Daabaco Boggan | Print

Maamulka Puntland iyo Ahlu Sunna oo ku Gacan Seyray ka Qayb Galka Shirweynaha Qaran iyo Tiigsiga Siyaasadda 2016 ee ka Furmey Muqdisho

• iyo Ra’iisul Wasaaraha Soomaaliya iyo Bankiga Islaamka oo heshiis ku kala saxiixday magaaladda Jeddah ee Boqotooyadda Sucuudiga

 Iyadoo maalintii shalay Magaalada Muqdisho uu ka Furmay Shir loogu magacdaray ka hadalka Aayaha Soomaaliya iyo arrimaha Federaalka ayaa waxaa arrintaa ka hor yimid oo qaadacay Maamul Goboleedka Puntland.Axmed Shiikh Jaamac Wasiirka Warfaafinta iyo Is gaarsiinta Maamulka Puntland oo Warbaahinta la hadlay ayaa sheegay inaan shirkaas lagala tashan isla markaana aan lagu soo wargelin qabsoomiddiisa haddii loo sheegi lahaana aysan kaba qayb gali lahayn.

Wasiirka ayaa hoosta ka Xarriiqay in gebi ahaanba ay jareen Xiriirkii wada shaqayn ee kala dhaxeeyay Xukuumadda Federaalka Soomaaliya isagoona arrintaas Saldhig uga dhigay Xukuumadda Federaalka oo daba martay Dastuurkii Federaalka Soomaaliya.

Axmed Shiikh oo hadalkiisa sii wata ayaa intaa ku daray oo ku eedeeyay Xukuumadda Federaalka Soomaaliya in ay Faragelin ku samaysey Dastuurkii federaalka Soomaaliya sidaa darteedna inta laga saxayo Dastuurka iyo Heshiisyadii kale ee ay hore u wada galeen inaysan la shaqayn doonin Xukuumadda Federaalka Soomaaliya.

Wasiirka Warfaafinta iyo Isgaarsiinta ee Maamulka Puntland ayaa ugu baaqay Xukuumadda Federaalka Soomaaliya in ay Ilaaliso Dawladnimada oo ah wax ay wada wadaagaan Umadda Soomaaliyeed sidaa darteedna looga fadhiyo Xukuumadda in ay ilaaliso wixii aan Soomaalinimada wax u dhimayn.

Hadalkan ka soo yeeray Sarkaalkaas u hadlay Maamulka Puntland ayaa imaanaya xilli muddooyinkii dambaba ay isa soo tarayeen khilaafka u dhaxeeya Dawladda Federaalka Soomaaliya iyo Maamulka uu Horseedka ka yahay Cabdiraxmaan Faroole.

Dhinaca Maamulka Ahlu Sunada Gobolada Dhexe ayaa ka hadlay Shirkii Maalintii shalay ka furmay Magaalada Muqdisho oo looga hadlay arrimaha Federaalka Soomaaliya Guddoomiyaha Guddiga Fulinta ee Ahlu Sunada Gobolada Dhexe ayaa shirkaas ku tilmaamay inuu yahay mid Fashil ku bilowdey isla markaana fashil ku dhamaanaya waa

Sheikh Axmed Ilka Case Guddoomiyaha Guddiga fulinta ee Ahlu Sunada Gobolada Dhexe ayaa farta ku fiiqay in shirkaasu yahay mid laga leeyahay dano gaar ah isl amarkaana Qodobada ka soo baxa aanay waxba ka khuseyn doonin Maamulkooda.Guddoomiyaha ayaa intaa ku daray in Shirkaasi aan lagu Casuumin Maamulkooda sidaa darteedna aysan Aqoonsanaynba gebi ahaantiisaba maadaama aan laga qayb gelin Maamulkooda.

W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk.

Wada-Tashiga Barnaamijka Higsiga Cusub “New Deal” Oo Ka Furmay Muqdisho

Muqdisho, 03, Sep, 2013.. Wasiir ku xigeenka wasaaradda maaliyadda iyo qorsheynta Soomaaliya mudane Abuukar Shiikh Cabdi Ibraahim ayaa maanta magaalada Muqdisho ka furay shirkii wada-tashiga barnaamijka Higsiga Cusub “ New Deal” oo socon doona saddex maalmood. Shirkaan ayaa waxaa ka soo qayb-galay masuuliyiin ka kala socda laamaha dowladda, xildhibaano iyo ururada bulshada rayidka ah.

Wasiir ku-xigeenka maaliyadda iyo qorshaynta qaranka ayaa ka war-bixiyey hawlaha barnaamijka Hiigsiga Cusub, isagoo sheegay in shirar wada-tashi ah horey looga sameeyey magaalooyin ay ka mid yihiin Muqdisho,Gaalkacayo,Baydhabo iyo Garoowe.

“ Ujeedada barnaamijka Hiigsiga Cusub waxa weeye in la helo talo midaysan oo lagu dhisayo dalka.Hiigsiga Cusub waxaa horey u adeegsaday dalal badan ,innaguna taasi baan daba taaganahay waxaan rajaynayaa in aan dhibaatadda kaga baxno ” sidaasi ayuu yiri Wasiir Abuukar.

Barnaamijka Higsiga Cusub oo ah aragti qaran oo midaysan, ayaa xoogga saaraya dhinacyada ay ka mid yihiin siyaasadda, nabadgelyada, caddaaladda,dhaqaalaha, ururinta canshuuraha iyo adeegga bulshada.

