Daabaco Boggan | Print

Baaqa Baarlamaanka Puntland Ma Mid Wadaniyadeedbaa Mise Waa Mid Siyaasadeed

W.Q. Maxamed Siciid Kaashawiito
radiomidnimo@yahoo.com

Waa markii ugu horeysay ee xubnaha Guddiga Joogtada ah ee Baarlamaanka Puntland ay soo saaraan qoraal ay ku mideysan yihiin oo ay ku tilmaamayaan dhibaatada ka jirta Maamulka Puntland gudihiisa.

Inta badan dadweynaha reer Puntland ayaa indhahoodu qabanayeen khaladaadka maamul ee Puntland oo beryahan danbe sii tabareysanayey, waxaase arrin la yaab leh noqotay kadib markii ay Guddiga Joogtada ah ee Baarlamaanku ay shalay ka dhawaajiyeen baaxada dhibaato ee ka jirta Puntland.

Dadka qaarkood waxay qabeen in warbixinta oo kale ay noqoto mid si asturan la isugu gudbiyo, balse waxaa laga anfariiray arrinta dhalisay in saxaafada madaxa banaan loo soo bandhigo dhaliisha maamulka ee mugaas leh.

Baarlamaanka Puntland ayaa in badan oo mushatamaca Puntland ahi ku tilmaamaan kuwo qalinka ku duuga barnaamij walba oo ay dowladdu miiskooda horgeyso, waxaa kaloo lagu dhaliilaa in ay ahaayeen kuwo wax la qaybsada ama gacan saar la leh hadba maamulkii Puntland soo mara, waxaase la is weydiinayaa sababta iminka ka dhawaajisay?

Ciddina ma inkiri karto in maamul xumada Puntland ka jirta lagu soo xasuusan karo dowladihii Soomaaliya soo maray, ama waxaaba la oran karaa waa ka sii liidataa.

Waxaa beryahan danbe goobo cidlo ah noqday Labada Wasaaradood ee Puntland ugu balaarnaa, kuwaasoo beryihii hore ahaa goobo camiran oo shaqo ka socoto.

Marka aad tegto Wasaaradda Maaliyada ayaa waxaa indhahaagu qabanayaan dhowr askeri oo ilaalo ah oo caajis ka muuqdo oo taagan albaabka hore.

Sidoo kale wasaaradda Kallumeysiga iyo dekeddaha ayaa marka aad gudaheeda tagto laguu sheegayaa in aysan Madaxdii iyo Maamulkii Wasaaradu imaan oo ay qaarkood yimaadaan 11 Barqanimo, halkaas qudheeda ayaa waxaad kula kulmeysaa dhowr shaqaale ah oo niyad jab uu ka muuqdo.

Madaxweynaha la doortay ee Puntland Gen. Cadde Muuse ayaa markii uu xilka u loolamayey iyo markuu xukunka la wareegay ku baaqay in uu wax weyn ka bedeli doono hanaanka Maamul ee jira, “Bil walba waxaanu lacagtooda siineynaa ciidamada iyo shaqaalaha” ayuu yiri, wuxuu kaloo si cad u sheegay in uu adkeyn doono dhinaca ammaanka, waxaase soo shaac baxay cabashooyin ka imaanaya dhinaca shaqaalaha iyo ciidamada Puntland oo sheegaya in aysan dhowr bilood wax mushahar ah helin, sidoo kale waxaa maalmo dhoweyd faraha ka baxay ammaankii Puntland kadib markii dilal is daba joog ah ay ka dhaceen dhowr magaalo oo Puntland ka tirsan.

Maamulkii uu madaxweynaha ka ahaa C/laahi Yuusuf ee Puntland ayaa horay heshiis ula galay shirkad lagu magacaabi jiray Hart Group, taasoo saldhig u aheyd qalalaasihii siyaasadeed ee ka dhacay Puntland.

Shirkadii Hart Group ayaa u muuqatay mid lagu naasnuujinayey shakhsiyaad gaar ah, waxaana gacanta loo geliyey ka faa’iideysiga khayraadka Puntland.

Ugu yaraan dhowr Boqol oo markab ayaa siyaasiyiin kala duwan oo reer Puntland ahi siiyeen ruqsado ay baddaha kaga kalluumeystaan, iyadoo Wasaaradda Dekeddaha iyo Kalluumeysiguna ay sheegeen in ay faylkooda ku hayaan tiro ka yar 6 markab oo si sharci ah loogu ogolaaday ka kalluumeysiga Puntland.

