Cismaan Cilmi
Boqore oo ka sheekeynaya sababihii uu Muqdisho
uga tegay
“Wiilkeygii Qadar
Cismaan dilkiisii waxaa lagu bixiyey kharash
fara badan”
Dhawaan ayaan magaalada Jowhar booqday anigoo u
tagey arrimo shaqo iyo kuwo gaar ahaaneed intaba,
waxaana halkaa kula kulmay mas’uuliyiin badan, oo ka
tirsan labada Gole ee dowladda federaalka ah, oo uu
ka mid yahay Ra’isul wasaare Geeddi iyo qaarkood
kale oo aan hore isu naqaanay, halka kuwo kalana aan
socdaalkeygaasi ku bartay.
Cismaan Cilmi Boqore
oo ah guddoomiye ku xigeenka labaad ee Baarlamanka
oo aan hore daris ugu aheyn magaalada Muqdisho ayaa
ka mid ahaa madaxdii aan Jowhar ku kulanay, waxaana
kala sheekeystay arrimo badan, haba ugu sii weynaato
siyaasadda hadda taagan, hase ahaatee, waxaa uu
guddoomiye ku xigeenku si waadax ah iigaga
sheekeeyey qaabkii uu Muqdisho uga tagay iyo
sababihii loo dilay ALLE ha u naxariistee wiilkiisii
Qadar Cismaan, wuxuuna hadlakiisa ku bilaabayaa:
Waxaan isku mowqif
aheyn xildhibaanadii iyo wasiiradii ku sugnaa
magaalada Muqdisho, waxaana aaminsanaa in fikirka
aan qaadanay uu ahaa mid sax ah, kaasoo ahaa in
magaalada Muqdisho ay dowladdu ku shaqeyso, waxaan
aaminsanaa in dowladdii Kenya lagu soo aasaasay ay
waxweyn ka badali doonto marxaladaha uu dalku ku
sugan yahay, gaar ahaan Caasimadda, waxaan ka mid
ahaa raggii u ololeeyey in aan axdiga laga
talaabsan, waxaana ayiday fikirkii ahaa in
caasimadda aan laga beydh-beydhin, intaas markii ay
hawsha mareyso ayaa waxaan sameyney abaabulo la
xiriira qaabka loo xareyn karo maleeshiyaadka
daadsan jidadka Muqdisho iyo nawaaxigeeda, mar
kastana waxaan ku darsanayey talo ku aaddan qaabka
loo xareyn karo maleeshiyooyinkaas, waxaana mar
kasta diiradda saareyney sidii ciidamo Qaran loogu
badali lahaa maleeshiyaadkaas, hase ahaatee,
qaabkaasi waa inoo suura gali waaye,y waxaana
dhacday in dhawr gowr lagu gacan seydhay talooyin
wax ku ool ah oo aan soo jeediyey, waxaana dhacday
halkii aan sugeyney in dhammaan la wada xareeyo
maleeshiyooyinkii la xareeyey inkooban waxaana ii
muuqatay in aysan jirin laba hoggaamiye kooxeed oo
is aaminaya, kalsooni buuxdana isku siinaya qaabka
xareynta maleeshiyaadka, isbaaro qaadista iyo wada
shaqeynta guud.
Markii ay dhacday in
labadaa arrimood ee kala gadisan oo kala ahaa
isbaaro qaadista iyo xareynta ciidamada lagu wada
fashilmay oo isbaarooyinka qaarkood la qaadi waayey
halka qaar-na markii la qaaday ay dib u soo noqdeen
oo aanu wareernay, haddii aan nahay raggii sida
aadka ah isugu taxalujinayey in caasimadda la hawl
galiyo oo la nadiifiyo, hase ahaatee, aynaan
taageero dhinaca niyadda ah ka heysan Wasiiradda
hubeysan ayaa haddana waxaa dhacday, in la bilaabo
qorshe ku aaddan, in maamul loo sameeyo gobolka
Banaadir, waxaana dhacday in dhawr mar saxaafaddu ay
arrimaha socda wax iga weydiiso waxaana tilmaami
jiray habka ugu wanaagsan ee aan ku hawl galin karno
hirgalinta hadafkeena, inkastoo ay jireen mararka
qaar, inaan u cudurdaaran jiray warbaahinta, waxaana
dhacday in markii aan u adkeysan waayey waxyaabaha
socda aan go’aansaday ku biirista xubnaha labada
Gole ee ku sugan magaalada Jowhar, maadaama guul
darrooyin ay ku dhamaadeen, waxyaabihii aan ka
wadnay gobolka Banaadir, oo runtii lagu guuleysan
waayey.
