Ra’iisul wasaaraha ayaa maanta daah-furay qorshe wax looga qabanayo
Amaanka Muqdisho
- iyo Ra’iisul Wasaare Saacid oo Booqdey halka lagu Hayo Shiikh Xasan
Daahir Aweys
- iyo Ra’iisul Wasaarah oo boqday dakadda iyo garoonka diyaradaha ee
Muqdisho
Muqdisho, 04, July, 2013….Ra’iisul Wasaaraha Xukuumadda Federaalka ah ee
Soomaaliya mudane Cabdi Faarax Shirdoon ( Saacid) oo ay wehliyaan xubno ka
tirsan golaha wasiirada, Gudoomiyaha gobolka banaadir, Taliyayaasha ciidamada,
iyo gudoomiyeyaasha degmooyinka gobolka banaadir ayaa si rasmi ah u furay
barnaamij mudo laga soo shaqaynayey oo lagu xoojinayo amaanka caasimadda.
Ra’iisul Wasaaraha ayaa sheegay in dowladu todobadii bilood ee ugu danbaysay ay
wax weyn ka qabatay amniga,walow ay jireen falal amniga lagu wax yeelaynayo oo
dhacay,
“Dawladu waxay mudnaanta kobaad iyo tan labaadba siisay amaanka, waxaana nala
soo weeraray maalin cad, dagaalka na haystana waa mid caalami ah, dagaalka
lugula jiro nabad diidku waa inuu noqdo mid balaaran oo laga wada qayb qaato,
Todobadii bilood ee ugu danbaysay amaanka waxaan galinay waqti badan balse
kamaanaan bad baadin qaraxyo iyo dilal” ayuu yiri Ra’iisul Wasaaruhu
“Xukuumadu waxay balan qaadaysaa in ay ciidamda Booliska ay helaan
mushaaradkooda si joogta ah laga bilaabo bishaan. Waxay sidoo kale helayaan
gunooyin iyo raashin, mana noqon doono mushaarkaas mid ay Hay’ado bixiyaan.
Waxaa kale oo dawladu diyaarisay dhamaan agabayadii ay ku howl gali lahaayeen
ciidamadu, lixda bilood ee soo socota waxaan ku rajo weynahay in caasimada
amaankeeda uu noqdo mid ka wanaagsan meesha uu maanta taagan yahay” ayuu yiri
Ra’iisul Wasaaruhu isagoon dhanka kalana xusay in qorshahaan hada la bilaabayo
ay dadweynuhu ka qaataan kaalin mug leh,
Dhanka kale, Gudoomiyaha gobolka banaadir Maxamud Axmed Nuur Tarsan ayaa ka
hadlay qaabka ugu haboon oo amniga caasimada lagu xoojin karo, iyo sida looga
gudbi karo caqabadaha soo noq noqday ee khatarta ku ah amniga Muqdisho
“Dhamaan degmooyinka gobolka waxaan ka bilownay darisayn, waxaana ilaa hada lagu
guulaystay 14 degmo, dhamaan waxaa laysku xirayaa qaybaha kala duwan ee bulshada,
markii aan soo dhamaystirno barnaamijkaan darisaynta ah, waxaan rajo fiican ka
qabnaa in si buuxda loo soo celiyo amniga magaalda” ayuu yiri mudane Tarsan oo
dhanka kalana xusay in caasimada Soomaaliya ay ka amaan fiican tahay caasimadaha
Baqdaad iyo Kaabuul, balse la sheego in Muqdisho ka khatar badan tahay, taasna
ay sabab u tahay hubka faraha badan ee lagu dhex wato.
Wasiirka Arrimaha gudaha iyo Amniga Qaranka mudane Cabdikariin Xusein Guuleed
ayaa dhankiisa sheegay in labadii munaasabadood ee qaranimadda Soomaaliya ay
dowladu ka hortagtay in amaanka la waxyeeleeyo.
“Hadii aysan jirin bulsho ku xiran gudoomiyayasha degmooyinka iyo taliyayaasha
kala duwan way adagtahay in amaanka wax laga qabto, waana in la dhiso guddi amni
oo heer degmo ah, markii gobolka Banaadir uu soo dhamaystiro barnaamijka
darisaynta ayaan u samaynaynaa qorshe wax looga qabanayo nabad ku soo dabaalida
caasimada.
