SOMALITALK.COM
w w w . S o m a l i T a l k . c o m
SOMALITALK - WARBIXIN

Ururka Dhalinyarda SYAO OO Tartan Loogu Magacdarey Isdhexgalka Dhalinyarda ku soo Gabagabeysey Magaalada Baydhabo.

Ururka u dooda Xuquuqda Dhalinyarada Soomaaliya ee SYAO ayaa ku soo Gabagabeeyay Magaalada Baydhabo ee Gobolka Tartan Isboorti oo muddo Todobaad socday, kaasoo ay ka qeyb galeen kooxo ka dhisan magaalada.Tartankan oo loogu magac daray is dhexgalka Dhalinyarada ku nool Gobolka Bay ayaa kooxaha ka qeyb galay ay ahaayeen kuwo isa soo reebay, waxaana Finalka ama ciyaartii u dambeysay u soo baxay Kooxaha FC Salaadey iyo FC Aamina.

Ciyaartan oo ay u soo Daawasho tageen dadweyne fara badan ayaa waxaa ka soo qeyb galay Gudoomiyaha Gobolka Bay Cabdi Aadan Hoosow iyo Mas’uuliyiinta heer Gobol iyo heer degmo.Labada kooxood ayaa waxay isla dhaafi waayeen barbar dhac Goolal la’aan, waxaana rigoorayaal loo dhigay, si ay ugu kala baxaan waxaa 4-1 ay guusha ku raacday Kooxda FC Salaadey oo ku Guuleysatay koobki Quruxda badnaa.

Gudoomiyaha Maamulka Gobolka Bay Cabdi Aadan Hoosow oo ka hadlay Gabagabadii tartanka ayaa sheegay in tartankan uu qeyb weyn ka qaadanayo is dhexgalka Bulshada iyoDdhalinyarada, isagoo ku amaanay SYAO dadaalkeeda ku wajahan horumarinta dhalinyarada.



Sidoo kale waxaa goobta ka hadlay Maxamuud Sheekh Maadey Wakiilka Olimbikada Soomaaliyed ee Gobolada Bay, Bakool iyo Gedo oo la isku dhaho Zone 2, isagoo sheegay in Tartamadan ceynkan oo kale ay wanaagsan tahay in la joogteeyo, laguna ballaariyo deegaanada kale ee Gobolada uu wakiilka ka yahay.

Ugu dambeyn Gudoomiyaha Gobolka Bay Cabdi Aadan Hoosow ayaa Gudoonsiiyay koob qurux badan kooxdii ku guuleystay, halka kooxdii labaad lagu abaal mariyay koob, waxaana xusid mudnaa in ciyaartoydii ka qeyb qaadatay la siiyay Bilado dhiiragelin ah.

Tartankan ay SYAO ku soo Gabagabeysay Magaalada Baydhabo ayaa qeyb ka ahaa tartamo Isboorti oo is dhexgalka Bulshada ahaa oo ay ku qabatay Beledweyn, Afgooye Gobolka banaadir, iyadoo lagu wado tartamo kale ay ku qabato Gobolada iyo deegaanada dalka..

W/D Amiin Yuusuf Khasaaro
E-Mail amiinkhasaaro@hotmail.co.uk
E-Mail amiinkhasaaro@yahoo.co.uk

Faafin: SomaliTalk.com | April 25, 2013

 

Kulaabo bogga www.SomaliTalk.com © www.SomaliTalk.com

Copyright © 2013 SomaliTalk.com All rights Reserved.;