Qoraalkaan waxaa la diyaariyey Isniin 16 Sep 2002
Waxaana la faafiyey March 18 March 2003

Bush	Sadam

Waxaa maalinba maalinta ka danbeysa isa soo taraya goodiga iyo hanjabaada Mareykanka ee ku aadan Ciraaq, mana qarsan xukuumada ka arimisa Aqalka Cad ee Mareykanka xiligan sida ay uga go’an tahay inay ku duusho Ciraaq oo xukunka ka tuurto madaxweynaha dalkaas Saddaam Xuseen, waxaana socda diyaargarowga Mareykanka ugu jiro duulaankaas, haddana Qormadan waxaan uga hadli doonaa xaalada Ciraaq oo aynu ka eegi doono dhinacyo kala duwan, si qof kastaa macluumaad buuxa uga helo sida uu yahay waaqica dalkaas Carbeed ee loo bur tumanayo, qormadan oo ah baaritaan ka soo baxay dhinacyada Siyaasadda, Degaanka, Qowmiyaaaha, Taariikhda iyo waxyaabaha ka dhalan kara hadiiba dagaalka la damacsan yahay dhaco qodobada waaweyn ee aanu ka hadleyno waxay kala yihiin:

MAAMULKA CIRAAQ EE XILLIGAN IYO SADAAM XUSEEN
BURBURINTII KACDOONADII SHIICADA IYO KURDIYIINTA
WARBIXIN KU SAABSAN MAREYKANKA
MAXAA XILIGAN LOOGU SOO BEEGAY HOWLGALKA DAGAAL EE CIRAAQ?
DIYAAR GAROWGA DHINACA HUBKA EE MAREYKANKA
MUCAARADKA CIRAAQ
Xaalada AY KU SUGAN YIHIIN MUCAARADKA CIRAAQ
YEY MASLAXAD UGU JIRTAA RIDISTA SADAAM XUSEEN?!!
TIJAABADII HORE EE MAREYKANKU KA QAADAY DOWLADAHA GOBOLKA BARIGA DHEXE
DIYAAR GAROWGA DHINACA HUBKA EE MAREYKANKA
Kala qeybsanaanta fikradaHA diiMeed
BOQORTOOYO MISE MILATERI
BURBURINTII KACDOONADII SHIICADA IYO KURDIYIINTA
BoqortooyadII HAASHIMIYADA CiraaQ
YEY MASLAXAD UGU JIRTAA RIDISTA SADAAM XUSEEN?!!
XISBIGA BACATH EE CIRAAQ
QOWMIYADAHA CIRAAQ
KURDIYIINTA CIRAAQ
KURDIYIINTA IYO DAGAALKA MAREYKANKU DAMACSAN YAHAY
SHIICADA CIRAAQ

Xarunta Gaashaandhigga Mareykanka ee Pentagon ayaa daraasad ku heysa qaabkii ay u weerari lahayd dalka Ciraaq, iyadoo ay ku soo foo leedahay howlgalkii ugu weynaa uguna qatarsanaa intii ka dambeysay dagaalkii labaad ee Dunida, kaasoo ah arrin aan horay uga dhicin Dunida casriga ah in Dowlad weyn oo awood leh ay u soo qalab qaadato inay Xukunka ka rido oo nidaam ka talinaya Dowlad kale oo ka mida kuwa soo koraya, iyadoo xoog la adeegsanayo, waxaana Pentagon-ka laga rabaa dejinta qorshaha dagaal ee lidka ku ah Ciraaq ee diyaarinta Ciidamada iyo agabkoodaba iyadoo ugu dambeyntana qorshahaasi la hor dhigayo Madaxweynaha Mareykanka Bush si uu u saxiixo.

Qorshaha Mareykanka ka leeyahay Ciraaq iyo dagaalka la filayo inuu ku qaado waxaa lagu wadaa inuu ku xirnaado hadba sida ay tahay xaalada Bariga Dhexe loona fiirsado waqti saacidaya Mareykanka si ay uga takhalusaan Sadaam Xuseen iyo kooxdiisa oo ah cadowga ugu weyn ee maanta Mareykanku leeyahay kaddib markii kooxdii Al-Qaacida ee uu hoggaaminayay Usaama Bin Laaden ay noqotay mid la baacsado oo qaab qarsoodi ah u howlgasha.

Qorshaha dagaal ee Mareykanka ayaa warar horay u soo baxay lagana helay Sirdoonka iyo ilo ku dhow dhow Saraakiisha hoggaanka dalkaasi heysa sheegeen in loogu tala galay inuu socdo 3 ilaa 4 toddobaad, iyadoo ay ka qeyb qaadanayaan Ciidamo ay tiradoodu gaareyso 200,000 Askari, waxaana marka hore qorshuhu yahay in afartaas toddobaad dhinaca Cirka duqeyn is daba joog ah loogu geysto goobaha muhiimka ah ee uu ku tiirsan yahay nidaamka Ciraaq kaddibna saddex ama afar gees oo dhinaca Dhulka ah iyadoo la adeegsanayo dalalka deriska la ah Ciraaq ay si isku mid ah Ciidamada Mareykanka iyo kuwa taageeri doona uga galaan Ciraaq, waana qorshe aan wax badan dhaamin kii Mareykanku ku qaaday Afghanistan.

