Xildhibaanno Ka Tirsan Baarlamaanka Oo Muqdisho Loogu Soo Xiray Siminaar
La Xiriira Dhowridda Xuquuqda Haweenka Iyo Carruurta
Gudoomiyaha Gudiga Xuquuqul Insaanka,Arrimaha Bani’aadannimada, Haweenka
iyo Carruurta ee Baarlamaanka Federaalka Soomaaliya Marwo Khadiijo Maxamed
Diiriye ayaa maanta magaalada Muqdisho kusoo xirtay Siminaar ku saabsan
dhowridda xuquuqda Haweenka iyo Carruurta Soomaaliyeed iyo sida looga
hortagi karo amaba loo yareyn karo xadgudubyada loo geysto.
Siminaarkan oo uusoo qaban qaabiyey Gudiga Xuquuqul Insaanka ee
Baarlamaanka islamarkaana ay ka qeybgaleen qaar ka mid ah gudoomiyeyaasha
gudiyada Joogtada ah ee Baarlamaanka,Xildhibaanno iyo xubno horey xilal
kala duwan ugasoo qabtay dowladihii KMGka ahaa ayaa waxaa uu ka soconayey
mudo Seddex cisho ah Hotelka City Palace ee magaalada Muqdisho ayadoo
dhinacyada ka qeybgalayna ay mudadaasi si gaar ah ay isku dhaafsadeen
aragtiyo la xiriira sida loo joojin karo xadgudubyada loo geysto Haweenka
iyo Carruurta Soomaaliyeed iyo sida loo ilaalin karo xaquuqda aas aasiga
ah ee ay Bulshada ku leeyihiin. Munaasabadda xeritaanka Siminaarkan ayaa ugu horeyn waxaa khudbad ka
jeedisay Nuurto Sheekh Maxamed oo iyadu gudoomiye ka ah Somali Family &
Child Care Organization (SFCC) ayaa ugu mahad celisay ka qeybgalayaasha
Siminaarkan sida ay waqtigooda qaaliga ah ugu horeen mowduucaan dhowridda
Xuquuqda Haweenka iyo Carruurta,sidoo kalena waxa ay u mahad celisay
Gudoomiyaha Gudiga Xuquuqda Aadanaha Baarlamaanka oo ay ku ammaantay sida
ay juhdi badan u gelisay qabsoomidda Siminaarkan ayadoo dhanka kalena
xustay in ka qeybgalayaasha ay aragtiyo muhiim ah isku dhaafsadeen mudada
Seddexda Cisho aheyd ee uu Siminaarku u socday. Gudoomiyaha Gudiga Xuquuqul Insaanka,Arrimaha Bani’aadannimada, Haweenka
iyo Carruurta ee Baarlamaanka Federaalka Soomaaliya Marwo Khadiijo Maxamed
Diiriye oo iyaduna jeedisay khudbadda xeritaanka Siminaarkan ayaa ka
qeybgalayaasha uga mahad celisay sida wanaagsaneyd ee ay uga qeybqaateen
Siminaarkan mudada Seddexda Cisho ah ee uu socday waxaana ay dhanka kale
ka hadashay muhiimadda ay bulshada u leedahay dhowridda xuquuqul Insaanka
guud ahaan gaar ahaanna Haweenka iyo Carruurta oo iyagu xadgudubyo badan
la kulma. Dhinaca kale Gudoomiyaha Gudiga Xuquuqul Insaanka,Arrimaha
Bani’aadannimada, Haweenka iyo Carruurta ee Baarlamaanka Federaalka
Soomaaliya Marwo Khadiijo Maxamed Diiriye ayaa faah faahin ka bixisay
xeerka Xuquuqul Insaanka Dalka iyo sida loogu baahanyahay in la helo
ayadoo xustay in Gudigu uu muhiimad weyn siinayo sidii ay shacbiga
Soomaaliyeed tallooyin uga dhiiban lahaayeen xeerka Xuquuqul Insaanka ka
hor inta aanan la horgeyn Xildhibaannada Golaha Shacabka. Siminaarkan oo qeyb ka ah dadaallada uu gudiga Xuquuqul Insaanka,Arrimaha
Bani’aadannimada, Haweenka iyo Carruurta ee Baarlamaanka Federaalka
Soomaaliya ku doonayo in dalka uu ku wada gaarsiiyo muhiimadda dhowridda
Xuquuqul Insaanka ayaa kusoo gebageboobay jawi aad u wanaagsan ayadoo
dhinacyada ka qeybgalayna ay si aad ah u ammaaneen Siminaarkan
islamarkaana ay sheegeen iney wax badan ka kororsadeen. —DHAMAAD— Xafiiska Warfaafinta iyo Xiriirka Dadweynaha ee Gudoonka Baarlamaanka Email:-
media@parliament.gov.so
Faafin: SomaliTalk.com | Aug 4, 2013
|