Qaar ka mid ah Macaamiisha Shirkadda Central Air oo Ka Cabanaya Dib u Dhacyo
Dhowr ah oo Duulimaadkii Diyaaradda Shirkaddaas ku Yimid.
 Shirkadda
Diyaaradda Central Air oo ka mid ah Shirkadaha adeegyada Bulshada ka Fuliya
Gudaha Dalka kana mid ah Shirkadihii dhawaan ka hawl bilaabay Duulimaadyada
Gudaha ayaa durbaba waxa ay kasbatay Macaamiil fara badan.Shirkaddan oo ay u
shaqayso Hal Diyaarad ayaa waxa ay safaro ku tagtaa qaybo ka mid ah Gobolada
dalka sida gobolada dhaca Koofurta iyo Bartamaha Soomaaliya taasoo Todobaadkii
samaysa illaa Afar Duulimaad oo Gobolada dalka ah.
Shirkadda oo hawl gashay Dabayaaqadii Sanadkii aynu soo dhaafnay ayaa durbaba
waxa ay la kulantay kufaa Kac iyadoona dhowr mar oo kala duwan ay ku yimaadeen
baaqashooyin ku dhacay safaro ay hore u qoondeysey ka gadaal markii ay sheegteen
Cudur daaro dhowr ah.
Shirakadda Central Air ayaa waxa maalin walba oo Isniin ah ay sameysaa Duulimaad
Muqdisho Baydhaba Baydhaba Muqdisho ah iyo Muqdisha ka qaada Rakaab u badan Dad
dhinaca Qurbaha ka yimid kuwaasoo dhibsanayay maritaanka Wadada Isku Xirta
Muqdisho iyo Baydhabo ee dhinaca Dhulka ah ka gadaal markii dhibaatooyin kala
duwan laga sheegay.
Shirkadda Centaral Air ayaa muddo gaaban ku kasbatay Macaash fara badan iyo
Macaamiil si joogta u adeegsada Diyaaradaas kuna xisaabtama Duulimaadka ay ku
tagto Magaalada Baydhabo halkaasoo soo noqodkeeduna ay ka soo rarto Badeecooyin
u badan Tubaakada oo dakhli fara badan uu ka soo galo.
Shirkadda ayaa iminka u muuqanaysa mid sii luminaysa Kalsoonida Macaamiisheeda
sida ay noo sheegeen qaar ka mid ah Rakaab maanta ku qornaa oo markii ay
Airborka Muqdisho yimaadeen loo sheegay in safarkii Diyaaraddaasu uu Maanta
baaqday hase yeeshee uu baxayo maalinta Berri ah.
Laba ka mid ah Rakaabkaas oo aan kula kulmay Garoonka Diyaaradaha caalamiga ee
Magaalada Muqdisho xilli ay dib ugu laabanayeen Degaanadooda ayaa ka gaabsaday
in Magacooda Saxaafdda loo adeegsado iyadoona wajiyadooda laga dheehan karay
Caro aad u fara badan oo ay u hayaan Shirkadda iyo maamulkeeda.
Mid ka mid ah Dadkii aan la kulmay ayaa farta ku goday in tani la yaab aysan
ahayn balse marar hore oo badan sidan oo kale ay dhacday isagoona intaa sii
raaciyay haddii shirkaddu sidan ay ku sii socoto in ay waayin doonto macaamiil
fara badan.
Xiriir aan la samaynayay si aan wax badan uga ogaano falalkan shirkadda ku soo
noq noqday ayaanay noo suurta gelin inaan dhinaca khadka ku helno. Si kastaba ma
aha markii u horeeyay oo Safar Diyaaradda Centaral Air ah uu baaqdo iyadoo ayna
isa soo tarayaanCabashada ka soo yeereysa macaamiisha Shirkaddaas oo waayadan
dambe aan la dhacsanayn dhaqanadan ay la soo soo baxday Shirkadda .
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | March 12, 2013
| 
Daabaco
Boggan | Print
