Daabaco Boggan | Print

Gudoomiyaha Baarlamaanka Oo La Kulmay Dhigiisa Iyo Madaxweynaha Dalka Turkiga, Booqdeyna Goobo Ku Yaala Ankara

Gudoomiyaha Baarlamaanka Jamhuuriyadda Federaalka Soomaaliya Mudane Maxamed Sheekh Cismaan Jawaari oo wafdi uu hogaaminayo ay ku suganyihiin dalka Turkiga ayaa maanta kulammo gaar gaar ah la qaatay dhigiisa iyo Madaxweynaha dalka Turkiga ayadoo dhanka kalena uu Gudoomiyuhu booqday goobo ku yaala magaalada Ankara.

Kulamada ka hor ayaa Gudoomiyaha Baarlamaanka iyo wafdigiisa waxey booqdeen qabriga uu ku aasanyahay Madaxweynihii hore ee dalkan Turkiga Mustafa kamaal Ataturk halkaasi oo uu gudoomiyuhu dhigay ubax,sidoo kalena Gudoomiyaha iyo Wafdigiisa waxey kormeer ku tageen dhismaha Safaaradda Soomaaliya ee magaalada Ankara waxaana Gudoomiyaha iyo wafdigiisa warbixinno ku aadan waxqabadka safaaradda uu ka dhageystay howlwadeennada iyo Mas’uuliyiinta safaaradda oo uu hogaaminayey safiirka Soomaaliya u fadhiya Turkiga Mudane Maxamed Mursal Sheekh C/raxmaan.

Gudoomiyaha Baarlamaanka Federaalka Soomaaliya Mudane Maxamed Sheekh Cismaan Jawaari ayaa aad u ammaanay qaabka ay u shaqeyso safaaradda Soomaaliya ee dalka Turkiga waxaana uu ku booriyey mas’uuliyiinta iyo howlwadeennada Safaaradda iney sii wadaan dadaalkooda hagar la’aaneed ee ay ugu adeegayaan shacbiga Soomaaliyeed ee ay wakiilka ka yihiin.

Intaasi kadib Gudoomiyaha Baarlamaanka iyo Wafdigiisa waxey tageen xarunta Baarlamaanka dalkan Turkiga oo ku taala magaalada Ankara waxaana uu Gudoomiyuhu kormeeray dhammaanba qeybaha kala duwan ee uu ka koobanyahay dhismaha xarunta Baarlamaanka ayadoo markaasi kadibna uu Gudoomiyaha Baarlamaanka kulan gaar ah la qaatay dhigiisa dalkan Turkiga oo ay ka wada hadleen xiriirka labada dal iyo sidii ay wada shaqeyn joogta ah u dhexmari laheyd labada Baarlamaan ee Soomaaliya iyo Turkiga.

Kulankaasi dhexmaray labada Gudoomiye Baarlamaan kadib waxaa Wafdiga Gudoomiyaha uu hogaaminayey qado sharaf loogu sameeyey xarunta Baarlamaanka ayadoo qado sharaftaasina ay goobjoog ka ahaayeen xildhibaannada labada Baarlamaan ee Soomaaliya iyo Turkiga.

Sidoo kale Gudoomiyaha Baarlamaanka Federaalka Soomaaliya Mudane Maxamed Sheekh Cismaan Jawaari ayaa booqday xarunta Wasaaradaha dalka Turkiga halkaasi oo uu kula kulmay Ra’isulwasaare ku xigeenka dalka Turkiga Bakir Bozdag oo isagu dowladda Turkiga arrimaha Soomaaliya u qaabilsan waxaana uu Gudoomiyuhu uu aad u ammaanay sida hagar la’aaneed ee ay Walaalaha Turkigu u garab taaganyihiin shacbiga iyo Dolwadda Soomaaliyeed.

Ugu dambeyntii Gudoomiyaha Baarlamaanka ayaa aqalka Madaxtooyada kula kulmay Madaxweynaha Dalkan Turkiga Mudane Cabdalla Guul oo ay ka wada hadleen xiriirka labada dal iyo sidii loo adkeyn lahaa waxaana kulankaasi oo qaatay mudo saacado ah ay labada dhinac isku afgarteen in lasii xoojiyo cilaaqaadka iyo wadashaqeynta ay Dowladda Federaalka Soomaaliya la leedahay walaalaha Turkiga.

----DHAMAAD----

Xafiiska Warfaafinta Gudoomiyaha Baarlamaanka

Madaxweyne Hassan oo soo gabagabeeyey socdaalkii Puntland

(Garoowe,Soomaaliya,29 April 2013) Madaxweynaha Jamhuuriyada Federaalka Soomaaliya, Mudane Xasan Sheekh Maxamud iyo wafdi uu hoggaaminayey ayaa galabta soo gabagabeeyey socdaal shaqo oo uu labo maalmood uu ku joogey magaalada Garowe ee Puntland.

Madaxweynaha iyo wafdigii la socday oo ka koobnaa wasiiro, xildhibaano iyo mas' uuliyiin kale ayaa si heer sare ah loogu soo sagootiyey galabta. Madaxweynaha Jamhuuriyadda Federaalka Soomaaliya iyo Madaxweynaha Puntland oo shir-jaraa'id si wadajir ah u qabtay ayaa sheegay in labada dhinac isku afgarteen sidii loo dhaqangelin lahaa heshiisyadii hore, isla markaana looga wada shaqeyn lahaa wadahadalada iyo midnimada shacabka Soomaaliyeed.

Madaxweynaha Jamhuuriyada Federaalka Soomaaliya ayaa uga mahadceliyey Madaxweynaha Puntland, xukuumadiisa iyo shacabka Puntland sidii diiraneyd ee quruxda badneyd ee loo soo dhoweeyey, sheegeyna in Puntland ay door muhiim ah ku laheyd soo afjariddii xilligii KMG aheyd loogana baahanyahay inay dhameystirka dastuurka iyo dib u soo celinta amniga ay kala shaqeyso Dowladda Federaalka ah.

Madaxweynaha ayaa kala hadlay Madaxweynaha Puntland shirka London ee 7da May sheegeyna in shirkan ay wada hoggaaminayaan Somalia iyo UK ujeedaduna tahay sidii Dowladda Federaalka looga saacidi lahaa qorsheyaasheeda Amniga, garsoorka iyo dibs-u-hagaajinta dhaqaalaha. Madaxweynaha ayaa sheegay in shirka London uu yahay mid taariikhi ah oo waxtar ballaaran u leh shacabka Soomaaliyeed, kana codsaday Puntland inay talo ku yeelato, kalana shaqeyso Dowladda Federaalka ah.

Socdaalkan shaqo ee Madaxweynaha ayaa daba socda socdaalkii Ra'iisul Wasaaraha uu ku yimid Puntland iyo qorshaha Dowladda ee isgaaridda iyo is-dhexgalka shacabka Soomaaliyeed.
- Dhamaad -

Wixii faah-faahin ah kala soo xiriir:Malik Abdalla,Agaasimaha Warfaafinta Villa, Somalia, Muqdisho, media@presidency.gov.so

Faafin: SomaliTalk.com | April 30, 2013

Kulaabo bogga www.SomaliTalk.com © www.SomaliTalk.com