SYAO oo Magaalada Beled Weyne ku soo GabagabeyseyTartan Ciyaareed ay ugu
Magacdartey Isdhexgelka Bulshada
Tartan isboorti oo ay ka qeyb galayeen 8 kooxood Mudo Todobaad ahna ka
soconayay Garoonka Kubada Cagta lama Galaay ee Magaalada Beledweyne ee Gobolka
Hiiraan ayaa lasoo gaba gabeeyay Munaasabad lagu abaal marinayay kooxihii
kaalmaha galay oo lagu qabtay Garoonka Lama Galaay ayaa waxaa kasoo qeyb galay
Mas’uuliyiin ka socday Maamulka Gobolka, Saraakiisha Ciidamada Dowlada, iyo Kuwa
Amisom ee ka socda Dowlada Jabuuti, Haweenka Gobolka, Dhalinyarada, Odayaasha
iyo dhamaan qeybaha Bulshada Gobolka Hiiraan.
Tartankaan oo ay soo qabqaabisey Ururka Difaacayayasha Xaquuqda Dhalinyarada ee
SYAO ayaa waxaa Ciyaarta Kama dambeysta ah oo ay isugu soo bexeen laba kooxood
ee ka kala socday Xaafadaha Magaalada Beledweyne oo kala ahaa Kooshin A iyo
Xaawo Taako B, ayaa waxaa dhex martay ciyaar tii ugu kululeyd intii uu tartanka
socday, iyadoo ugu dambeyntii la isla gaaray Gool ku laadyo taasi oo ay guusha
ku raacday kooxda Xaawa taako.
Taageerayaasha ciyaarta ayaa waxa ay soo buux dhaafiyeen Garoonka ay ciyaarta ka
soconeysay iyagoo muujinayay Xamaasad iyo sida loogu baahan yahay isdhex galka
Bulshada oo nuucaan ah.Khudbado gabagaba ah oo u badnaa amaan iyo dardaaran ayaa
goobta waxaa ka jeediyay Mas’uuliyiintii ka soo qeyb gashay tartanka lana socday
mudadii Todobaadka ahaa ee uu tartanka isdhexgalka bulshada ka soconayay
Garoonka kubada Cagta lama Galaay ee Magaalada Beledweyne.
Agaasime ku xigeenka SYAO ee Gobolada Dhexe C/casiis Wehliye Coofle oo furay
hadalka ayaa uga mahadceliyay kooxihii ka qeyb galay iyo taageerayaasha waxa
uuna u balan qaaday in SYAO ay Gobolka ka qaban doonto barnamijyo wacyigalineed
oo is dhex galka Bulshada loogu tala galay.Ibraahin Macalin C/llahi Madaxa
Barnamijyada SYAO oo isna kalmado dhiiri galan u badnaa ka jeediyay goobta ayaa
waxa uu si aad ah ugu mahad celiyay Ciidamada Jabuuti ee Amisom qeybta ka ah
qaabka ay amaanka gobolka hiiraan gaar ahaan Nagaalada Beledweyne u xaqiijiyeen,
iyo Sida Walaaltinimada leh oo ay SYAO uga caawiyeen suurta galinta
Barnamijyadeeda.
Kornel Cusman Dubad taliyaha ugu sareeyo Ciidamada Amisom ee ka socda Dowlada
Jabuuti oo isna qeyb ka ahaa madaxdii la socday oo daawanayey ntii uu tartanka
socday oo gabagabada ka hadlay ayaa SYAO uga mahadceliyay Barnamijyada muhiimka
ah oo ay ka bilaabeen Gobolka Hiiraan.
Ugu dambeyntii waxaa goobta lagu bixiyay Bilado Khaali ah iyo lacago kaash ah
kuwaasi oo la Guddoonsiinayay kooxihii kaalmaha galay. Kaalinta koowaad ayaa
waxaa la Gudoonsiiyay Koob weyn iyo lacag gaareysay 10,000,000 Sh. So. (Toban
Malyan Shilin Somali) Iyo 12 bilad oo ciyaartoyda la Gudoonsiiyay, Kaalinta
Labaad waxaa la Gudoonsiiyay 5,000,000 Sh. So (Shan Malyan Shilin Somali),
Kaalinta Sadexaadna waxaa la gudoonsiiyay 2,000,000 Sh. So. (Labo MIlyan Shilin
Somali) Halka kaalinta Afraadna la Gudoonsiiyay Qalab isboorti.
Sidoo kale waxaa Hadiyado iyo Bilado lagu gudoonsiiyay Goobta Kornel Dubad oo ay
SYAO Gudoonsiisay Dhar hido iyo Dhaqan ah sida Koofi qurux badan Cimaamad iyo
Bakoorad, sidoo kale Taliyaasha ciidamada qaar kamid ah ayaa Bilado iyo Qalab
isboorti la gudoon siiyay Munaasabada Gabagabada tartanka ayaa ku soo idlaatay
jawi nabadgalyo, waxa ayna dhamaan ka soo qeyb galayaasha ka Muujiyeen Goobta is
dhexgal iyo Farxad..
W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk
Faafin: SomaliTalk.com | Feb 21, 2013
|
Daabaco
Boggan | Print
