FIFA oo Jabuuti Tababar ugu Furtay Garsoorayaal Soomaaliyeed oo Kubadda
Cagta ah
Tababar dhinaca Garsoorka ah noociisuna yahay FIFA MA ayaa ,Magaalada
Jabuuti uga furmay 28 Garsoore oo ka tirsan xiriirka Soomaaliyeed ee kubada
cagta, waxaana tababarkani uu qeyb ka yahay dadaal si wada jir ah ay u
sameynayaan ururka kubada cagta aduunka ee FIFA iyo xiriirka Soomaaliyeed ee
kubada cagta loogana gol leeyahay in xaga garsoorka Soomaaliya looga horumariyo.
Munaasabada furitaanka ayaa waxaa ka qeyb galay madax kala duwan oo ay ka mid
yihiin guddoomiyaha xiriirka Cali Saciid Guuleed, xoghayaha guud Cabdi Qani
Saciid Carab, guddoomiye ku xigeenka xiriirka kubada cagta Jabuuti Maxamed
Yaasiin, Guddoomiyaha guddiga tartamada xirirka Soomaaliyeed Cali Cabdi Maxamed
(Cali shiine) iyo madax kjale
 Madaxa
Xafiiska waxbarashada xiriirka Soomaaliyeed ee kubada cagta Cali Maxamed Axmed
oo ugu horeyn munaasabada furitaanka ka hadlay ayaa sheegay in xiriirku uu waqti
badan iyo dadaal geliyay sidii uu tababarka u geyn lahaa garsooreyaal da’ yar
arrintaasna lagu guuleystay maanta.
“Halkan waxaa ku sugan Garsooreyaal tayo wanaagsan oo ka kooban kuwo dhalinyaro
ah oo heer qaran ah iyo kuwo heer caalami ah taasi waxaa ay muujineysaa sida
xiriirka ay uga go’an tahay in uu horumarka garsoorka hoos kasoo bilaabo”ayuu
yiri madaxa xafiiska wax barashada xiriirka Soomaaliyeed Cali maxamed Axmed.
Guddoomiye ku xigeenka 1-aad ee xiriirka kubada cagta dalka Jabuuti Maxamed
Yaasiin oo isna goobta ka hadlay ayaa kusoo dhaweeyay garsooreyaasha
Soomaaliyeed dalkiisa isaagoo sheegay in Jabuuti aanay ku ahayn marti ama dad
ajaanib ah laakin ay joogaan dalkoodii labaad.
“Waan ogahay in badankiin aad ogtihiin in Jabuuti dalkiinii tahay laakin kuwa
aan wali horay halkan u imaan ayaan u sheegayaa”ayuu yiri guddoomiye ku xigeenka
xiriirka kubada cagta dalka Jabuuti Maxamed Yaasiin.
Xoghayaha guud ee xiriirka Soomaaliyeed ee kubada cagta Cabdi Qani Saciid Carab
ayaa sheegay in xiriirku uu waligiisba ahmiyada koowaad siinayay dhanka
horumarinta Garsoorka, maadaamabuu yiri Garsoorku uu laf dhabar u yahay inta
badan howlaha xiriirku qabto.
“Anigoo ku hadlaya macaga xiriirka kubada cagta Soomaaliyeed waxaan uga
mahadcelinayaa ururka FIFA dadaalkiisa aan dhamaadka lahayn ee Soomaaliya
gaarsiiyay horumar la taaban karo FIFA waxay sameysay wax kasta oo karaankeeda
ah oo ka hor joogsaday kubad cagta Soomaaliya in ay bur burto, isku daygaas
wanaagsana waa lagu guuleystay sababtoo ah Soomaaliya caalamka kale ayay la
socotay muddo ka badan 22 sanadood oo dalku soo dhex dabaasahay dagaalo sokeeye
kuwii ugu xumaa iyo sharci darro dunida soo maray”ayuu xoghayaha guud ka sheegay
munaasabadii furitaanka tababarkan maanta.
Waxaa uu sidoo kale xoghayaha guud amaan usoo jeediyay dowlada, madaxda xiriirka
kubada cagta iyo dhamaan shacabka Jabuuti oo uu sheegay intii karaankooda ah in
ay garab istaageen walaalohooda Soomaaliyeed.
Dhankiisa Ahmed El Shenawi oo wakiil ka ah xafiiska horumarinta garsoorka FIFA
ee magaalada Qaahira ayaa ku amaanay xiriirka Soomaaliyeed in uu sameeyay dadaal
dheeri ah marka loo eego xaga horumarinta garsoorka. “Anigoo ku hadlaya magaca
FIFA waxaan aad ugu faraxsan yahay garsooreyaasha da’da yar qaab dhismeedka
jirkooduna wanaagsan yahay oo maanta horteyda ka muuqanaya”ayuu munaasabada ka
sheegay Ahmed El Shenawi.
Dhamaan Madaxdii goobta ku sugyenyd, garsooreyaasha tababarka u fadhiya iyo
saxafiyiintii meesha u yimid in ay tababarka kasoo waramaan ayaa la istaagay
sacab kadib markii Ahmed El Shenawi uu ku dhawaaqay in FIFA qorsheyneyso
tababarka sanadka soo socda in ay ku qabato caasimada Soomaaliya ee Muqdisho
hadii xaalada amaan ee dalku ay sii horumarto.
Guddoomiyaha xiriirka Soomaaliyeed ee kubaqda cagta Cali Saciid Guuleed Rooble
ayaa ku amaanay waaxda horumarinta Gasoorka soo diyaarinta dhalinyarada aadka u
da’da yar. “Waxaan idinku boorinayaa in aad muujisaa dadaal dheeri ah iyo u
go’doomid shaqadiina mudada tababarku soconayo, ka qeyb gal xumo iyo in aaan si
fiican loogu dhaga nuglaan casharka macalimiintu bixinayaan waxaa ay idin keeni
karaan dhibcihiina oo hoos u dhaca ama macalimiinta oo idinka xanaaqa”ayuu
garsooreyaasha u sheegay gudoomiyuhu ka hor intii aanu ku dhawaaqin furitaanka
tababarka.
Tababarkan oo socon doona muddo 5 maalmood ah ayaa waxaa macalin ka ah Lim Kee
Chong oo uu kaalinayo Boubakar Hanshi, halka Madaxa xafiiska wabarashada
xiriirka Cali Maxamed Axmed uu isu duwe ka yahay tababarka oo sidoo kale Madaxa
xafiiska horumarinta Garsoorka Cabdi Cabdulle Axmed (baasaale) uu caawin doono
macalimiinta FIFA mudada tabbarku soconayo.
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | March 5, 2013
| 
Daabaco
Boggan | Print
