|
Kaalmo loo raadinayo
Jamciyadda “Somali Cultural Watch” ee Waqooyiga London.
London oo aad dukaamada
daaqadahooda ku arkayso “Halal food” laakiin hoyga salaaduhu ay ku yaryihiin!
 Cabdulwaaxid Khaliif
cabdulwaxid@hotmail.com
July 23, 2003
Asalaamu calaykum.
|
I I D H
E H
|
|
Ilaah baa mahad leh
Caalamiinta Rabbigood ah. Nabadgelyo iyo Naxariis Nabi Muxamed dushiisa ha
ahaato.
Aayadda seddexaad ee Suurat
Al-Maa’idah oo ka hadlaysa xoolaha hilibkooda waqtiga aan la cuni karin sida
bakhtiga, tii neeftu ku dhegto (ceejin say rabto ha ahaato), tii halgaad
(wax lagu dhuftay) ku dhimata, tii meel kasoo dhacda ama ku dhacda (sida
ceel, god, IWM) iyo tii hardi ku dhimata, sidoo kale doofaarka, wixii ay
dugaagu cunaan waxa ka hara ee aan bisinka loo qaban, wixii asnaamta lagu
kor qalo, ilaa dhamaadka aayadda. Aayaddu intaysaan dhamaan waxa Ilaah ku
leeyahay, maalintan gaaladu waa ka quusteen diintiina ee ha ka baqina ee
Aniga iga baqa; maanta waxaan idiin kaamilay diintiina waxaan ku dhameeyey
nicmadayda korkiina, Islaamka ayaanan diin ahaan raali idiin ka noqday.
Ilaahay wuxuu aayadda ku soo xiray inuu qofkii gaajo darteed loo dhib geliyo
isagoon xumaan usoo banbixin uu cuni karo baqtiga xayawaanadii lasoo xusay,
Allaahna uu yahay Ilaah dambi dhaafe ah oo Naxariis badan.
Labada aayadood ee kusii
xiga waxay ka hadlayaan waxyaalo ku saabsan cuntada sida ugaarsiga lagu
ugaarsado eeyda, iyo shimbiraha iyo cuntada dadka Ehlu Kitaabka ah.
Suuradaha ugu dhaadheer oo
axkaamta aad uga hadla waxay wataan magacyo waxyaalaha dadku jecelyahay oo
ay ka mid yihiin xayaawanada cunto ahaan loo dheefsado, cunto, dumarka sida
Al-Baqarah, An-Nisaa, Al-Maa’idah, iyo Al-Ancaam. Suurat Al-Cimraan kuma
arag axkaam badan waliba iyada iyo Al-Baqrah waxay imaan doonaan aakhiro
iyagoo Qur’aanka hor kacaya
Ilaah waa Xaakim. Waa
arrintaas darteed wixii Nabi Muxamed u lahaa markii uu arkay Ansaar oo subax
salaadii masaajidkii soo buuxisay markii Abuu Cubayda oo xoolo ka keenay
Baxrayn yimid. Markuu Nabigu (SCW) waydiiyey in ay arrintaas u yimaadeen
waxay sheegeen inay saas uyimaadeen. Nabigu (SCW) wuxuu yiri bishaaraysta.
Nabigu (SCW) wuxuu sii yiri: Wallaahi inaan fakhri idiin ka baqayn ee waxaan
ka baqayaa in adduunyo la idiin fidiyo oo aad ku tartantaan sidii kuwii idin
ka horeeyey oo ku halaagsantaan. Ama sidii Nabigu (SCW) yiri. Waa xaddiis
saxiix. Bukhaari wuu wariyey.
