Ra’iisal Wasaaraha oo soo dhaweeyay go'aanka Qaramadda Midoobay ay ku
taageertay dadaalka dawladdu ugu jirto xasilinta Jubboyinka*
 Ra'iisal
Wasaaraha Xukuumada Federaaliga ah ee Soomaaliya Cabdi Faarax Shirdoon "Saacid"
ayaa si weyn u soo dhaweeyay go'aanka Golaha Amaanka ee Qaramada Midoobay ay ku
taageereen doorka dawladda ee ku aadan xasilinta dalka.
Warbixintan ayaa Golaha Amaanku ka soo saareen xaalada Jubboyinka iyo xasilinta
dalka guud ahaan, kadib markii uu golaha u warbixiyay Kaaliyaha Xoghayaha Guud
ee QM mudane Taye-Brooke Zerihoun. Waxayna golaha qoraalkan ku cadeeyay sida ay
uga walaacsan yihiin xaalada amniga ee Jubbooyinka. Ayagoo dhanka kalena goluhu
muujiyeen inay taageerayaan dadaalka dawladda Soomaaliyeed ay ku doonayso inay
gobolada Jubooyinka ku xasiliso ayadoo ka duulaysa go'aamadii IGAD isla markaana
kaashanaysa xafiiska UNSOM.
Golaha Amaanka ayaa warbixintan ku sheegay sida ay bulshada caalamka uga go'an
tahay inay tilaabo ka qaadaan cid kasta oo hor-istaagta ama caqabad ku noqota
xasilinta iyo dib-u heshiisiinta Soomaaliya.
"Waxaan si weyn u soo dhaweynaynaa warka ka soo baxay QM ee ay ku muujiyeen
taageeradooda iyo sida ay u garab-taagan yihiin hawsha dib-u heshiisiinta iyo
federaalaynta ee ay dawladdu hormuudka ka tahay," ayuu yiri Ra'iisal Wasaaruhu.
Ra'iisal Wasaaraha ayaa Golaha Amaanka ee QM uga mahad-celiyay doorkooda suuban
ee ay ku taageerayaan nabadaynta dalka iyo sida ay go'aanka cad uga qaateen cid
kasta oo caqabad ku ah xasilinta dalka.
"Waxaan Golaha Amaanka uga mahad naqayaa mawqifka cad ee ay nagala qaateen kuwa
caqabada ku ah dib-u heshiisiinta iyo nabadeynta dalka, gaar ahaan masiirka
gobolada Jubbooyinka," ayuu yiri Ra'iisal Wasaaraha oo intaas ku daray in xalka
Jubooyinka iyo dalka intiisa kalaba uusan ku jirin qori caaradiis ee xalku ku
jiro wada xaajood iyo in la helo isku tanaasul bulshada dhexdeedaa.
DHAMAAD
FG Tifaftiraha:
Warbixintii QM halka ka daalaco:
http://www.un.org/News/Press/docs//2013/sc11032.doc.htm
Ahmed Adan
Prime Minister’s Media Office
Mogadishu, Somalia
Email: media@opm.gov.so
Mobile: +252 (0) 616 440 028
Faafin: SomaliTalk.com | June 15, 2013
|
Daabaco
Boggan | Print
