Waxaa qoraalkan iska
kaashaday:
Maxamuud Nuur Wardheere iyo
Maxamed Cali (SomaliTalk)
|
Muhammad Ali |
Yaa ka fekerayey in baaskiil
la xaday uu ahaa furaha
bilowgii guulahii Muhammad
Ali? Laakiin taasi waa
xaqiiq. Sannakii 1954
magaalada Louisville ee
gobolka Kentucky ayey ahayd
markii Muhammad Ali oo
markaas magaciisu ahaa
Cassius Marcellus Clay
da'diisuna ahayd 12-jir laga
xaday baaskiil-kiisii
markaas oo asaga iyo
saaxiibkiis ay ku jireen
meesha lagu magcaabo
Columbia Auditorium.
Markiiba wiilkii dhallinta
yaraa ee Cassius waxa uu
qolka jimicsiga (gym)
kahelay askari magaciisu
ahaa Joe Martin, markaas
ayuu asaga oo caro
dhallinyaranimo ka muuqato
ku yiri Martin qofkii
baaskiilkayga xaday feer
ayaan ku daandaamin doonaa.
Mr. Martin oo muusoonaya
ayaa waxa uu yiri "Marka
hore feerka soo baro".
Toddobaadyo gudohoos Cassius
oo 89-rodol ah ayaa gaarey
guushiisii u horeysey ee
masraxa feerka, taas oo ay
ugu xigtey 27 sano oo uu
kusoo dhex jirey feertanka.
Xataa waagii uu yaraa wuxuu
ku hamiyi jirey in uu noqdo
halyeyga feerka culus.
Guulihii uu Feerka ka gaarey
Dhallinyaranimadiisii
Cassius waxa uu u go'ay
feertanka, kaas oo ahaa waxa
keliya ee uu qaban jirey,
xaqiiqadii intii uu
dhawr-iyo-toba-jirka ahaa
weligiis ma shaqayn, laakiin
waa feertami jirey, tabar
feerka ahna wuu qaadan
jirey. Taas oo uu kaga soo
caan baxay wiilashii kale ee
da'diisa ahaa. Intii uusan
18 jir gaarin waxa uu ku
guulaystey 6 biladood oo ah
"Kentucky Golden Gloves",
2 biladood oo ah "National
Golden Gloves", 2
biladood oo ah "National
AAU". Dhawr bilood
kaddib markii ay da'diisu
gaartey 18 waxa uu ku
guulaystey biladda dahabka
ah ee Olimbiga "Olympic
Gold Medal" waqtigaas oo
ahay sannadkii 1960
tartankaasna oo lagu qabtay
Rome, Italy.
Markii uu Cassius kusoo
laabtay Louisville, oo
1960kii kamid ah hayd
koonfurta uu kala faquuqu
kajirey, waxaa loo diidey in
uu ka cunteeyo maqaaxi ku
taal magaaladaas, asagoo
markaas qoorta ay uga
ladlaadey billadii dahabka
ahayd ee uu kusoo guulaytey.
Muhammad Ali marka uu
feertameyo wuxuu ahaa mid
aad u xoog badan, waxana
lagu yaqaaney feer aad u
heer sareeya oo uu inta uu
lugaha kor ugu boodo asagoo
lugaha cayaarsiinaya uu
qofkii kasoo horjeedey feer
ku gamayo. Waxa kale oo uu
kusoo caanbaxay in uu noqday
mid had iyo jeer hadlaya oo
an hadalka kala joojinayn,
taas oo markii dambe loo
bixiyey 'Bushimihii
Louisville".
Soo Islaamiddii Muhammad
Cali Clay:
Markii uu tababarka u
qaadanayey si uu ula
feertamo ninkii aadka looga
baqi jirey ee feerka culus
horyaalka u ahaa, Sonny
Liston, ayaa Clay la kulmay
Capn Sam oo ahaa iimaam
katirsan Nation of Islam
ee masjika magaalada Miami.
Markaas ayuu Capn Sam waxa
uu is baray Clay iyo Malcolm
X oo ahaa afhayeenkii
Nation of Islam. Malcolm
iyo wiilkii dhallinta yaraa,
waa Cassius Clay'e, waxay
yeesheen xiriir wanaagsan,
sidaas ayaa Cassius uga mid
noqday Nation of Islam.
Clay waxa uu feerkii Miami
kaga caraysiiyey Sonny
Liston, waxan uu noqday
halyeyga feerka culus
sannadkii 1964. Maalintii ku
xigtey feerkaas waxa uu Clay
ku dhawaaqay in uu yahay
xubin kamid ah Nation of
Islam waxana uu
magaciisii u bedeley
"Cassius X". Taas oo xarafka
"X" u taagan yahay magac aan
la aqoon oo qarjiyo ka hor
ay ka xayuubiyeen dadkii wax
soo adoonsaday.