Xaddiiskii kale ee labada
Sheekhba wariyeen markii Nabigu ka hadlayey muhiimadda ay leedahay in raggu
ay salaadaha faradka ku tukadaan masaajidaa waatii Nabigu (SCW) lahaa waxaan
damcay inaan inta xaabo dalbado oo aan qof kale dhaho salaada tuji oo u
qasdo guryaha nimanka aan jameecada imaan aan guryahooda dab saaro. Nabigu (SCW)
wuxuu ku sii daray haddii masaajidka loogu sheegi lahaa in laf hilib ku
haray ama minjo ari yaal way imaan lahaayeen.
Ilaah iyo Nabigiisu way
yaqaaneen xoolo jacaylka binu Aadamka. Abu Hurayra mar uu rabay niman suuqa
dhooban inay masaajidka aadaan wuxuu ku yiri war dhaxalkii Nabigaa (SCW)
masaajidka lagu qaybsanayaaye qaybtiinii kasoo qaata. Iyagiina masaajidkii
bay isa sii taageen iyagoo adduunyo doon ah oo aan iswaydiin in Nabigu (SCW)
maal ka tagey iyo in kale.
Ka warran haddii masaajid
la aadaaba uusan jirin? Waa wax aan qof muslim ah maskaxdiisa kusoo dhici
karin.
Waxaan xasuustaa kawaankii
hilibka ee Xamar Weyne meeshii hortiisa ahayd ee dadku tagsiyada iyo basaska
ku sugi jireen in uu mar nin indho la’ uu ka qisayn jiray. Qisooyin munkar
ah laakiin uu diin ka dhigi jiray ayaan ka xasuustaa. Marku marayo meesha
ugu fiican buu inta istaajiyo ayuu wuxuu dhihi jiray waxaan rabaa 10 nin oo
mid toban shilin isiiya. Markaasuu yiraahda yaa koow noqday oo Ilaahay saas
yeelaa, ……….. yaa shan ka dhigay oo shanta tiir oo Islaamka Ilaah waafajiyaa,
Yaa lix ka dhigay oo Lixda tiir,………, IWM. Ninkaan tuugsigiisa ayaa u darnaa.
“Halka Nabi Yuusuf markii ay labadii nin ka dalbeen inuu riyadii u fasiro
wuxuu bilaabay dacwo ah inuu Tawxiidka iyo diinta saxda ah u dhexgasho”.
Markay TV-yadu wax
xayeysiinayaan waxay sheegaan in waxa aad u baahantahay subaxii sida rumayga,
tigidhada basaska iyo tareenka “ bus Passes and travel cards” aad ku ridatid
“cereals” waa quraacdaada. Maxaa yeelay qofku quraacda ma iloobo xittaa
hadduu uu waqti u waayo waxaad maqlaysaa isagoo leh saaka ma soo quraan oo
waqti baan u waayey marna ma dhaho quraacdii baan soo ilaaway. Kawaanada
hilibka xalaasha lagu gado iyo makhaayadaha cuntada xalaasha lagu gado aad
baan ugalnaa markii qurbaha la joogo laakiin imisa jeer baan asbuucii
masaajid galnaa. Kii Jamcaha gala waa nin nasiib leh.
Marka walaalayaal
adduunyadu waa saas oo ma dayn karno laakiin waa in aan diinteenii
dhexgashanaa.
Haddii meel kasta oo
magaalooyinka waaweyn ee reer Galbeedka ay Soomaalidu ku leeyihiin kawaano,
dukaamo, carwooyin, dhar, dukaamo telefoon, IWM. Waxaa kaloo loo baahna in
la helo xarumo ay diintu leedahay.
Soomaalidu kala dadaal
badan. Maraykanka oo kale Soomaalida kheyr Allaha siiyo waxay ku dadaaleen
in ay wax ka qabtaan.
Waxaa aad loola yaabay
magaaladan London oo ka mid ah meelaha Soomaalidu ugu badan tahay lama hayo
masaajiddo badan oo Soomali. Waxaan aqaan hal mid oo inta uu qaatay
furitaankiisu lala yaabay.