Xubno ka socday ururada bulshada rayidka ah oo ka hadlay furitaanka shirkan wada-tashiga ah ayaa soo dhoweeyey barnaamijka Higsiga Cusub,waxaana ay tilmaameen in barnaamijkan uu wax badan ka tarayo marxaladda uu marayo dalka Soomaaliya.

Dowladda Soomaaliya ayaa barnaamijka Hiigsiga Cusub diyaarinaysay in mudo ah si qorshe midaysan oo ay bulshadu ku leedahay talooyin loo geeyo shirka 16-ka Sabteembar ka dhacaya magaalada Brussels ee dalka Belgium-ka.

Barnaamijka Hiigsiga Cusub ayaa ah in dalalka nugul ee dagaalada ka soo baxaya la siiyo dhaqaale toos ah, waxaana dowlada Soomaaliya yeelanaysaa soo jeedinta qorshaha lagu taageerayo iyo fulintiisa. Higsiga cusub ayaa markii ugu horaysay lagu go’aamiyey shir lagu qabtay magaalada Busan ee dalka Koonfur Kuuriya dhamaadkii 2011-kii, waxaana ujeedadu ahayd in kor loo qaado waxtarka kaalmada la siiyo dalalka nugul.

DHAMAAD

Ahmed Adan

New Deal Communication Coordinator
Office of the Prime Minister

Mogadishu, Somalia

Phone: +252 (0) 616 44 00 28
Email: ahmed.adan@opm.gov.so

Ra’iisul Wasaaraha Soomaaliya iyo Bankiga Islaamka oo heshiis ku kala saxiixday magaaladda Jeddah ee Boqotooyadda Sucuudiga

Jeddah, September 2, 2013-----Wafdiga Ra’isul Wasaaraha Xukuumadda Federalka Soomaaliya Mudane Cabdi Faarax Shirdoon “Saacid” oo ku sugan magaaladda Jeddah ee Boqortooyadda Sucuudiga ayaa maanta waxaa ay Af-garad Buuxa (MOU) iyo Heshiis rasmi ahba (Agreement) ay la gaareen Bankiga Islaamka oo fadhigiisu yahay magaaladda Jeddah ee boqortooyadda dalka Sucuudiga.

Heshiiskan oo ka dhacay xarunta Bankiga Islaamka waxaa Soomaaliya u matalayay Wasiiru Dawlaha Arimaha dibadda iyo iskaashiga caalamiga ah ee Xukuumadda Federalka Soomaaliya Dr. Maxamed Nuur Gacal, halka Bankiga Islaamkana uu u saxiixay Dr. Axmed Maxamed Cali oo ah Gudoomiyaha Bankiga Islaamka.

Heshiiska Af-garad Buuxa (MOU) ee labadda dhinac ay kala saxiixdeen ayaa socon doonaa ilaa 2020, waxaana heshiiskani dhigayaa qodobada hoos ku qoran.

1. Horumarinta Adeegyadda Bulshada iyo kaabayaasha dalka

2. Wax soo saarka kala duwan ee dalka

3- Daymaha bislaaday oo dib loo eego

4-Soo noolaynta mashaariicdii hore ee bankiga islaamka uu ka fulin jiray dalka Soomaaliya

5- Tayaynta howl-qabadka Hay’adaha Dawladda

Sidoo kale heshiiskani waxaa qabyb ka ah in Bankiga islaamku uu ka shaqeeyo ururinta lacagaha kaalmadda ee Dawladaha Islaamku ay ugu tala galeen Soomaaliya, fududaynta heshiisyadda iyo adeegyadda daymaha.

Heshiiska Heshiiska dhabta ah ee dhanka kale maanta xukuumaddu ay la saxiixatay Bankiga Islaamka waa $ 35 Miliyan oo Doolar oo lagu fulin doono mashriic dag dag ah oo ay kamid yihiin Biyaha , Waxbarashada iyo horumarinta deegaanaddii ay abaaruhu ku dhufteen oo xilli kooban la bilaabi doono.

“Waxaan uga mahad-naqaynaa Bankiga Islaamka mashaariicda horumarineed ee Soomaaliya uu ka fulinayo iyo iskaashiga joogtada noqon doona ee maanta aan isku af-garannay kadib muddo dheer oo Bankigu uu xayiray kaalmooyinkii Soomaaliya, Soomaaliya waxaa ay ku socotaa dariiqii ay kusoo kaban lahayd.” Ayuu yiri Ra’iusl Wasaaraha Soomaaliya Mudane Cabdi Faarax Shirdoon “Saacid”.

Gudoomiyaha Bankiga Islaamka Dr. Axmed Maxamed Cali oo kulan gaar ah kula yeeshay Ra’isul Wasaaraha Qasriga Martida ee Boqortooyadda ayaa sheegay in xiriirka Soomaaliya iyo Bankiga islaamku uu yahay mid soo jireen ah , dibn loo fasaxyo kaalmooyinka maadaama Soomaaliya ay kusoo noqotay xasilooni 22 sano kadib , waxaana uu balan qaaday gudoomiyuhu in ay diyaar u yihiin ka qaybgalka dhismaha dalka iyo horumarinta mashaariicda kale ee horumarineed.

Ridwaan Haji Abdiwali

Afhayeenka Xukuumadda Federaalka Soomaaliya.

Jeddah, Saudia Arabia

Mobile: +966553889071

Email:ridwaanHaji@gmail.com

Faafin: SomaliTalk.com | Sept 2, 2013

Kulaabo bogga www.SomaliTalk.com © www.SomaliTalk.com