Arintaas magaca ah waxaa
markiiba si degdeg ah uga
jawaabey qaranka oo dhan (Maraykanka),
taas oo si xoog leh looga
horyimid. Waxaa markiiba
"Cassius X" la siiyey magaca
Muhammad Ali, waxaan
magacaas u bixiyey asaasihii
Nation of Islam oo
magaciisu ahaa Elijah
Muhammad, kaas oo iska
fogeeyey Malcolm X .
Waxaana markaas Muhammed Ali
loo sameeyey agaasime cusub
oo ahaa wiilka Elijah oo
magaciisa la oranjirey
Herbert Muhammad. Halkaas
ayuuna Muhammed Ali kasii
watey in uu cinwaankiis ka
difaacdo kaamarooyinka.
Shatigii Feerka oo Laga
Xayuubiyey:
Sannadkii 1967 waxaa cirka
isku shareeray dagaalkii
Vietnam, waxaa markaas
Muhammed Ali loogu yeeray in
uu shaqada qaran ka qayb
qaato. Ali taas wuu diidey
asagoo sheegay cudur daar
diineed awgeed in uusan
dagaalka u aadayn. Waqtigaas
wuxuu ahaa imaam Muslim ah.
Diidmadiisu waxay dhalisay
hadal ku dhegga caanka ah ee
Ali oo ah "I aint got no
quarrel with them Vietcong"
- [wax muran ah nagama
dhexeeyo anigu iyo iyaga
vietnam].
Hadal kudhegaas wuxuu
dhalliyey in dhammaan
gobolada maraykanka ay waxba
kama jiraan ka dhigeen
shatigii feerka ee Muhammad
Ali. Feerkii ugu dambeeyey
sannadkii 1967 ayaa waxaa
dhacday in ninkii la
feertamayey oo ahaa Ernie
Terrell uu ugu yeray "Clay",
markas ayaa Muhammad Ali
intuu soo boodey ku yiri "Waa
maxay magacaygu?!!"
Markaas ka dib Muhammad Ali
wax feer ah kama qayb qaadan
muddo laba sano iyo bar ah
(2 1/2). Waxaa laga
xayuubiyey biladihiisii,
waxa laga qaaday basaboorkii,
waxaa laga masaxay
shatiyadii feerka. Waxana uu
qarka u saarnaa in xabsi
5-sano ah la dhigo.
Xilligaas wuxuu Muhammad Ali
lacag ka samyn jirey hadalka
uu ka jeediyo meelaha
macHadyada ah. Waxana uu
ahaa qofkii u horeeyey oo
heerkaas qaranka joogey oo
kasoo hor jeesta dagaalkii
Vietnam.
Kusoo Laabashadii Masraxa
Feerka:
Sannadkii
1970 ayey markale Muhammad
Ali kusoo laabtay masraxa
feerka, xilligaas oo
aragtidii dagaalka ee
Vietnam isbedeleysey, waxaa
uu markaas magaalada Atlanta
kula feertmay Jerry Quarry.
Kaddib feerkii loo bixiyey 'dagaalka'
ayaa dhexmaray Muhammad Ali
iyo Joe Frazier oo ahaa
horyaalka feerka ee aan laga
guulaysan, feerkaas oo ka
dhacay barxadda loo yaqaan 'Madison
Square Garden' maalintii
ay taariikhdu ahayd March 8,
1971. Taas Muhammed Ali waa
laga guulaystey. Laakiin
bilo kadib ayuu ku
guulaystey dagaalkiisii ugu
weynaa oo ahaa in maxkamada
sare ay baabisay dembigii ku
oognaa, taasnina waxay
Muhammad Ali markale awood u
siisay in uu u safri karo
wadankii uu doono si uu uga
qayb qaato tartanada feerka
adduunka.
Dhawr feer ayaa taas ku
xigey, waxaana kamid ahaa
feertankii aan la fileyn in
Muhammad Ali looga
guuleysandoono ee Ken Norton
iyo guushii aan la fileyn in
uu Ali ka garayo Joe
Frazier. Laakiin dhammaan
feerkaasi waxay ahaayeen
kuwo hor-dhac u ah tartankii
ugu weynaa ee intii Muhammad
Ali kusoo jirey feerka, kaas
oo loo bixiyey 'gurxankii
kaynta' ee uu la yeelan
doono George Foreman oo ahaa
hormuuska feerka ee laga
biqijirey.
George Foreman oo lahaa
gacmo aad u xoogbadan oo wax
burburinaya, waxana uu ahaa
midkii sida fudud uga
guulaystey Ken Norton, isla
markaasna halka feer dhulka
kula dhigay Frazier.
Feertankii Lagu Qabtay Dalka
Zaire
Markii uu dalka Zaire
qabsaday Promoter Don King
waxa uu feeryahanada u
ballan qaaday lacag aan
horay loo maqal oo gaareysa
10 million oo dollar.
Muhammad Ali markuu uu tegey
caasimada Kinshasa, dadkii
Afrikaanka ahaa wuxuu ka
helay dhiiri gelin aad u
sareysa, aad ayaana halkaas
looga jeclaa. Marka uu
feertamayo waxay ugu
dhawaaqyeen "Ali Bomaye!" oo
ah afka reer Zaire taas oo
la macne ah "Cali ninka dil".