Mar ay damceen Jamciyadda
“Somali Cultural Watch” in ay qabtaan shirweynahoodii labaad waxay waayeen
meeshii ay shirka ku qabsan lahaayeen. Jamciyaddu waxay ku taal waqooyiga
London. Shirkii koowaad waxaa jiray masaajid ay xor u ahaayeen oo ay waxay
rabaan ku qabsadaan laakiin nasiib darro masaajidkii waa la xiray. Waxay ku
qaadatay labo bilood inay helaan meel ay kiraystaan oo ay shirkii labaad ku
qabsadaan.
Culumadii ama ducaaddii
muxaadarada ku qornayd aad ayey uga naxeen nasiib darrada haysata Soomaalida
London. Waxay qaarkood xuseen in naloo ka baahnaa inaan leenahay TV-yo laga
soo daayo barnaamijyo diineed iska daa in la waayo mee aan ku tukanee. Waa
arrinta tan igu khasabtay inaan maanta qallinka usoo qaato.
Badanaa waxaan ka hadlaa
arrimaha Soomaaliya iyo waliba qabqablayaasha. Marka haddii dadweynaha
laftoodu gabaan howshooda waa in laga hadlaa. Hadday London u istaagi wayday
in ay dadkooda masaajid iyo xarumo usameeyaan iyagoo lacago urursanwaayey
waa in loo waydiiyaa walaalahooda kale oo waxqabsaday sida kuwa Maraykan
jooga ama Soomaaliya. Waxaa kheyr lagu farxo naqonaysa markii Soomaaliya
nalaka soo taageero.
Haddaan damco inaan hab
qabiil wax ugu uruuriyo masaajidkan waxay qaadanaysaa in tobonaan ama
labaatan waraaqood la qoro. Haddii la damco hab xisbi sidda SSDF, USC, SRRC,
SPM, ama SNM, tiri adigu waxay qaadanaysaa midii qabiilka mid ka badan.
Laakiin waxaan maanta is
iri ku habar waco hal xisbi oo la yiraahdo Xizbu-Allaahi. Ma ahan kan ka
jira Lubnaan ama Falastiin. Waa kii Ilaah ku sheegay Quraanka. Waxaan
aaminsanahay in Soomaalida badankoodu kaas ku jiraan.
Way jiraan dad kheyr badan
oo ducaad ah oo soo uruuriya lacagaha lagu dhiso masaajidda. Waxaan anigu
hadda is iri waxa laga faa’iidaysan karaa internet-ka iyo website-yada
Soomaaliyeed. Waxaan is caawin karnaa annagoo qof kasta howshiisa wato.
Soomaalidu eheladooda
gaajaysan aad bay ucaawiyaan. Ma falsafadii ahayd juuc/gaajo iyo jahannamo
kee daran? Oo ay dhihi jireen juuc/gaajaa darran. Waxaan cajalad uu leehay
Sheekh Soomaaliyeed oo caan ah ka maqlay isagoo leh markii naftu Ilaah
abuuray bay naftii Ilaah isku taagtay. Kaddib naftii Ilaah wuxuu dhex gashay
jahannamo markaasuu yiri maxaan kala nahay. Naftii waxay tiri Adna Adiga
ayaad tahay anna aniga ayaan ahay. Kaddib Ilaah naftii wuxuu dhexgashay juuc/gaajo
oo haddana ka soo saaray oo Ilaah yiri nakala sheeg. Markaasaa naftii oo is
dulaynaysaa tiri Ilaahoow Adigu Rabbigay baad tahay anna addoonkaagii baan
ahay. Haddii arrintaasi diinta ku sugnaato falsafadii Soomaalidu run bay
noqonaysaa.