Wararka iminka soo baxaya ee Maamulka Puntland uu heshiiska kula galay shirkado macdanta baara ayaa dad badani is weydiinayaan muxuu kaga duwaan doonaa heshiiskani kii Hart Group.

Khaladaadkii maamul ee Puntland soo maray ayaa noqday “Ratiga danbe ratiga horuu saanqaadkiisa leeyahay”, waxaana arrintaas loo aaneynayaa Golaha Shacabka oo iyagu masuul ka ah bulshada Puntland ee ay matalaan, balse lagu dhaliili jiray in ay ka hadlaan oo keliya kordhinta mushaharooyinka iyo khidmadaha kale ee ay qaataan, haddaba muxuu yahay kacdoonka ay maanta ka war hayaan ee laga cabsida qabo.

Waxaa soo baxaya warar sheegaya in uu jiro tuhun ku saleysan dhaqaale dhowaan laga helay shirkad Ustaraaliyaan ah, taasoo xubno Maamulka ugu tugtugta roon qaarkood isu arkeen in laga qadiyey, sidaas awgeed, aysan xaaladu aheyn mid ku saleysan in la dhimo tirada ciidamada Puntland oo in badan oo ka mid ah loogu magic daray Caaglayaal.

Bulhanka iyo qaylo dhaanta wakhtiga ka soo yeeraysa Guddiga Joogtada ah ee Golaha Baarlamaanka ayaa la is weydiin karaa ma mid siyaasadeed baa mise waa mid wadaniyadeed?

Wixii ka danbeeyey masiibadii Tsunami ayaa la rumeysan yahay in gobolada Puntland ay dunidu ugu deeqday dhaqaale fara badan, waxaana cabshooyin wax tar la’aaneed ka soo yeerayaan dadkii ay dhibaatadu saameysay, mana jirto wax gargaar ah oo maamulka Puntland ugu deeqay ama tala galay dadkaas, sidaas oo kale waxaa jira dad ay saameeyn dhaqaale xumo ka soo gaartay abaarihii wadanka soo maray, kuwaasoo ku nool xeryo qaxooti, haddana aan wax gargaar ah Dowladdu u geysan. Gargaarka keliya ee dowladdu geysato ayaa ah mid u dhexeeya Hay’adaha caalamiga ah iyo dadka dhibaateysan.

Dadka dhaliila dowladda Puntland ayaa waxay sheegaan in awooda maamulka Puntland aysan aheyn mid isu dheeli tiran, marka laga eego dhinaca awoodaha, waxaana dhowaan la eryey Xeer Ilaaliyihii Guud ee dowladda, balse ay Golaha Wakiiladu is hortaageen.

Waxaa caburin loo geystay saxaafadaha madaxa banaan qaarkood, waxaana xabsiyada la dhigay suxufiyiin reer Puntland ah, tanoo wax u dhimeysay ama ku tumaneysa qawaaniinta Axdiga Puntland oo dhigaya in muwaadinka Puntland uu fikirkiisa cabiro karo, waxna ka qori karo.

Arrintu siday doonto ha ahaatee, Mowjada siyaasadeed ee xiligan ay albaabka ka balaqeen Guddiga joogtada ee golaha Wakiiladu ayaa iyadu leh wax iska weydiinteeda wakhtigaan oo Madaxweynuhu dalka ka maqan yahay.

 
W.Q. Maxamed Siciid Kaashawiito
radiomidnimo@yahoo.com

Afeef: Aragtida qoraalkan waxaa leh qoraaga ku saxiixan

KHAYRAADKA PUNTLAND & TERRY::: 01 | 02 | 03 | 04 | 05 | 06 |

C/Laahi Yusuf & Sh. Aweys.... GUJI...

Dr. Alnajjar oo Aad uga Dayriyey Xaalada Soomaalida....
»Cusmaan Caato: C/laahi Yuusuf dagaal ayuu isu diyaarinayaa
»Saddex markab kalluumaysato oo lagu afduubay Soomaaliya
Wararka oo dhan ka akhri halkan... Guji... Aug 2

Jaamacada Kismaayo oo Ladhigay Dhagaxeedii u Horeeyey
Markii ugu horeysey ee taariikhda Kismaayo ayaa la dhigay dhagaxii ugu horeeeyey ee Jaamacad Kismaayo... Guji... Aug 1

Terry ma u Suurta Geli doontaa in Xera Gashado Ganacsada Soomaaliyeed
Goobtii heshiiska Terry iyo DGPL waxaa joogey qaar ka mid ah Xawaaladaha iyo ganacsadata Soomaaliyeed oo... Guji...

BAARID | SEARCH