Wasaaradda Difaaca Maraykanka oo Qiratay in ay ka Dambaysey Weerarkii Lagu
Qaaday Magaalada Baraawe
iyo Shabaab oo soo Bandhigey Qalab ay sheegeen in ay ka tegeen
Ciidamada Mareykanka....
Wasaaradda Difaaca Dalka Maraykanka Qoraal ay soo Saareen ayay ku sheegeen in
Ciidamo ka tirsan kuwa Badda ee sida gaarka ah u Tababaran in ay Weerar ku
qaadeen Magaalada Baraawe ee Gobolka Shabeelaha Hoose. Saraakiil u hadashay
Wasaaraddaas ayaa sheegey in ay bar tilmaameedsanayeen Sarkaal ka tirsan
Xarakada Shabaab oo halkaa ku sugnaa.
Warkan Qoraalka ayaa lagu sheegay inaysan suurtagelin in Gacanta lagu soo dhigo
Ninkii ay Bar tilmaaedsanayeen Ciidamada Maraykanka kuwaasoo sida ay sheegeen
aysan u suurta gelin qabashada Sarkaalkaas Sare ee ka tirsan Xarakada
Shabaab.Warbixinta ayaa sidoo kale waxa ay tibaaxday in Weerar kan la mid ah
Ciidamada Maraykanku ay ku qaadeen Dalka Liibiya kaasoo sida ay Wasaaraddu
sheegtay gacanta lagu dhigay
Nin ay baadi goobayeen Muddo Toban Sana ah kaasoo lala xiriirinayay Falal
Qaraxyo oo uu qayb ka ahaa.
Weerarkii Baraawe ayaa isaguna lala xiriiriyay Weerarkii ka dhacay Xarunta
Westgate laba Todobaad ka hor taasoo ay ku dhinteen illaa 67 qof. Si kastaba
Xarakada Shabaab ayaa goor sii horeysey sheegtay in ay iska caabiyeen Weerarkii
ay soo qaadeen Rag Caddaan ah in kastoo ay ku sheegtay in Weerarkaasi ay soo
qaadeen Ciidamada Ingiriiska iyo Turkiga, taasoo labadaas Xukuumadoodna ay iska
Beri yeeleen.
Dhinaca kale Sida ay ku soo waramayaan Dadka Degmada Baraawe Deggan ayaa
sheegaya in Maamulka Degmadaasi ee Xarakada Shabaab baandow ay ku soo rogeen,
gebi ahaanba waxaa la Xiray Goobihii Ganacsiga ee Magaalada sidoo kalena waxaa
Yaraaday dhaq Dhaqaaqii Dadkii iyadoona la arkayay Ciidamada Shabaabka oo
Magaalada dhex roondeynayay.
Ciidamada Shabaab ayaa sidoo kale waxa ay dibadda u soo saareen Gaadiidkooda
loo yaqaano Tiknikada kuwaasoo ku wareegayay Waddooyinka Magaalada Baraawe.
Dadka Reer Baraawe ayaa dareen cabsi leh la soo dersay ka gadaal markii ay
arkeen dhaqdhaqaaqii ay sameynayeen Ciidamada Xarakada Shabaab ee halkaa ku
sugan.
Waxaa kale oo ay Xarakadda Shabaab soo Bandhigeen Qalabkii ay sheegeen in
Ciidamada Mareykanka ay halkaas kaga tageen kuwaa isugu jira Bambaanooyin,
Rasaas, Qalab wax lagu hago iyo Qalabka Caafimaadka , waxaana soo bandhigistaan
daawanayey dad fara badan oo ku nool Magaalada Baraawe .
W//D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Baarlamaanka Soomaaliya oo tacsi u diray Ehellada dadkii ku dhintay
Xeebaha Dalka Talyaaniga …WARSAXAAFADEED
Baarlamaanka Federaalka Soomaaliya ayaa tacsi u diray ehellada dadka
tahriibayaasha ahaa ee ku dhintay xeebaha Jasiiradda Lampadusa ee Dalka
Talyaaniga. Gudoomiyaha Golaha Shacabka Mudane Maxamed Sheekh Cusmaan Jawaari ayaa
yiri “ Ugu horeyn anigoo ku hadlaya magaceyga,magaca Gudoonka Baarlamaanka
iyo Xildhibaannada Golaha Shacabka waxaan halkaan doonayaa inaan Tacsi uga
diro ehellada dadkii Soomaaliyeed ee ku geeriyooday xeebaha Jasiiradda
Lampadusa ee dalka Talyaaniga, waxaan Alle uga baryayaa inuu naxariistiisa
jano siiyo,ehelladoodana samir iyo iimaan ka siiyo” “Sidoo kale waxaan tacsi u dirayaa dowladaha ayaguna dadkooda ay ku
geeriyoodeen shilkaasi dooni oo ay wada socdeen dhalinyaradii Soomaaliyeed
ee iyagu naftooda halkaasi ku waayey, ficillada noocaan ah iyo kuwo kale
oo horey u dhacayba waxey muujinayaan inaanay aheyn wax haboon ama
wanaagsan in qofka bani’aadamka ah uu naftiisa ku hogaamiyo khatar tan la
mid ah”ayuu hadalkiisa sii raaciyey Mudane Maxamed Sheekh Cusmaan Jawaari
Gudoomiyaha Baarlamaanka Federaalka Soomaaliya. Ugu dambeyntii Gudoomiyaha Golaha Shacabka ayaa fariin gaar ah u diray
dhalinyarada Soomaaliyeed waxaana uu yiri “walaalayaal,dhalinyarada
Soomaaliyeed waxaan leeyahay waxaad tihiin Mustaqbalka wadankan halka aad
kaga hamineysaan tahriib amaba uu idiin gelayo damac xun oo aad naftiina
Qatar ku hogaamin laheydeen waa inaad maanka ku heysaan inaad tihiin
madaxda dalkan ee berrito,marka ku fekera inaad ka qeybqaadataan hormarka
dalkiina iyo sida aad mustaqbalkiina u dhisan laheyden. ---DHAMAAD---
Xafiiska Warfaafinta iyo Xiriirka Dadweynaha Ee Gudoomiyaha Baarlamaanka Media & Public Relation Office Of Speaker Email:- Media@parliament.gov.so
Faafin: SomaliTalk.com | Oct 6, 2013
|