Wafdi uu hogaaminayo Reysalwasaaraha Soomaaliyada Prof-Geedi ayaa duhurnimadii maanta u ambabaxay Caaasimada Neyroobi ee Dalka Kenya.

Aug 18, 2005

Safarka ayaa lagu sheegay in ay tahay sidii uu ula soo wareegi lahaa deeq ay Dawlada Shiinaha oogu deeqday Xukuumada Federaalka Soomaaliyeed ,deeqdan ayaa lagu soo waramayaa in ay u badan yihiin qalab wax weyn u tari doono hab-sami u socodka hawlaha Xukuumada ,saldhigeedu yahay magaalada Jowhar si kumeel gaar ah.

Wafdiga Reysalwasaaraha ayaa waxaa ka mid ah ,Wasiirka Xanaanada iyo Xoolaha Mudane Dr-Ibraahim Maxamed Isaaq ,oo ay saaxiibo gaar-ah yihiin Gudoomiyaha Baarlamaanka Mudane Shariif.

Sidoo kale warar soo baxaya ayaa sheegaya in laga yaabo in kulan gaar-ah laysku soo hor-fariisiyo Mudane Geedi iyo Mudane shariif ,waxaana kulankan qaban-qaabinayo,Gudoonka Baarlamaanka Wadanka Kenya oo isku taxa-lujiyay in ay u kala dab-qaadaan madaxda sare ee Dawlada ,oo iyagu dhawr jeer la isku dayey in la xaliyo khilaafaadkooda balse lagu guldareystay.

Wararkii shalay hoos ka akhri::

Wafdi balaaran oo uu hogaaminayo Gudoomiyaha Baarlamaanka Federaalka Soomaaliyeed Mudane Shariif Xasan ayaa goor dhaweyd ka duulay garoonka xaafada Deyniile oo ku yeel duleedka Magaalada Muqdisho.

Gudoomiyaha oo u waramayey Suxufiyiinta ayaa ku tilmaamay in safarkiisu jawaab u yahay martiqaad uu ka helay dhigiisa Baaarlamaanka Kenya Mudane Fransual Kore ,martiqaadkaasi oo la xiiriira ayuu yiri Gudoomiyaha sidii loo hormarin lahaa iskaashiga soo jireenka ah ee u dhexeeya labada Baarlamaan.

Shariifka ayaa sidoo kala shaaca ka qaaday in socdaalkiisa Neyroobi, uu la xiriiro sidii uu isagu diyaarin lahaa ka qeybgalka kulanka Baarlamaanada Caalamiga oo lagu wado mustaqbalka dhaw in uu ka dhaco Dalka Mareykanka.

Wafdiga uu hogaaminayo Afhayeenka Baarlamaanka ayaa ka kooban 9 xubnood oo isugu jira Xildhibaano iyo Xogheynadiisa waxaana ka mid ah:

1-Xildhibaan Zakariya Maxamuud

2-Xildhibaan Faarax Ismaaciil

3-Xildhibaan C/qaadir Sheekh Maxamed

4-Xildhibaan Maxamed Xasan Daryeel

Xubnaha kale ee oo soo haray  ayaa lagu sheegay Hawl-wadenadiisa ka tirsan Xafiiskiisa, warar kala duwan ayaa sheegaya in laga yaabo inta uu Neyroobi ku sugan yahay, in uu wada hadal la qaadan doono,Wakiilka Qaramada midoobay ee Soomaaliya Mr-Fall.

Safarka Gudoomiyaha iyo Xubnaha la socda ayaa la sheegay in uu qaadan doono mudo todobaad ah ,iyadoo laga soo weriyay Shariifka in ay dib oogu soo laaban doonaan Magaalada Muqdisho si Gudoomiyuhu uu ooga qeyb galo kulanka uu iclaamiyay 27da bishan,kaasoo ka dhici doono Xarunta Xisbiga oo fadhi ku meel gaar ah u ah Mudanayaasha ku sugan Muqdisho.

Shariifka ayaa lagu wadaa inta uu mareykanka joogo in uu la kulmo Jaaliyadaha Soomaaliyeed e ku sugan Arliga Mareykanka ,sidoo kale waxaa laga yaabaa  in uu soo salaamo Caruurtiisa iyo xaaska u degan Mareykanka,inta uu safarkiisa ku guda-jiro.

Warar dheeraad ah oo ka soo baxay Muqdisho ayaa sheegay inliiska waftiga guddoomiyaha lag areebay Xildhibaan Caasho Cabdala.

Xuseen Yaasiin Gode-Gode

email: godegode_6@hotmail.com