Daabaco Boggan | Print

• Gudoomiyaha Baarlamaanka oo Maanta Booqday Birmingham UK 
• Shariif Xasan: Hadii dalku uu ka jiro xukun kali talis ah waa ay adkaanaysaa in Soomaalida qurbaha ay dib ugu laabtaan dalkii Hooyo.

Gudoomiyaha Baarlamaanka oo Maanta Booqday Birmingham UK 

Diyaariye : Abdullahi Nur | Aosman66@yahoo.co.uk | Oct 2, 2005

Gudoomiyaha baarlamaanka soomaaliya Mudane Shariif Sh xasan Sh Aaden oo maalmahaan booqasho ku joogay dalkaan UK, ayaa wuxuu maanta 02/10/05 booqasho ku tagay Caasimada labaad ee UK, ee layiraa Birmingham, halkaasoo aay degan yihiin jaaliyad soomaaliyeed oo badan, 

Gudoomiye shariif oo aay la socdeen xildhibaanada kala ah

• 1-Mudane Maxamed Cabdi Yuusuf
• 2-Mudane Sakariye X Maxamed Cabdi
• 3-Mudane Maxamed Axmed Daryeedl
• 4-Mudane Cabdi Axmed Dhegdheer ahan wasiir ku xigeenka Xananada xoolaha
• 5-Mudane Mustafe Sh Cali Dhuxluoow

Iyo qaar ka mid ah Jaaliyada Soomaaliyeed ee degan London oo aay ka mid ahaayeen

• 1-Mr Abdullahi Nur Osman ( Direct of Access for Support & Development)
• 2-Eng C/raxmaan Yariisoow ( Gudoomiyaha Somali concern Group)
• 3-Mr Daahiye Cabdi
• 4-Mr Wadaad yare

Iyo xubno kale ayaa ka ambabaxay magaalda London, saacadu markii aay aheyd ku dhawaad 1:00pm ee London, waxeeyna gaareen Birmingham saacad iyo bar ka dib, .

Gudoomiyaha iyo wafdigiisa oo lagu waday gawaari ka badan 5 gaari, ayaa waxaa si heer sareysa ugu soo dhaqweeyey Birmingham wafdi aay hogaaminayeen madaxda golaha odayada soomaaliyeed ee magaalada Birmingham,  

Markii aan yimaadeenba waxaa horey ka bilaawday barnaamijkii , iyadoo aay halkaas ka hadleen xubno matalayey Jaaliyada soomaaliyeed ee ku nool magaalada Birmingham , kuwaasoo oo dhammaantood sheegay sida aay ugu faraxsanyihiin , ineey soo dhaweeyaan, gudoomiyaha Baarlamaanka iyo wafdigiisa , waxeeyna yiraahdeen kusoo dhawoow Birmigham, si kalgacaltooyo iyo walaaltinimo ku jirto, waxeeyna kula dardaarmeen gudoomiyaha in uu sii wado hawshiisa ah dib u heeshiisinta iyo nabada ummada soomaaliyeed. 

Ka dib waxaa hadalkii qaatay Mudanayaashii uu hogaaminayey Gudoomiyaha, waxaana ugu horeyn hadlay Mudane Maxamed Cabdi Yuusuf, wuxuuna ugu mahad celiyey dhammaan jaaliyada soomaaliyeed sida wanaagsan  ee aay usoo dhaweeyeen, wuxuuna sheegay in dowlada aysan ka jirin khilaaf ah in jago leysku heysto, balse leesku khilaafsanyahay dhawr arimood oo kala ah 

• 1-In aan dalka la keenin ciidamo Ethiopia ah
•  2-In caasimada la tago maadaama dastuurka ku qorantahay sidaas .  
• 3-Axdigii iyo xeerarkii la qortay in la raaco ,

Wuxuuna ka codsaday shacbiga soomaaliyeed ineey iyaga u gar naqaan hadii aay gar daran yihiina dhahaan idinkaa qaldan , hadii qolada kala qaldantahayna dhahaan adinkaa qaldan ee soo raaca . 