Way sugantahay in uu Nabigu
gaajada uu Ilaah ka magangalay oo sida ay Abuu Daa’uud, Nasaa’i iyo Ibnu
Maajihba wariyeen laakiin waxaa cad inta Nabigu uu Ilaah ka magangalay naar
iyo jahannamo ay aad uga badantahay inta uu gaajo ka magangalay. Inteena
badan waxaan Ataxyaadka ku ducaysanaa duco aan Ilaah uga magangalayno
Jahannamo iyo cadaabta qabriga. Gaajadu duuduub waxay ugu jirtaa fitnada aan
ka ducaysano.
Waxaan shakki lahayn in
carruurteena oo gaalowda ay wax walba ka darrantahay oo aynaan ka samri
karin adduunka, aakhirana waxaan dusha saaranaynaa mas’uuliyadii ahayd
keenidooda. Laakiin hadday waddankii gaajo iskaga dhintaan waa laga samri
karaa.
Waxaan ka codsanayaa qof
kasta oo akhrista maqaalkaan oo awood u leh inuu gacan ka gaysto dhibta
haysta Soomaalida London khaasatan Waqooyigeeda, dibad ha joogo ama
waddankii ha joogee in uu gacan ka gaysto arrintaas. Haddii mashruucan
shaqeeyo waxaa kaloo la samaynkaraa in si wada jir ah looga qaybqaato
mashaariicda ku saabsan arrimahaas kheyrkaa.
Waxaan halkan kusoo qorayaa
walaalaha lagala xiriiri karo arrintaas. Iyagoo isticmaalaya magacyadooda
waxaa qofkii kheyr rabaa kusoo diri karaa xawaaladaha Soomaalida. Waxaan ka
rajaynayaa walaalaha xawilaadu inaysan “commission” ka qaadin.
Waxaa si gaar ah uga
codsanayaa asxaabta daneeya Soomaalida ee dhalinyaradu u badan ee aan hawada
iska naqaan in ay wixii karaankooda ka gaystaan kheyrkaas.
Qof kasta wuxuu heli karo
haku deeqo. Waxaan ka codsanaynaa akhyaarta Somali Cultural Watch in haddii
qolyaha xawilaadu ugu yeeraan shan shan doolar ama toban toban doolar yeysan
u qaadanin in ay naga tahay “ ninkii ceesaan kugu dhiba kaxaynteedaa lagu
dhibaa” ee sidaas ay dan naga tahay.
Maqaalka uma qorin qaabkii
fiicnaa ee dadka looga codsanjiray inay wax la baxaan iyadoo la sheegayo
ajarka iyo thawaabka Ilaah agti u yaal. Waxaan uga danleeyahay in dadka
qurbaha joogaa ee Soomalidaa markay arkaan dukaamadaas kale iyo meelaha
cuntada xalaasha lagu gado in ay xasuustaan in loo baahanyahay meel aan ku
tukano oo ilmaheenu Quraanka ka bartaan.
Waxaan filayaa in aysan i
qabanaynin maahmaahdii ahad wacdi wadaad wax isii baa u dambaysa maxaa
yeelay wadaad ma ahi, idinmana wacdin. Hadda waxaan la mid ahay qabqable leh
arrin kheyr ah haloo qumo. Marka waa in hadda ka dib maahmaahyo loo raadsho.
WABILLAAHI TOWFIIQ
Dadka aad kala xiriiri
kartaan Jamciyadaas.
1. C/Risaaq Takar Tel:
442076871923, mobile 447904045876, 447958577469 e-mail
halalza@hotmail.com
2. C/Raxmaan (Gacal)
mobile: 447960789928, 447961934373, e-mail:
gacal70@hotmail.com
3. C/Fataax Aadan. Tel:
442088008621, mobile: 447932619500 e-mail:
garlogube@hotmail.com
WQ. cabdulwaaxid Khaliif | cabdulwaxid@hotmail.com
AFEEF: Aragtida qoraalkan waxaa leh qoraaga ku
saxiixan
Faafin: SomaliTalk.com | July 23,
2003
QORAALADII HORE EE CABDULWAAXID
Wada-shaqayntu
Waa Furaha Guusha.. GUJI
| 