Intii aanan Jowhar
xubanaha ku sugan ku biirin waxaan soo jeediyey talo
aheyd, inaan wadahadal la galno xubnaha Jowhar, hase
ahaatee, cidina dhag jalaq uma siin.
Sida dad badani ogsoon
yihiin markii aan tagey magaalada Jowhar, waxaa
idaacadaha laga yiri, “Haddii Cismaan Boqore uu
Jowhar aaday waxaa Xamar jooga qoyskiisa, ilmihiisa
iyo hantidiisa” waxaana hadalkaasi uu dhawr maalmood
igu ahaa mid saameyn weyn ku yeeshay nolosheyda,
laakiin, muddo toban beri ah kaddib waxaa dhacday in
la dilo wiilkeygii Qadar Cismaan Cilmi, runtii,
dilka wiilkeyga loo geystay waxaa uu ahaa, mid
naxdin weyn igu noqday, oo aan filan waayey.
Markii uu halkaa
sheekada marinayey waxaa guddoomiye ku xigeenka
wajigiisa laga dheehan karay dareen murugo leh
maadaama uu soo xasuusanayo dilkii xaq darada ahaa
ee loo geystay wiilkiisii, isagoo sheekadii noo sii
wadana wuxuu sii leeyahay:
Gacan xaq darro ah,
ayaa lagu dilay wiilkayga, ma jirin, cid uu wax u
geystay, mana jirin cid wax ka tabaneysay, waxaana
la soconaa dad badanina ogsoon yihiin in wiilkeyga
noloshiisa loo gooyey arrimo siyaasadeed, waxaana
ogsoonahay in dilka wiilkeyga lagu bixiyey kharash
fara badan, hase ahaatee, Illaahey ayaa dadka u kala
xaq gudi kara, dadkii xaq darada ku dilay wiilkeyga
Eebbe ayaa ka abaal marinaya, waxaana u mahad
celinayaa Eebbe oo markii hore i siiyey haddana iga
oofsaday.
Guddoomiye ku xigeenka
Baarlamaanka, Cismaan Cilmi Boqore, oo aan u
tacsiyeeyey, ka hor, intii aanan wareysan, maadaama,
aan aheyn dad daris ah, ayaa sidoo kale, wax ka
weydiiyey rajada uu ka qabo dowladda KMG ah iyadoo
xiligaasna uu dhinac fadhiyey, guddoomiye ku
xigeenka 1-aad ee Baarlamanka Prof: Dhalxa, wuxuuna
yiri, “Aad ayaan ugu hanweynahay in dowladda KMG ah
ay shaqeyso, waxaana aaminsahay in uu dhammaanayo
khilaafka yar ee u dhaxeeya, xubnaha labada Gole,
waxaana shacabka Soomaaliyeed ka codsanayaa in ay
taageeraan hannaanka nabadda si ay u helaan dowlad
mideysan oo wada shaqeyneysa oo baahidooda
dhameystirta”
W/Wareysatay: Faarax
Max’ed Cali {Faarax Blue}
E-Mail:
farahblue_545@hotmail.com
Faafin:
SomaliTalk.com | Jan 26, 2006
Siyaasiyiin Soomaaliyeed oo Qoraal u Gudbiyay Qaramada Midoobey..
»Shirkii
Ururka Midowga Afrika oo Qaramada Midoobey ka codsadey in
soomaaliya cunqabataynta laga qaado.. iyo
warar-GooGoos ah ka akhri halkan
Jan 25
Midowga Afrika oo
ka fiirsanaya in Maxkamad
la soo taago shaqsiyaadka iyo kooxaha
hortaagaan nabadgelyada Soomaaliya iyo
Warar
GooGoos Akhri.. Jan 24