Muhammad Ali markii uu isu
diyaarinayey Feerkii 'gurxankii
kaynta' ee u la feertamayey
Foreman, Ali dhakhtarkiisii
wuxuu usii diyaariyey
diyaarad markiiba Ali u
qaada cusbitaal kuyaal dalka
Spain oo qaabilsan
neerfayaasha. Laakiin makaas
Ali fikrad kale ayuu
maskaxda ku haystey, taas oo
ahayd in uu garwaaqsaday in
watiga uu la feertamayo
Foreman uusan sidii hore u
ciyaari karayn, lakiin wuxuu
markiiba alifay habka loo
yaqaan 'Xariga-ku gabo inta
qofka kale tabartu ka
dhammaaneyso", taas oo
dadkii geeska Ali xigey ay
yiraahdeen 'waar Caliyood
xariga ka fuq', laakiin
Muhammad Ali arintaas wuu ku
adkaystay, toddobadii wareeg
ee u horeeyey sidaas ayuu
xarigga ugu gabanayey,
laakiin markii la gaarey
wareegii siddeedaad oo uu
Foreman daalay ayuu Ali inta
uu xarigii sidaayey uu feer
dadkii ka fajiciyey dhinaca
ugu tuuray Foreman, sidaasna
uu Ali markale ku noqday
boqorka feerka.
Sidaas ayuu Muhammad Ali ku
noqday mid feerka looga
dambeyn jirey. Mar ay feer
iskaga hor yimaadeen Leon
Spinks ayaa laga guulaystey
Ali, laakiin guushaas wuu
kasoo dhacsaday Spinks,
sidaas ayuu waqtigaas
Muhammad Ali ku noqday ninka
keliya oo taariikhda feerka
culus ku gulaystey saddex
jeer. Gabagabadii feerka
cali wuxuu ku guulaystey 56
goor, taas 37 kamid ah uu
dhinaca feer ugu tuuray
qofkii la feertameyey, 5
goor ee kalena uu si caadi
ah uga guulaystey.
Qoyska Muhammad Ali
Mudane Muhammed Ali waxaa uu
hore u soo guursaday saddex
xaas, waxana uu leeyahay
sagaal carruur ah oo kala
ah: Maryum, Rasheeda,
Jamillah, Hana, Laila,
Khaliah, Miya, Muhammad Jr.,
iyo Asaad. Xaaska Muhammad
Ali ee hadda waa Lonnie Ali
(oo loo aqoonjirey Lonnie
Williams) oo ah reer
Louisville, Kentucky. Lonnie
Ali waxay haysataa
shahaadada BA ee jaamacada
Vanderbilt University, iyo
shahadada MBA ee jaamacada
University of California,
Los Angeles. Muhammad Ali
wuxuu yaqaaney Lonnie ilaa 6
jirkeedii markaas oo
qoyskeedii usoo guureen guri
kuyaal kasoo horjeedka
gurigii qoyska Muhammad Ali.
Hadda Lonnie Ali waxay
agaasime ka tahay qorshaha
Muhammad Ali ee ah isu soo
dhoweynta iyo isfahamsiinta
dadka kala duwan,
jaaliyadaha iyo dalalka.
Ali waxaa ku dayday kumanaal
dunida dacaladeeda ah,
waxana uu dadka baray
geesinimada.
Baaqii uu Muhammad Ali Clay
usoo jeediyey Soomaalida
Shabakaad Rasmiga ah ee
Muhammad Ali:
http://www.ali.com
Waxaa qoraalkan iska
kaashaday:
Maxamuud Wardheere
Iyo Maxamed Cali (SomaliTalk)
Faafin: SomaliTalk.com | Nov
25, 2003.
Australia: 70,000 oo Ido ah
oo Loo Dhoofin Lahaa
Sacuudiga oo Lagu Quudiyey
Hilib Doofaar
Waxaa taas ka horeeyey
50,000 oo ido jirran ah oo
ay Australia lacag la'aan
kusiisay dalka Eritaria
horaantii bishan...
Guji
Singapore: 500 oo Qof ayaa
Diinta Islaamka Soo Gala
Sannadkiiba
Waxaana dadka sannadkan
kusoo islaamay Singapore
kamid ah
Guji
Algeria: Toban Kawaanle oo
Xabsiga Ladhigay Kaddib
Markii ay Iibiyeen Hilib
Dameeraad
iyo Xabsiyada Algeria oo
laga siidaayey in kabadan
3,000 oo qof maamuuska Ciida
awgeed..
Guji Nov 23
SACIID WESTING: WAA INAAN
ALLAAH UGA MAHAD CELINNAA
BISHA RAMADAAN
Siciid Westing oo ah nin
Muslim ah oo deggan Denmark
oo uu Jimcadii soo booqday
Ibraahim Saalax ayaa sheegay
in..
Guji..
.
FOGAANTA U DHEXAYSA
MAGAALOOYINKA SOOMAALIYA....
....
Copyright & Islaamku wuxuu
ka qabo.... Akhri
Daabaco
Boggan | Print