Ugu danbayntii Ra’iisul wasaaraha ayaa sheegay in uu jiro qorsha kale oo loogu
magac daray Shabeel, kaas oo ay xukuumaddu dhamaystirtay, dowladuna ay dhawaan
daah furi doonto, qorshaana ayaa Ra’iisul Wasaaruhu ku macneeyey inuu noqon doon
mid guud ahaan looga xoraynayo kooxaha nabad diidka ah dalka, si ay gobolada
isugu furmaan dadkuna u helaan nabad galyo taam ah.
DHAMAAD
Xafiiska warbaahinta
Xafiiska Ra'iisal Wasaaraha
Muqdisho, Soomaaliya
Email: media@opm.gov.so
Ra’iisul Wasaarah oo boqday dakadda iyo garoonka diyaradaha ee Muqdisho
 Muqdisho, July 03,
2013.......Ra’iisul Wasaaraha Xukuumadda Federaalka Soomaaliya mudane Cabdi
Faarax Shirdoon (Saacid) oo ay weheliyaan Wasiirka Maliyada iyo Qorsheynta
Qaranka mudane Maxamud Xasan Suleymaan, Waiirka Howlaha Guud iyo Dakaddaha
mudane Muxiyadiin Maxamed Kalmooy, iyo Wasiir Ku-xigenka Warfaafinta, Boostadda,
Isgarsinta iyo Gaadiiddka Cabdishakuur mudane Cali Mire ayaa booqday meelo ay ka
mid yihiin dakadda iyo Garoonka diyaradaha ee Muqdishu.
Ra’iisul Wasaaraha iyo wasiirada ayaa markii ay booqdeen goobahaan ayaa waxaa
hanaanka shaqo uga warbixiyay hawl-wadeenada dawladda oo u sharaxay hanaanka
shaqo iyo isbadalada ay ku tilaabsadeen si kor loogu qaado wax-soosaarka illaha
dhaqaalha dalka. Dhanka kalana waxay ka uga warbixiyeen baahida ay dekeddu u
qabto dib-u-habayn iyo in la sii casriyeeyo.
Mudadii uu Ra’iisul Wasaaruhu kormerayay dekadda waxda uu guddaha u galay
hoolasha ama baqkhaarada lagu dajiyo waxyabaha ka soo daga Ddekedda, wuxuuna soo
indho-indheeyay maraakiibta ku xirtan dekadda iyo baraha ay ku soo xirtaan oo
qalab casri ah lagu soo kordhiyay dhawaan lana suurto galiyay inay ku soo
xirataan marakibta ku wooda sida kunteenarada waa-weyn.
Ra’iisul Wasaaraha ayaa waxa uu sheegay in ay dawladdu iska xil saarayso
horumarinta dekeda, iyo sidii shaqadeeda loo si laba jibaari lahaa, lona heli
laha dakaddo kale dalka ka saacida in dhoofku kobco. Waxaana uu dhanka kale uga
mahad naqay mamulka iyo shaqalaha sida wanagsan ee ay howshooda u guteen, asagoo
farta ku fiiqay in uu jiro kor u kac dhanka lacagaha ka soo xarooda dakadda
Muqdisho.
"Dhawaan waxaan ku rajo weynahay inaan suurto galino in hawlaha dakaddu si weyn
u kobcaan. Waan casriyaynaynaa dekadda hawl ahaan iyo qalab ahaanba," ayuu yiri
Ra'iisal Wasaaraha oo la hadlaya hawl-wadeenadii dakedda Muqdisho.
Dhanka kale Ra’iisul Wasaaraha iyo wafdiga dawladdu waxay sidoo kale soo
kormeren garoonka diyaradaha ee Muqdisho ee Aadan-cade, waxayna soo indha in
dheyen qeybaha kala duwan ee garonka oo ey ka mid yihiin qeyba dulista iyo
sadasha hawada iyo waliba qeybta maliyada. Mudaddii ay ku guda jireen kormeerka
gagida dayuuradaha waxay sidoo kale dhagaysteen warbixino la xariira shaqada iyo
hawlaha la xariira nidaamka socdaalka dalka.
