Xafladii Jubbaland State of Somalia ee Minneapolis, ee gobolka MN
Waxaa maalintidii Sabtidii ee ay taariikhdu ahayd 05/25/2013 lagu qabtay
Hotelka wayn ee la yiraahdo Mariotte City Center ee ku yaala magaalada
Minneapolis, ee gobolka Minnesota xaflad wayn oo soo qaban qaabiyeen jaaliyada
Soomaaliyeed ee reer Minnesota, ee dalka Maraykanka. Xafladaas oo isugu imaadeen
dad gaaraaya ilaa iyo labo kun oo qof "2000 oo ruux" sida dadka xaflada soo
qaban qaabiyey ee cadeeyeen.
Xafladaan lagu xusaayey dowlad goboleedka Jubbaland oo ay ka hadleen
hogaamiyeyaasha jaaliyadda, aqoonyahano, waxgarad, culimo rag iyo dumarba iskugu
jira. Sidoo kale waxaa ka hadlay halkaas dadka laga soo doorto deegaanada ay
degan yihiin Soomaalida ee magaagalada Minneapolis, ee gobolka MM. Dadka la soo
doortay oo halkaa ka hadlay waxaa ka mida ahaa:
1 - Don Cohen,
2 - Mike Andrew, Minneapolis City Council/mayor Candidate
3 - Don Samuel, Minneapolis City Council/mayor Candidate
4 - Ken Winton,
5 - Diane Hoffstad Minneapolis City Council
6 - Diane Loefflor MN state representative from NE
7 - Liv Walananski Minneapolis park-board
8 - Iyo Abdi Warsame oo ah nin Soomaali ah oo u taagan doorashada City Council
ee magaalada Minneapolis ee hadii la doorto loobadinaayo in uu noqdo ninkii
labaad ee Somali ah ee xil dowladeed loo doorto.
Dhamaan
dadka laga soo doorto xaafadaha ay Somalida u badan tahay oo halkaa ugu
bogaadiyey jaaliyadda Soomaaliyeed guud ahaan, gaar ahaana dadka reer
Jubbooyinka arinta ku saabsan guusha ay dadka reer Jubbaland ku talaabsadeen oo
ah mid ay wax ka yaqaaniin madaama dalkoodu, "waa dalka Maraykankee", uu
isticmaalaan dowlad ku dhisan habka Federaaliga ah. Sidoo kale waxay ku
bogaadiyeen in sida ay wadanka ay dhalashada ka qaateen ay ugu muuqdaan ay sidoo
kale ugu muuqdaan, waxna u taraan dhulkoodi hooyo. Inkastoo dadkii Soomaaliyeed
ee halkaa isugu yimid ay aad ugu riyaaqayn markii ay arkeen dadkii ay doorteen
oo la qaybsanaaya farxadda dowlad goboleedka Jubbaland ee haatan la samayey,
hadana dadkii halkaa isugu yimid ayaa aad ugu xumaadeen in martiqaad loo fidiyey
mid ka mida State Representativeka laga soo doorto meelaha ay degaan Soomaalida
oo aan martiqaadkaasi aqbalin. Dadka qaar ayaa isla dhexmarayey in tiro sadex
jeer ah oo marti qaad loo fidiyey uu masuulkaas uuna aqbalin.
Sidoo kale halkaa waxaa ka hadlay oday dhaqmeedyada ka soo jeeda gobolada Gedo,
Jubbada hoose iyo Jubbada dhexe, halkaas oo ka cad in xafladaan loogu dhamaan -
dhamaan dadka ka soo jeeda Jubbaland State of Somalia. Ugu danbayntii khadka la
iska arko ee loo yaqaan skypeka, ayaa waxaa qudbad qaymo iyo qaayo leh ka soo
jeediyey Madaxwaynaha Jubbaland, waxaa uu dadka xasuusiyey in Jubbaland State of
Somalia ay tahay dowlad goboleed ka tirsan Somalia, isla markaana ay diyaar u
tahay in ay la shaqayso dowlada Federaalka ee Soomaaliyeed sida dowlad
goboleedyada kale.
Madaxwayn Ahmed Islam oo markii uu qudbadii dhameeyey halkaa ugu jeediyey mahad
celin iyo bogaadin dadkii xaflada ka soo qaybgalay, isoogoo khadka la iska arko
ee skypeka ka arkayey dadka tirada badan ee halkaa isugu yimid si ay u xusaan
dowlad goboleedka Jubbaland ee taariikhiga ah.
-
Sawirada Halkan ka daawo
Waxaa qoray: Mohamed Barre - Junlay oo wax ka qora arimaha Soomaalida ee
gobolka Minnesota, ee dalka Maraykanka - email junlay99@aol.com.
Faafin: SomaliTalk.com | May 26, 2013
|