Ra’iisal Wasaaraha iyo wafdigii uu hogaaminayay oo ka degay Degmada Cadaado,
si diirana loogu soo dhoweeyey
 Cadaado,
March 6, 2013-----Ra’iisal Wasaaraha iyo wafdigisii uu hogaaminayay ayaa galabta
gaaray magaalada Cadaado ee xarunta maamulka Ximan iyo Xeeb iyaga oo ka soo
kicitimay magaalada Caabduwaaq ee isla gobolka Galgaduud.
Wafdiga Ra’iisal Wasaaraha oo uu ka mid yahay guddoomiye kuxigeenka koowaad ee
Baarlamaanka Mudane Jeylaani Nuur Iikar, iyo xubno ka tirsan labada gole ee
Baarlamaanka iyo Xukuumada, ayaa waxaa si diiran ugu soo dhoweeyay madaxda
maamulka Ximan iyo Xeeb oo uu ugu horeeyey Madaxweynaha Maamulka Mudane Maxamed
Xasan Tiicey iyo dadweyne fara badan kuwaasoo sacab iyo mashxarad ku soo
dhoweeyey xubnaha wafdiga.
Ra’iisal Wasaaraha oo la hadlay shacabka reer Cadaado ayaa ugu hambalyeeyey soo
dhoweynta aan loo kala harin, wuxuuna ammaanay sida ay amnigooda u sugteen una
horumarsadeen degaankooda oo in ka badan 20 sano aan helin taageerada Dowlad
rasmi ah.
“Waxaan idiinkaga mahadcelineynaa sida diiran ee aad noo soo dhoweyseen” ayuu
yiri Ra’iisal Wasaaraha oo mar kale u hambalyeeyey madaxweynaha maamulka Ximan
iyo Xeeb iyo goleyaashiisa sida ay maamul wanaaga ugu muujiyeen shacabka ayna u
horumariyeen degaanka.
Dhanka kale, maamulka Ximan iyo Xeeb ayaa ka codsaday wafdiga Ra’iisal Wasaaraha
in la jiheeyo maleeshiyooyin ka tanaasulay Burcad badeednimo iyo kooxaha nabad
diidka, loona abuuro shaqooyin ay ka mid yihiin kalluumeysi, iyadoo oo Ra’iisal
Wasaaruhuna u balan qaaday in loo abuuri doono shaqooyin lagana taakuleyn doono
dhinacyada Amniga, Waxbarashada iyo horumarinta Adeega bulshada.
Ugu dambeyntiina, wafdiga ayaa ka soo dhoofay galabta casar liiqii degmada
Cadaado iyaga oo dib ugu soo laabtay magaalada Muqdisho. Waxaana safarkani uu
qaatay muddo saddex cisho ah, isaga oo maray degmooyinka Dhuusamareeb,
Caabudwaaq iyo Cadaado waxaana mudadaasi lagu dhisay maamulo degmooyin iyo
degaano, iyadoo heshiis taariikhi ah ay wada gaareen Dowladda Federaalka
Soomaaliya iyo Ahlu sunna Waljamaaca oo ku heshiiyay in wixii haatan ka dambeeya
ay Ahlu sunna si buuxda ugu biirtay Dowladda una hoos imaaneyso.
--
Garad Salad Hersi
Press officer
Mogadishu, Somalia
Faafin: SomaliTalk.com | March 7, 2013
|
Daabaco
Boggan | Print
