Xaaladda Caafimaad ee Xabsiga Dhexe ee Magaalada Muqdisho oo si weyn Laga
Deyrinayo
Waxaa ku xiran in ka badasn 2 kun oo Maxbuus
Xabsiga Dhexe ee Magaalada Muqdisho ayaa xiligan waxa uu yahay mid la Ciir
Ciiraya Maxaabiis aad u fara badan oo tiradoodu ay gaarayso illaa Laba kun oo
Maxbuus.Xaaladan Buux Dhaafka ah ee Xabsiga ayaa waxa ay keentay in halkaasi uu
ka dillaaco Cudurka Shuban Biyoodka isla markaana uu cudurkaasi u dhinto mid ka
mid ahaa Maxaabiista halkaa ku xiran.
Taliyaha Ciidanka Asluubta Xasan Xuseen Cusmaan oo shir jaraa’id ku qabtay
xaruntaas ayaa sheegay in Maxaabiistu aad u fara badan tahay xabsigana uu noqday
midka keliya ee haatan qaban kara Maxaabiista la soo Xukumo ama kuwa Xukun
sugayaasha ah.
Gen. Cusmaan ayaa hoosta ka xarriiqay in Dhulkii ay lahayd Hay’adda Asluubta
haatan ay qaarkood burbureen halka qaar kalena ay deggan yihiin Dad Rayid ah
taasoo shaqadii Ciidanka oo dhan isugu ururtay Xarunta Xabsiga dhexe ee
Magaalada Muqdisho.
Taliyaha ayaa mar uu ka hadlayay xaaladda caafimaad ee xiligan ka jirta halkaas
sheegay in ay jirto Xaalad Nafaqo darro iyo xiliga oo ah Bishii Maarso oo
Xiliyada ugu kulul ah taasina ay sababtay in illaa afar ruux oo maxaabiista ka
mid ah uu soo rito Cudurka Shuban Biyoodka haatana Isbitaalada lagu dabiibayo.
Taliyaha ayaa baaq u diray Hay’adaha caalamka iyo dawladda Federaalka Soomaaliya
isagoona ugu baaqay in gargaar deg deg ah lala soo gaaro Maxaabiista Jeylkaas ku
Xiran isla markaana wax laga qabto Xaaladda Caafimaad darro ee haatan ka jirta
Xabsigaas.
Gen. Xuseen Xasan Cusmaan ayaa dhinaca kale baaq u diray dad weynaha degan
Xarumihii Ciidanka Asluubta isagoona uga baaqay in ay baneeyaan xarumahaas si
dib u dhis loogu sameeyo isla markaana hawlaha Ciidanka halkaa loogu qabto.Si
kastaba xabsiga dhexe ee magaalada Muqdisho ayaa waxaa iminka ku xiran Maxaabiis
aad u fara badan iyadoo xabsigaasi qudhiisu uu yahay mid gaboobay una baahan in
wax badan laga bedelo.
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | March 13, 2013
| 
Daabaco
Boggan | Print
