Ra'iisul Wasaaraha iyo wafdigiisa oo si weyn loogu soo dhoweeyey Kismaayo,
lana kulmay maamulka magaalada
Kismaayo,
March 26,2013-------Ra'iisal Wasaaraha Xukuumada Federaalka Soomaaliya Mudane
Cabdi Faarax Shirdoon Saacid iyo wafdi ballaaran oo uu hogaaminayo ayaa maanta
soo gaaray magaalada Kismaayo ee xarunta gobolka J/hoose, waxaana wafdiga
garoonka ku soo dhoweeyey saraakiisha maamulka kumeelgaarka ah ee Kismaayo iyo
xubnihii horay u sii joogay magaalada ee isugu jiray Wasiirada, xidlhibaanada
iyo saraakiisha.
Ra'iisal Wasaaraha ayaa markii uu soo degay waxa uu salaan ka qaatay ciidamo ka
tirsan kuwa dowladda isaga oo sidoo kalena gacan qaaday qaar ka mid ah
dadweynihii soo dhoweynayay oo ay ku jiraan ardayd, iyo haween.
Ra'iisal Wasaaraha iyo xubnaha Wasiirada ah ee safarkiisa ku wehlilya ayaa kulan
ballaaran la qaatay saraakiisha maamulka magaalada Kismaayo waxaana hogaaminayay
Axmed Maxamed (Madoobe).
Kulankan oo soconayay muddo saacad ah ayaa lagu lafa guray sidii loo dardargelin
lahaa sugidda amniga ee magaalada, iyo hagaajinta maamulka, waxayna labada
dhinac is dhaafsadeen fikrado muhiim ah.
Ra'iisal Wasaare Saacid oo markii uu soo gabagaboobay kulankan la hadlay
warbaahinta ayaa sheegay inay ku farxeen soo dhoweynta reer Kismaayo, isaga oo u
mahadceliyay ciidamada dowladda iyo kuwa AMISOM sidii ay isaga kaashadeen sugida
amniga.
"Runtii waxaa ii muuqatay in dadku ay doonayaan dowladooda, raalina ka yihiin,
waana uga mahadcelineynaa sida diiran ee ay noo soo dhoweeyeen" ayuu yiri
R.wasaaraha oo xusay in booqashadan ay qeyb ka tahay booqashooyin uu ku kala
bixinayay gobolada dalka.
"Reer Kismaayo waxay safka hore kaga jiraan dadka jecel dowladnimada" ayuu mar
kale yiri Ra'iisal Wasaaraha.
Axmed Maxamed Madoobe oo ah guddoomiyaha maamulka kumeel gaarka ah ee Kismaayo
ayaa isna sheegay inay ku faraxsan yihiin booqashada wafdigan ballaaran ee ka
kooban Wasiirada, Xildhibaanada iyo saraakiisha
"Aadbaan ugu faraxsanahay imaatinka wafdiga Ra'iisal Wasaaraha waana soo
dhoweyneynaa isaga iyo madaxda kale ee sharafta leh ee la socota, waxaana
leenahay ku soo dhowaada Kismaayo" ayuu yiri Axmed Madoobe.
Ra'iisal Wasaaraha iyo wafdiga ayaa inta ay joogaan magaalada Kismaayo waxay
kulamo is daba joog ah la qaadan doonaan maamulka magaalada, iyo qeybaha kale ee
bulshada Kismaayo.
![](kismayo1.jpg)
--
Garad Salad Hersi
Press officer
Kismayo, Somalia
Gudoomiyaha Baarlamaanka Oo Tacsi U Diray Wasiirudowlaha Wasaaradda
Hormarinta Iyo Adeegga Bulshada….WARSAXAAFADEED
Gudoomiyaha Baarlamaanka Federaalka Soomaaliya Mudane Maxamed Sheekh Cismaan
Jawaari ayaa tacsi tiiraanyo leh u diray Allaha u naxariistee Xildhibaan
Maxamuud Ismaaciil Barqadle oo sidoo kale ahaa Wasiirudowlaha Wasaaradda
Hormarinta iyo Adeegga Bulshada Xukuumadda Soomaaliya oo ku geeriyooday
magaalada Mombasa ee dalka Kenya.
Mudane Maxamed Cismaan Jawaari Gudoomiyaha Baarlamaanka Dalka ayaa yiri “INAA
LILAAHI WA INAA ILEYHI RAAJICUUN, aad iyo aad waxaan uga xunnahay geerida
naxdinta leh ee ku timid walaalkeen Xildhibaan Maxamuud Ismaaciil Barqadle oo ka
mid ahaa Golaha Shacabka sidoo kalena ahaa Wasiirudowlaha Wasaaradda Hormarinta
iyo Adeegga Bulshada “
Gudoomiyaha Golaha Shacabka ayaa uga tacsiyadeeyey ehelada,qaraabada,asxaabta,
xildhibaannada Golaha Shacabka iyo guud ahaanba shacbiga Soomaaliyeed geerida ku
timid Alle ha u naxariistee Xildhibaan Maxamuud Ismaaciil Barqadle waxaana uu
Alle uga baryey inuu naxariistiisa jano siiyo, sidoo kalena uu guud ahaanba
umadda Soomaaliyeed samir iyo iimaan ka siiyo.
Ugu dambeyntii Gudoomiyaha Baarlamaanka ayaa shaaca ka qaaday in Baarlamaanka uu
gudi u saaray qabanqaabada aas Qaran oo loo sameeyo Alle ha unaxariistee
Xildhibaan Maxamuud Ismaaciil Barqadle.
-----DHAMAAD-----
Xafiiska Warfaafinta Gudoomiyaha Baarlamaanka
Faafin: SomaliTalk.com | March 26, 2013
|