Howlgalka Mareykanku ku doonayo Ciraaq inuu uga taqaluso Maamulka Sadaam Xuseen waa mid wejiyo badan leh, waxaana ku jirta in inqilaab ka dhaca gudaha dalkaasi ay Mareykanku diyaariyaan, iyadoo Ciidamada gaarka ah ee Mareykanka iyo Ingiriiska ay ka howlgelayaan goobaha aadka xasaasiga u ah sida: xarumaha hoggaaminta, Isgaarsiinta iyo Sirdoonka Ciraaq, taasoo u baahan 70,000 ilaa 80,000 Askari, kaddibna ay howlgalku la wareegayaan kooxaha Sirdoonada ah oo gudaha Ciraaq ka howlgelaya si ay meesha uga saaraan Sadaam Xuseen, Xisbigiisa Al-Bacath iyo kooxaha taageera.

Mareykanku waxa uu la kaashanayaa howlgalkiisa dagaal kooxaha mucaaradka ah ee ku kacsan Sadaam Xuseen iyo Dowladiisa sida maleeshiyada Kurdiyiinta, kooxaha mucaaradka ah ee reer Ciraaq, waxaa kaloo jira qorshe uu door bidayo Xoghayaha Gaashaandhigga Mareykanka Doland Rumsfield kaasoo ah inay toos arrinta oo dhan u galaan Ciidamada Mareykanka ee hada ku sugan Khaliijka.

Xilliga lagu soo beegay ololaha Mareykanku ku doonayo inuu ku weeraro Ciraaq ayaa ah mid aad xasaasi u ah iyo isagoo caddeystay inuu ka taqalusayo Maamulka Sadaam Xuseen, wuxuuna doortay kooxo reer Ciraaq ah oo taageera Mareykanka si marka la rido Sadaam Xuseen ay ula wareegaan Maamulka Ciraaq loogana hortago inay fowdo iyo isuma taliso ka dhacdo dalkaasi xilliga kala guurka ah, taasoo ay ka imaan karto in lagu xadgudbo aqlabiyadaha yar ee reer Ciraaq sida Shiicada reer Ciraaq iyo Turkumaanka oo dega Waqooyiga iyo bartamaha Ciraaq, waana sababta keentay inuu Mareykanku u yeero si uu kulan ula yeesho xubnaha hoggaamiya labada Xisbi ee Kurdiyiinta ah.

Dagaalka Mareykanku la damacsan yahay Ciraaq xilliga uu ku soo beegmayo ma foga balse mas’uuliyiinta Maamulka Mareykanka waxay had iyo jeer sheegaan inaan weli wax go’aan ah Madaxweyne Bush ka qaadanin arrintaasi, haddii la eegana waaqica ka jira goobaha Mareykanku joogo ee ku wareegsan Ciraaq ilaa iyo hada dhaqdhaqaaq weyn lagama dareemin marka laga reebo diyaarin dhinaca Qalabka iyo qaar yar oo Ciidamada ah gaar ahaan kuwa Makaanikada iyo Farsamayaqaanada ah ee qaabilsan dhinacyada kala duwan ee Ciidamada Mareykanka iyo waliba Markabkii Shanaad ee Diyaaradaha xambaara oo Mareykanku leeyahay oo Gobolka jooga, sidoo kalena Ciidamo kala duwan oo Mareykan ah ayaa ku sugan Badda Carbeed, tan Khaliijka, Badda cas halkaasoo ay si degdeg ah haddii loo baahdo saacado kooban gudahood ku tiigsan karaan goobo aan u dheereyn Ciraaq.

Mareykanku waxa uu sugayaa inta uu ka soo kabayo keydkiisa Rasaasta iyo Hubka ah iyadoo in badan oo ka mid ahaa loo adeegsaday dagaalkii Afghanistan gaar ahaan Gantaalada iyo Sawaariiqda Bambooyinka tuura ee shucaaca Leysarka ahi hago, howsha ugu ballaaran ee ugu horeysa ayaa ah inay baabi’iyaan nidaamka difaaca Cirka ee Ciraaq iyo xarumaha hoggaaminta Ciidamada Ciraaq si ay awooda Ciraaq u kala dhantaalaan, loogana hortago inay Ciraaq awood u yeelato weerar dhinaca Gantaalaha ah oo ay la beegsato Israa’iil.

Waxaa laga cabsi qabaa in weerarkaasi kiciyo diidmo xoog leh iyo caro weyn oo ka timaada bulsha weynta Carbeed iyo mas’uuliyiinta dalalka Carabta, iyadoo laga cabsi qabo in howlgalka Mareykanku keeno burbur iyo kala qeybsan ku yimaada Ciraaq kaddibna ay tallaabadaasi hordhac u noqoto dagaalo kale oo Mareykanka iyo Israa’iil ka qaadaan dalal kale oo Carbeed sida Suuriya iyo Lubnaan, taasoo halis weyn oo aan horay loo arag ku keeni karta dalalka Carbeed iyadoo horayba ay u jirtay shaki ah inuu Mareykanku taageerayo Suudaan oo kala go’da.

 Akhri Qaybta 2aad..... GUJI...

Waxa diyaariyay: Shariif Macallin Maxamed
shariif55@yahoo.com 
Muqdisho---Somalia 

AFEEF: Aragtida qoraalkan wa mid u gaar ah qoraaga ku saxiixan, kana tarjumi meyso aragtida SomaliTalk.com.

SAWIRADA: AP, CBC, ENCYCLOPEDIA OF THE ORIENT