Daabaco Boggan | Print

Kulan looga Hadlaya Nabadda iyo Isdhexgalka Bulshada oo lagu soo Gabagabeeyey Magaalada Jowhar ee Gobolka Shabeelada Dhexe

Ururka u Dooda Xuquuqda Dhalinyarada ayaa ku qabtay Magaalada Jowhar kulan ballaaran oo looga hadlayay is dhex galka Bulshada, qaabka Dhalinyarada uga qeyb qaadan karaan Nabada, iyadoo kulankan lagu Abaalmariyay Kooxihii ka qeyb galay Tartan Isboorti oo Todobaadkan ka socday Magaalada.

Waxaa kasoo qeyb galay inta badan qeybaha Bulshada iyadoo ay joogeen Mas'uuliyiinta Gobolka oo uu ka mid ahaa ku Simaha Maamulka G/Sh./Dhexe Yusuf Jaalle, Gudoomiyaha Degmada Jowhar ahna Duqa Degmada Maxamed Amiin, Taliyaha Guutada 1 aad ee Ciidmaada Jeneral Maxamed Maxamuud Saney, Cisman Axmed Rooble oo ka tirsan Mas'uuliyiinta SYAO, Gudoomiyaha Olombikada Gobolka Shongole, Gudomiyaha Haweenka Gobolka Maamo Madyan iyo Marti sharaf kale.

Dhamaan Haweenkii, Dhalinyaradii iyo Mas'uuliyiintii ka soo qeyb gashay ayaa muujiyay Muhiimada ay u leedahay bulshada kulamada isdhexgalka bulshada iyagoo SYAO uga Mahadceliyay Abaabulka iyo qabashada kulamada noocaan oo kale ah.

Ku simaha Maamulka Gobolka Yusuf Cabdi C/lle (Yusuf Jaalle) oo Madasha hadalo ka jeediyay ayaa ugu horeyn SYAO u jeediyay Mahadcelin ku aadan kulanka iyo diyaarinta abaalmarinada, waxa uuna sheegay inuu garab taagan yahay dhalinyarada iyo wax qabadkooda si nabada iyo isdhexgalka ay uga wada shaqeeyaan.

Maxamed Amiin X. Cusman ( Caqiil ) Gudoomiyaha Degmada Jowhar ahna duqa Magaalada oo isna hadalo ka jeediyay kulanka ayaa sheegay in Dhalinyarada laga doonayo iney noqdaan kuwo Nabada dhiirigaliya oo si hufan uga shaqeeya, isagoo xusay inay hada meel wanaagsan marayo Barnaamijka deriseynta, oo lagu xoojinayo Nabada ka jirta magaalada.
Taliyaha Guutada 1-aad gaaska 1-aad Ganeral Maxamed Maxamud Saney ayaa sheegay in SYAO ay mudan tahay in la Abaalmariyo maadaama ay qeyb weyn ka qaataan dhiiri galinta Nabadda iyo Dalinyarada.

Gudoomiyaha Olombikada Gobolka Maxamed Khalaf Adan Shongole oo isagu si aad ah isugu soo duway tartanka ayaa sheegay in ciyaartoyda laga doonayo ciyaarida kubada si Nabad galyo ah, waxa uuna SYAO uga mahadceliyay sida ay uga gacan siisay qalabka isboortiga iyo hadiyadaha loogu talagalay kooxaha.

Mudane Cismaan Ahmed Rooble oo ka tirsan Mas'uuliyiinta SYAO oo ka hadlay kulanka isugu jiray Abaalmarinada Kooxihii tartanka ka qeyb galay iyo ka wada tashiga Nabada iyo iska warqabka bulshada iyo maamulka ayaa waxa uu goobta ka balan qaaday in SYAO ay sii wadi doonto howlaha lagu hormarinaayo Nabada Gobolka.

Sidoo Kale Maamo Xaliimo Madyan oo goobta ka jeedisay kalmado u badnaa soo jeedin ku aadaney kordhinta tartamada noocaan oo kale ah iyo in maamulka oo xil iska saaro dowladana la kaashado ka shaqeynta wadooyinka magaalada soo gala oo bur bursan meelo fog fogna laga soo wareegsado.

Dhinaca kale soo gaba gabaynta tartanka ka sakoow waxaa iyana halkaasi ka dhacday dood aad u xiisa badnayd oo dhex nartay dhallinyaradii ka soo qayb gashay xiritaanka cayaarahaasi, kuwaasi oo si aad ah uga wada hadlayay arimo ku aadan isdhexgalka Bulshada iyo sida looga shaqeyn karo amaanka Gobolka iskagana war qabi karaan Maamulka iyo Bulshada Gobolka Sh/ Dhexe.

Gabagabadii kulanka ayaa waxaa goobta ka hadlay Dhalinyaradii kulanka lagu casuumay iyagoo sheegay in ay dalbanaayan in maamulka ka shaqeeyo badinta tartamada iyo dhisida garoomada si isdhexgalka loo xoojiyo. Goobta ayaa lagu abaalmariyay Bilado, Koobab Qalab isboorti Kooxihii kaalmaha galay iyo dhamaan Ciyaartoydii qeybta ka ahaa tartanka inta uu socday iyo dhamaan intii qeybta ka eheyd suurta galinta Tartankii Todobaadka socday.

W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk

Faafin: SomaliTalk.com | June 8, 2013

Kulaabo bogga www.SomaliTalk.com © www.SomaliTalk.com