Daabaco Boggan | Print

Madaxweynaha Soomaaliya “Ciidamada Kenya Soomaaliya uma Imaan In qabsadaan ee waxay u yimaadeen in ay Nabad ku soo Dabaalaan”

Madaxweynaha Dawladda Federaalka Soomaaliya Xasan Shiikh Maxamuud oo iminka booqasho ku jooga Magaalada Yokohama ee dalka Jabaan ayaa waxaa uu halkaa kulan kula qaatay Madaxweyne ku Xigeenka Kiinya William Ruto Labada Mas’uul ayaa ka wada hadlay Xiriirka labada Dal iyo Mugdiga waayahan dambe soo kala dhex galay gaar ahaana Arrimaha Gobolada Jubbooyinka oo Ciidamada Kiinyaanka ee halkaa ku sugan lagu Eedeeyay arrtimo ay ka mid yihiin Xayiraad ay Ciidamada Kiinyaanku ku rogeen wufuud ka socotay Xukuumadda Federaalka Soomaaliya.

Madaxweyne Xasan Shiikh ayaa Sheegay in CiidamadaKkiinyaanku wax badan ka qabteen Xaaladda Gobolada Gedo iyo Jubbooyinka isla markaana Xukuumadda Soomaaliya ay ogsoon tahay Doorka Ciidamada Kenya ee Sugidda ammaanka Goboladaas. Madaxweynaha ayaa farta ku fiiqay in Kiinya Ciidamadoodu Naftooda ay u Hureen sidii Nabad iyo Xasilooni loogu soo Dabbaali lahaa Degaanadii ay ka saareen Dagaalyahanadii Xarakada Shabaab welina ay u taagan yihiin sidii ay Soomaaliya cagaheeda isugu taagi lahayd.

Xasan Shiikh ayaa hoosta ka Xarriiqay in Kenya ay ka bixi doonto Dalka halkaasna aysan u imaan inay qabsato balse ay jiraan Dad War Xuma Tashiil ah oo Dicaayado ka faafiyay Ciidamada Kiinyaanka.Madaxweyne Xasan Shiikh ayaa beeniyay Jiritaanka in Xukuumaddu Magaalada kismaayo u soo dirtay Ciidamo Hubaysan si Dagaal ay ugu qaadaan Magaalada KIsmaayo ee halkaa ku sugan arrimahaas oo dhamaantooda ku sheegay been abuur iyo Dicaayado laga sameynayo arrimaha Magaalada Kismaayo.

William Ruto oo isaguna halkaa ka hadlay ayaa Madaxweynaha ku raacay in Kiinya marnaba aysan dooneyn inay qabsato Dhul Soomaali leedahay isla markaana ay ku shaqaynayso Waqtiga Amisom marka xiligaas la gaarana ay isaga bixi doonaan Gobolada ay Soomaaliya kaga sugan yihiin sida Magaalada Kismaayo iyo Degaanada kale ee ay Ciidamadoodu joogaan.

Madaxweyne ku Xigeenka Kiinya ayaa qeexaya sababta dhabta ah ee ay Dalka Soomaaliya u soo galeen isagoona hoosta ka xarriiqay in ay tahay Nabadgelyodarro Hareysey labada Dal isagoona farta si gaar ah ugu fiiqay sida uu Dhaqaalaha Dalkaasi u Wiiqmay tan iyo markii Dagaalyahanada Xarakada Shabaab ay bilaabeen in Gudaha ay u soo galaan Dalka Kiinya oo ay ka geystaan Falal Amaadaro ah .

W/D Amiin Yuusuf Khasaaro

E-Mail amiinkhasaaro@hotmail.co.uk

E-Mail amiinkhasaaro@yahoo.co.uk

Faafin: SomaliTalk.com | June 2, 2013

Madaxweynaha Somalia oo la kulmay Madaxweyne Ku xigeenka Kenya iyo wafuud kale

Yokohama, 01 June 2013 – Madaxweynaha Jamhuuriyadda Federaalka Soomaaliya Mudane Xasan Sheekh Maxamud oo ka qeybgalaya shirka TICAD V ee ka socda magaalada Yokohama ee dalka Japan ayaa waxuu kulamo gooni gooni ah la yeeshey mas’uuliyiin ay ka mid yihiin Madaxweyne Ku xigeenka Kenya, Madaxa Bankiga Adduunka, Madaxa UNICEF, iyo mas’uuliyiin kale.

Waxaa maanta magaalada Yokohama ka furmay shirkii caalamiga ahaa ee TICAD kiisa shanaad oo ay madaxda dalalka Africa uga qeybgalayeen. Shirkan ayaa Dowladda Japan 5tii sanaba mar u qabata dalalka Africa iyadoo lagu xoojinayo xiriirka Africa iyo Japan.

Madaxweynaha Jamhuuriyadda Federaalka Soomaaliya Mudane Xasan Sheekh Maxamud ayaa kulan gaar ah la qaatay Madaxweyne ku xigeenka Kenya Willaim Ruto oo ay ka wada hadleen arrimo dhowr ah oo ay ka mid yihiin arrimaha qaxootiga, Kismaayo, iyo arrimaha amniga. Labada mas’uul ayaa si wanaagsan isagu afgartay dhammaan arrimihii ay ka wada hadleen iskuna raacay in shir caalami ah lagu qabto Nairobi oo ay labada dowladood iyo Qaramada Midoobey wada shir guddoominayaan iyadoo looga hadlayo sidii Soomaalida qaxootiga ku jooga Kenya ay dalkoodii hooyo dib ugu soo laaban lahaayeen iyadoo Qaramada Midoobey laga sugayo inay qaxootigaas nolol wanaagsan ugu sameeyaan dalka gudihiisa. Labada mas’uul waxey ka wada hadleen oo kale arrimaha Kismaayo oo labada Wasiir Arrimo Dibedeed ay Nairobi ku hareen si ay isula meel dhigaan arrimaha amniga xuduudaha. Labada Wasiir (Fowzia iyo Amina) ayaa maanta shir jar’aaid ku wada qabtay Nairobi soona bandhigay in labada dowladood ay isku raaceen in guddi wadajir ah ay ka wada shaqeeyaan sidii arrimaha amniga xuduudaha xal waara loogu heli lahaa iyo soo xoojinta xiriirka taariikhiga ah ee labada dal. Waxaana la rajeynayaa in labada madaxweyne ay dhowaan kulmaan si loo sii ambaqaado kulamadoodi hore ee Addis Ababa iyo Mombasa.

Madaxweynaha ayaa sidoo kale kulamo gaar gaar a la yeeshay madaxa Bankiga Aduunka Jim Yong Kim oo ay ka wada hadleen arrimo ay ka mid ahaayeen sidii Bankiga Adduunka uu Soomaaliya uga saacidi lahaa maamulka iyo maareynta maaliyadda, sidii Somalia deymaha lagu leeyahay looga cafin lahaa si shacabka Soomaaliyeed ay u helaan mashaariic horumarineed oo uu bankiga Adduunka hirgeliyo.

Ugu danbeyntii Madaxweynaha Somalia waxuu kulan la qaatay Anthony Lake, Madaxa UNICEF iyo Erthurin Cousin, oo ah madaxa WFP. Madaxweynahu waxuu kala hadlay sidii hay’adahaas ay si toos ah ula shaqeyn lahaayeen dowladda iyo qeybaheeda kala duwan.

- DHAMAAD –



Abdirahman Omar Osman (Eng. Yarisow)

Senior Advisor & Spokesperson

Office of the President of Somalia
 

Kulaabo bogga www.SomaliTalk.com © www.SomaliTalk.com