Cabdiqaasin Salaad Xasan oo Markii u Horeeyay ka Hadlay Xaaladda ka taagan
Magaalada Kismaayo ee Jubada Hoose
Madaxweynihii hore ee Somaliya cabdiqaasin Salaad Xasan oo iminka ku sugan
magaalada Qaahira ee Waddanka Masar oo waraysi siiyay Idaacadda VOAda laanteeda
Afka Soomaaliga ayaa ka hadlay arrimo fara badan oo ay ka mid tahay Xaaladda
Gobolada Jubbooyinka.
 Ugu horeynba Cabdiqaasim ayaa
shacabka Soomaaliyeed ugu yeeray in ay Xukuumadda Soomaaliya ay taageeraan isla
markaana ay la shaqeeyaan maadaama Dawladani aysan ahayn ku meel gaar isla
markaana ay ku socoto hanaanka dib u Heshiisiinta iyo dib u Dhiska Dalka.
Madaxweynihii hore ayaa sheegay in haatan uu dhamaaday xiligii ku meel gaarka oo
ay soo bilowdey Dawladdii uu isaga Madaxweynaha ka ahaa illaa laga soo gaaray
Dawladdan Maanta uu Madaxweynaha ka yahay Xasan Shiikh Maxamuud.
Cabdiqaasim ayaa ka hadlay faragelinta Ciidamada shisheeye ee Dalka isagoona
sheegay in marnaba faragelin shisheeye aysan soo kordhinayn wax wanaag ah loo
baahan yahay in Soomaalidu ay arrimaheeda iyadu ka arrinsato wixii khilaafaad ah
ee jirana lagu dhameeyo wada hadal.
Madaxweynihii hore ee Soomaaliya ayaa soo hadal qaaday Xarakada Shabaab oo uu
sheegay in ay yihiin dad Soomaali ah loona baahan yahay in ay qaataan heshiiska
Nabadda kana soo laabtaan Dagaalka ay dalka ka hurinayaan.
Mar wax laga weydiiyay arrimaha Jubbland ayuu Cabdiqaasim sheegay in Jubada
Hoose ay tahay Dhul Soomaaliyeed kan jooga Hargeysa, Baydhabo, Mudug iyo meel
walba oo Soomaali ah in ay wax ku leeyihiin Goboladaas laakiinse uu taageersan
yahay in Maamul Goboleedyada loo Madax baneeyo in ay samaystaan dadka
Degaanadaas u dhashay ama deggan.
Madaxweynihii hore ee Soomaaliya ayaa taageeray Maamul ay yeeshaan Gobolada
dalka oo dhan gaar ahaana maamulka jubbaland ay ku dhisteen maamulkooda.Ugu
dambayntii ayuu Cabdiqaasin Xukuumadda Federaalka u soo jeediyay in Maamulka
Jubba land lagu taageero sidii uu u dhismi lahaa isla markaana uga mid ahaan
lahaa maamul Goboleedyada kale ee Dalka ka jira.
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | June 1, 2013
| 
Daabaco
Boggan | Print