Maxamed cabdi  yuusuf wuxuu sheegay in jowhar ay tahay magaalo soomaaliyeed , uuna mar kazoo ahaan jiray Gudoomiye gobol , dadka gobolka degana aay aad u jecel yihiin asigana jecel yahay, balse wuxuu yiri caasimad ma noqon karto, waayo, ? waxaa jirta Xamar oo ah

• Meeshii lagu saxiixay midnimada soomaaliyeed,
• Xarunta u ahaan jirtay halgankii gobanimodoonka,
• Meesha ay ku yaaliin dhamaan taalooyinkii loo dhisay halganka dalka,
• Meesha aay soomaali dhan ku leedahay hanti,  ahna  meesha soomaali ka dhaxeyn karta,

Mar uuna ka jawaabayey su,aal ku saabsaneed Habka Federaalka ee dowlada hada wuxuu dheegay in soomaaliya aysan Federaal dan ugu jirin, balse aaay wadaan cadawga ummada soomaaliyeed , wuxuuna xusay in waagii xoriyada la qaadanayey uu fikirkaan n keenay Talyaanigii oo rabay inuu awooda soomaaliyeed kala dhantaalo, wuxuuna usoo dhiibay buu yiri dad isaga taageersanaa oo la oran jiray Pro-Italaiana , . 

Maanatana waxaa wada ayuu yiri Ethiopia, oo usoo dhiibtay qolada layiraa SRRC oo aay iyadu taagreeto, mana ahan buu yiri fakir iyo arin ka timid soomaali, dana nooguma jirto , ujeedada laga leeyahayna waa in soomaali lagu sii kala goo gooyo. 

Waxaa kaloo iygana meesha ka hadlay dhammaan xildhibaanadii kale, oo dhamaantood sheegay ineey fulinayaan wixii aay u dhaarteen iyo in dalka soomaaliyeed aan cadow loo gacan gelinin, waxeeyna ka codsadeen in shcabka soomaaliyeed fahmo waxa leesku hayo ineey tahay Jiritaankii soomaaliyeed ee aaysan dhihin, aniga waxaan ahay dhex dhexaad iyo garab lama jiro, waayo beey yiraahdeen, arin mabda,a ah ama ku xiran jiritaakeena dhex dhexaad lagama noqon karo, waana in sidaas u fahmaan shacabka soomaaliyeed , halgankana dhinacooda kazoo galaan. 

Ugu danbeyn hadalkii waxaa lagu soo dhaweeyey gudoomiyaha baarlamaanka Soomaaliyeed Mudan Shariif Xasan Sh Aaden , wuxuuna ugu horeyn u mahad celiyey sidii diiraneed ee loogu soo dhaweeyey Birmingham isaga iyo wafdigiisa, wuxuuna yiri waad ku mahdsantihiin, soo dhaweyntiina ,  waxaana jeclahay buu yiri inaan u mahad celiyo dowladaan aad la joogtaan, ee idin soo dhaweeysay ,idin dejisay ,  waxaana idinka codsanayaa inaan si fiican ula dhaqantaan dadkaan aad la nooshihiin, inaad wax xumeeysaana aad iska ilaalisaan , waayo buu yiri waxaad noo tihiin safiiro noo jooga halkaan, hadii aan nahay ummadda soomaaliyeed  

Salaam ka dib gudoomiye shariif wuxuu sheegay in dowlada waxa leesku heysto aay tahay sharciga hala raaco , iyo wixii lagu heshiiyey , balse aysan jirin qof necbaan iyo qof jaceyl, wuxuuna sheegay in aysan taas wax tareynin,

Gudoomiye shariif wuxuu sheegay in iyaga dhinacooda aay u halgamayaan, sidii  dalka looga  sameey lahaay  dowlada ku dhaqmeysa sharci ee aan ku shaqeeynin fikrad qofeed oo kali talisnimo ah, wuxuuna sheegay kali talisnimo ineey tahay waxa meeshaan na dhigay, waxaana u halgameeynaa buu yiri Mudane Shariif inaan ilaalino sharcigii la qortay, ee  lagu heshiiyey, isla markaasna waxaan rabnaa in dowlada kula xisaabtano sharciga ineey raacdo hadii aan nahay baarlamaanka, 

Wuxuu kaluu shaagay mudane shariif in aay doonayaan ineey  ilaalinayaan, waxa loo yaqaano Check and Balance, oo ah ineysan awooda qolo kaliya gacanta u galin , sida Dowlada ama Madaxweynaha, oo aay jirto awood qeybsi , taas kaliya ayaana lagu gaari karaa buu yiri horumar iyo wanaag, iyo in qof kastaa helo xaqa uu ku leeyhay dalka iyo kan isaga lagu leeyahay intaba. 

