Daabaco Boggan | Print

Madaxweynaha Oo Ka Qeybgalay Munaasabad Casho Sharaf Uu Gudoomiyaha Baarlamaanka U Sameeyey Xildhibaannada Ka Kala Socda Puntland Iyo Galmudug “SAWIRRO”

Ka hor casho sharafta uu Gudoomiyaha Baarlamaanka u sameeyey wafdigan ka socday maamul goboleedyada Puntland iyo Galmudug waxey si wadajir ah kulan ula qaateen Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo Gudoomiyaha Baarlamaanka Mudane Maxamed Sheekh Cismaan Jawaari wafdiga Baarlamaannada ah ee ay kala hogaaminayeen Gudoomiyeyaasha Baarlamaannada Puntland iyo Galmudug oo iyagu Madaxda sare ee Dalka uga waramay xaaladaha hormarineed ee ka jira labada maamul.

Kulankaasi kadib ayaa waxaa guriga Martida ee magaalada Muqdisho ka bilaabatay casho sharaf uu Gudoomiyaha Baarlamaanka Soomaaliya u sameeyey wafdiga ka kala socda Baarlamaannada Puntland iyo Galmudug ayadoo casho sharaftanna ay sidoo kale kasoo qeybgaleen Xildhibaanno ka tirsan Baarlamaanka Federaalka Soomaaliya.

Ugu horeyn Gudoomiyaha Baarlamaanka Federaalka Soomaaliya Mudane Maxamed Sheekh Cismaan Jawaari oo ka hadlay Munaasabadda casho sharafta ah ayaa uga mahad celiyey Gudoomiyeyaasha Baarlamaannada Puntland iyo Galmudug sida ay ugasoo jawaabeen casuumaad uu u fidiyey Gudoonka Baarlamaanka Soomaaliya oo la xiriirta iney Gudoomiyeyaashan kasoo qeybgalaan xeritaanka Kalfadhiga Labaad ee Baarlamaanka.

Gudoomiyaha Baarlamaanka maamul goboleedka Soomaaliyeed ee Puntland Mudane C/rashiid Maxamed Xirsi oo isaguna ka hadlay Munaasabadda casho sharafta ah ayaa uga mahad celiyey Gudoomiyaha Baarlamaanka sida sharafta leh ee ay u marti qaadkaan ugu fidiyeen hogaanka Baarlamaannada maamul goboleedyada Dalka ka jira waxaana uu talaabadan lagu casuumay ku tilmaamay mid muujineysa in Baarlamaanka Soomaaliya uu ku dhaqmayo habka Federaalka.

Sidoo kale Gudoomiyaha Baarlamaanka maamul goboleedka Galmudug Mudane Xasan Maxamed Heyl oo isaguna ka hadlay Munaasabadda casho sharafta ah ayaa dhankiisa ka mahad celiyey marti qaadka loo sameeyey wafdiga ay kala hogaaminayaan Gudoomiyeyaasha Baarlamaannada Puntland iyo Galmudug waxaana uu ammaanay sida ay xiligan Baarlamaanka Federaalka Soomaaliya u muujiyeen isbedelka dowladnimo ee dalka ka hanaqaaday.

Casho sharaftan uu caawa Gudoonka Baarlamaanka Federaalka Soomaaliya u sameeyey Wafdigan ka socday Baarlamaannada maamul goboleedyada Puntland iyo Galmudug ayaa kusoo gebageboowday jawi wanaagsan waxaana imaanshaha wafdigan uu ka dambeeyey kadib markii uu Gudoonka Baarlamaanka ku marti qaaday iney kasoo qeybgalaan xeritaanka kalfadhiga Labaad ee Baarlamaanka.

---DHAMAAD---

Xafiiska Warfaafinta iyo Xiriirka Dadweynaha Ee Gudoomiyaha Baarlamaanka

Gudoomiyaha Baarlamaanka Oo Xafiiska Ku Qaabilay Gudoomiyeyaasha Baarlamaannada Puntland Iyo Galmudug “SAWIRRO”

Gudoomiyaha Baarlamaanka Jamhuuriyadda Federaalka Soomaaliya Mudane Maxamed Sheekh Cismaan Jawaari ayaa maanta xafiiska ku qaabilay Gudoomiyeyaasha Baarlamaannada Puntland iyo Galmudug oo maalinnimadii shalay aheyd soo gaaray magaalada Muqdisho.

Ugu horeyn Gudoomiyaha Baarlamaanka Soomaaliya Mudane Maxamed Sheekh Cismaan Jawaari ayaa uga mahad celiyey Gudoomiyeyaasha Baarlamaannada maamul goboleedyada Puntland iyo Galmudug sida ay ugusoo jawaabeen marti qaadka uu Baarlamaanka Soomaaliya u sameeyey waxaana mahad celintaasi kadib uu Gudoomiyuu ka dhageystay gudoomiyeyaasha Baarlamaannada labada maamul goboleed sida ay howlahooda u socdaan.

Gudoomiyaha Baarlamaanka maamul goboleedka Soomaaliyeed ee Puntland Mudane C/rashiid Maxamed Xirsi oo kulanka ka hadlay ayaa ka warbixiyey sida ay u socdaan shaqooyinka Baarlamaanka Puntland waxaana uu xusay in howlaha Baarlamaanka Puntland ay hada kuwo u socda si wanaagsan waxaana uu dhanka kale Mudane C/rashiid Maxamed Xirsi uu tilmaamay in ay aad ula dhacsanyihiin sida xiligan uu u shaqeynayo Baarlamaanka Federaalka Soomaaliya.

Sidoo kale Gudoomiyaha Baarlamaanka maamul goboleedka Galmudug Mudane Xasan Maxamed Hey loo isaguna dhankiisa kulanka ka hadlay ayaa si lamid ah ka warbixiyey sida uu xiligan u shaqeeyo Baarlamaanka Galmudug oo uu tilmaamay iney dhowaan doorteen Madaxweynaha maamulkaasi, dhinaca kalena waxa uu soo dhaweeyey hormarrada sii kordhaya ee uu ku talaabsanayo Baarlamaanka Federaalka Soomaaliya.

Gudoomiiyeyaasha Baarlamaannada maamul goboleedyada Puntland iyo Galmudug ayaa shalay soo gaaray magaalada Muqdisho waxaana ayaga oo ay wehliyaan Xildhibaanno ka kala tirsan Baarlamaannada labada maamul goboleed ay Muqdisho ku yimaadeen casuumaad uu u fidiyey Gudoonka Baarlamaanka Federaalka Soomaaliya.

Wafdigan caawa waxa ay casho sharaf la qaadan doonaan Gudoomiyaha Baarlamaanka Federaalka Soomaaliya Mudane Maxamed Sheekh Cismaan Jawaari ayadoo casho sharaftaasina ay kasoo qeybgali doonaan Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo Ra’isulwasaaraha Dalka Mudane Cabdi Faarax Shirdoon (Saacid).

---DHAMAAD---

Xafiiska Warfaafinta iyo Xiriirka Dadweynaha ee Gudoomiyaha Baarlamaanka

Faafin: SomaliTalk.com | June 30, 2013

Kulaabo bogga www.SomaliTalk.com © www.SomaliTalk.com