Ra'iisal Wasaaraha ayaa booqashadiisan ku tilmaamay mid lagu dar-dar galinayo
habsani u socodka hawlaha illaha daqaalaha dalka ee ay ugu horeeyaan dekadda iyo
garoonka Muqdisho. Waxaana uu hawl-wadeenadii dhamaantood kula dar-daarmay inay
dareemaan masuuliyada qaran ee saaran asagoo xusay in dawladdu si buuxda ulla
socoto shaqada ka socota labada goobood.
"Waa muhiim in aad masuuliyad dheeri ah isa saartaan kana dhawrsataan wax kasta
oo curyaamin kara hawsha qaran ee aad haysaa," ayuu kula dar-daarmay Ra'iisal
Wasaaruhu shaqaalihii iyo masuuliyiintii labada goobood.
DHAMAAD
Ahmed Adan
Xawiiska Warbaahinta Ra'iisal Wasaaraha
Muqdisho, Soomaaliya
Email: media@opm.gov.so
Ra’iisul Wasaare Saacid oo Booqdey halka lagu Hayo Shiikh Xasan Daahir
Aweys
Ra’iisul Wasaaraha Xukuumadda Federaalka Soomaaliya Cabdi faarax Shirddoon ayaa
maanta kulan waxaa uu la qaatay Saraakiisha Ciidamada Ammaanka iyo Maamulka
Gobolka Banaadir, kulankaas oo ka dhacay Xarunta Nabad Sugidda ee Magaalada
Muqdisho.
Ra’iisul Wasaaraha ayaa kulankaas kaddib waxa uu la hadlay raga wararka dira
isagoona faahfaahin dheeraad ah ka bixiyay arrimihii kulanka Maanta looga
hadlay.Saacid ayaa sheegay inuu jiro Qorshe wax looga qbanayo ammaanka Guud ee
magaalada Muqdisho iyo Istiraatijiyad ku aadan arrimaha ammaanka Guud ahaan
dalka Soomaaliya oo ay xukuumaddiisu dhawaan soo ban dhigi doonto.
Cabdi Faarax Shirddoon Ra’iisul Wasaaraha dawladda Federaalka Soomaaliya ayaa
sheegay in qorshaha ammaanka wax looga qabanayo uu yahay mid ay ka wada qayb
qaadanayaan Ciidamada iyo dadweynaha Soomaaliyeed si looga hor tago Khatarta buu
yiri ay la imaan karaan Kooxaha Nabad diidka ah
Shirkiisa Jaraa’id ayaa Su’aalo ay Saxaafadda weydiisay Ra’iisul Wasaaraha ayuu
ka jawaabay iyadoo su’aasha la weydiiyay ay ku jirtay Xaaladda Xasan Daahir
Aweys.Ra’iisul wasaaraha ayaa sheegay in Xasan Daahir uu yahay Nin si weyn looga
yaqaano dalka Soomaaliya isla markaana ku soo maray Marxalado kala duwan xiliga
haatan ahina uu gacanta ugu jiro Dawladda Federaalka Soomaaliya.
Saacid ayaa intaa ku daray in Saacado ka hor uu ku booqday Xasan Daahir halka uu
ku sugan yahay isla markaana xaaladdiisa Caafimaad ay tahay mid aad u wanaagsan
isagoona ballan qaaday in wax dhibaata ahi haba yaraatee aan loo gaysan doonin.
Ra’isul Wasaare Saacid ayaa u Mahadceliyay Gudigii Xasan Daahir ka soo galbisey
Magaalada Cadaado iyo Maamulka Ximan iyo Xeeb isagoona sheegay in arrimha
Wadadaakaas ka wada hadleen wixii kale ee Cabasha ah ay qabaana uu diyaar u
yahay inuu kala hadlo cid kasta oo aan arrintaa ku Qanacsanayn.
Cabdi Faarax Shirddoon ayaa kulamadii uu maanta la qaatay Mas’uuliyiinta
ammaanka Gobolka banaadir waxa uu ku sheegay inuu yahay mid loogu gogal xaarayo
Qorshe ay Xukuumadda Federaalka Soomaaliya u dejisay Siyaasadda amniga dalka
isagoona hoosta ka xarriiqay inaysan jirin ama uusan jirin Gobol ka tirsan
Soomaaliya oo uusan Saameyneyn qorshahan.
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | July 5, 2013
|
Daabaco
Boggan | Print