Gudoomiye Shariif wuxuu sheegay in dadka qaar aysan ku kadsoomin, in xanaaq aay u qabaan dhib loo geystay oo anaga dhexdeena isu geysanay in la yiraa waxaa dalka lagu soo hogaaminayaa Cadowgii soo jireenka ahaa ee soomaaliyeed , wuxuuna xusay in dhibka aan kala tirsaneeyno lagu xalin karo oo kaliya dowlad soomaaliyeed oo shawqeeysa , balse hadii cadowga soomaaliyeed la keeno, sida Ethiopia, in jiilalkeena soo socda aay sida reer Falastiin dhagax tuuri doonaan, oo dalka oo dhan lagala wareegi doono, wuxuuna yiri wixii dhexdeena waa inaan inaga dhameeysanaa, una halganaa inaan dow lad cadaalad ah oo qof kastaa yeesho codkiisa . 

Gudoomiye shariif wuxuu kaluu sheegay in ay ku dadaali doonaan in aay nabada ka shaqeeyaan, wada hadal dowlada dhexdeeda ahna mar kastaa raadin doonaan, iyo in aysan bur burin wixii lasoo dhisay, wuxuuna yiri hadii tan naga bur burto cid danbe oo na caawin ma laha. 

Waxaa kaluu sheegay in magaalada muqdisho bannaanka uga saareen in ka badan 2,500 oo maleeshiyo ah iyo hubkooda, taasoo wax weyn ka tartay ammaankii magaalada, wuxuuna ammaan usoo jeediyey intii gacanta dhaqaale ka geysatay taakuleynta maleeshiyooyinkaa la xareeyey , wuxuuna sheegay ineey weli baahidii mid kasii weyn jirto, wuxuna codsaday in la taageero ciidmadaa ku xareeysan xerooyinka Hiilweyne iyo  Laanta buuro, oo jaaliyadda dibada ka qeyb qaadataa si xoogan, oo wax tar ah  

Ugu danbeyn wuxuu ka codsaday shacbiga soomaaliyeed ineey allaah u towbad keenaan , leesna walaashado meel kastoo aay joogaan, gaar ahaan qurbaha, oo leeska ilaaliyo khilaafka iyo kala qeybsananaanta, wuxuuna soo gelitaanka bisha barakeysan ee Ramadaan allah ka baryey in nabad iyo is cafis aan helno, wuxuuna sheegay in uu weligiis taageri doono in si cadaalad ah soomaaliya loo maamulo. 

Ka dib waxaa guddoomiyaha iyo wafdigiisa casho sharaf heer sare ah loogu saaamyey, Maqaayad soomaaliyeed oo ku taala isla Birmingham, oo la yiraa HILAAC, waxaana uu gudoomiyahaiyo wafdigiisa  kazoo ambabaxay Birmingham saacadu markii aay aheyd 8:30pm.

Diyaariye : Abdullahi Nur | Aosman66@yahoo.co.uk

---

Shariif Xasan: Hadii dalku uu ka jiro xukun kali talis ah waa ay adkaanaysaa in Soomaalida qurbaha ay dib ugu laabtaan dalkii Hooyo.

