxda, hase yeeshee waxa uu soo qaadatay halheyskii Goronyada ee ahayd “Haddii ciyaartu wanaagsanaato lug, haddii ay xumaatana ka noqsaday!”, waa ciyaaryahan laba labaynaya oo shakinaya, hase yeeshee waa ciyaarayahan ay ku keydsan tahay farsamooyin fara badan oo guul u horseedi karta kooxda Muqdisho.waa socotaa

QAYBIHII HORE EE MAQAALKAN KA AKHRI....

W/D Amiin Yuusuf Khasaaro
E-Mail  amiinkhasaaro@hotmail.com .

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Nov 11, 2005

Injineer Soomaaliyeed oo Lagu Diley Diinsoor
Eng. Max'ed Ibraahim Dheel oo 15 sano ku maqnaa dalka Mareykanka ayaa waxa uu Degmada Diinsoor ugu soo laabtay sidii uu gacan u siin lahaa dadkiisa, waana la diley, warkaas iyo Muqdisho oo uu wiil naftiisa ku waayay Xabad Sigaar ah... ka akhri.. HALKAN... GUJI... Nov 7