 

Ridwan Haji Abdiweli- London
ridwanhaji@yahoo.com

02.10.2005

Xaflad Casho Sharaf ah oo Lagu soo Dhaweenayay Gudoomiyaha Baarlamanka Soomaaliya Shariif xasan Sheikh Aden iyo xubno kale oo ka tirsan Baarlamanka Soomaaliya oo ay kamid yihiin  Xildhibaan Ibraahim Xabbeeb , Xildhibaan Zakariya Xaaji, Xildhibaan Mustaf Dhuxulo ,Xildhibaan Maxamed Cabdi Yusuf , Xildhibaan Maxamed Xasan daryeel iyo Ra'isul wasaare ku xigeenkii hore ee Carta Cusmaan Jaamac kaluun ayaa Xalay ka dhacday Xaafada Harlesden Ee Magaalada London Iyadoo halkaas ay ka sugnaayeen dadwayne aad u fara badan oo ah Jaaliyadda Soomaalida ee ku nool dalkan Britain.

 

Qaar kamid ah Xildhibaanada iyo Jaaliyadda Soomaalida ayaa halkaasi kasoo jeediyay hadalo koo kooban oo ay ku cabairayeen dareenkoodii xalay iyo khilaafaadka taagan ee Dawladda waxyaabaha sababta u ah ee keenay oo si guud ay u soo bandhigeen kadibna waxaa gunaanadkii halkaasi ka hadlay Shariif Xasan Sheikh Aden oo inta badan xooga saaray waxyaabaha la isku haysto ee Madaxda Dawladda haatan ka dhexjira.

 

Shariif Xasan waxaa uu sheegay in marna aanu ka tanaazulaynin waxyaabaha mawqifkiisa ku aadan ee ah ilaalinta Sharciga Dawladda Soomaaliyeed oo uu sheegay in ay sabab u tahahay haatan is marin waaga ka dhex taagan Mas'uuliyiinta Dawladda, waxaana uu xusay in ay ugu muhiisantahay Xarunta iyo saldhiga Dawladda iyo keenitaanka Ciidamo Dariska ah.

Shariif xasan waxaa uu sheegay in Caasimadda Soomaaliya ay tahaya Muqdisho isla markaana loo baahanyahay in marka hore wax laga qabto Magaalada Muqdisho oo ay ka jiraan dhibaatooyin fara badan oo amaanku ugu horeeyo sidaasi daraadeedna hadii Muqdisho wax laga qabto ay noqonayso guul Soomaali u soo hooyatay.

 

Sidoo kale waxaa uu sheegay in Shacabka Soomaaliyeed marna aanay ogolaanayn in dalka la keeno Ciidamo ka socda Dawladaha dariska ah sida Ethiopia oo uu sheegay in gabdhuhu ay dhagaxtuuryaynayaan hadii ay dalka yimaadaan kadibna iyagu ay rasaas furayaan oo halkaasi ay ka dhalankarto dhibaato loo gaysto Ciidankaasi iyo Shacbka Soomaaliyeed.

 

Ma yeeli karno in Hal qof uu siduu doono dalka u maamulo, mana ahan wax waafaqsan sharciga noo dagan ayuu intaasi ku daray Shariifku xalay markii uu la hadlayay Soomaalidii ka soo qaybgalay Xafladii lagu soo dhoweynayay Xubnaha Dawladda ee haatan ku sugan Magaalada London.

 

Mar uu la hadlayay Jaaliyadda Soomaalida ayaa waxaa uu sheegay in sababta Soomaalidu ay dalka uga carareen ay tahay Kali talisnimadii dalka ka jirtay xiligaasi, hadii markale dalkii uu wali kasii jiro kali talisnimana aysan Qaxootigu dib ugu laaban doonin dalkoodii hooyo ee markii hore ay kasoo carareen.

 

Waxaa sidoo kale halkaasi mahadceli ka jeediyay dhamaan Dhalinyaradii soo qaban qaabisay Xafladii xalay oo ay kamid yihiin Eng Yariisoow, Cabdulaahi Taleefan, Cabdiwale Sh Cali, liibaan Sheekh Doon iyo kuwo kale oo aad u fara badan. 

 

Waraysi aan la yeeshay Shariif Xasan oo uu kaga hadli doono waxyaabo badan iyo Sawiradii Xafladaasi waxaan soo gudbin doonaan hadii uu ilaahay idmo maalmaha soo socda.

Ridwan Haji Abdiweli- London
ridwanhaji@yahoo.com

Faafin: SomaliTalk.com | Oct 2, 2005

---