WARARKA MAANTA::: Nov 28, 2005

C/llaahi Yuusuf Axmed oo ka qaybgalaya kulan lagu dhex dhexaadinayo Ismaaciil Cumar Geele iyo Milass Zanawi..

            Warar aanu ka helnay Magaalad Sanca  ee dalka Yemen waxay sheegayaan in Madaxweynaha Dowladda Federaalka C/llalahi Yuusuf uu dhawaan ka qaybgali doono kulan lagu dhex dhexaadinayo Madaxweynaha wadanka Jabuuti Ismaaciil Cumar Geele iyo Ra’isul Wadanka Itoobiya Miless Zanawi kaddib markii dhawaan labada wadan ay soo kala dhex gashay xurguf. Waxaana kalankaani uu ka dhacayaa Magaalada Sanca bisha soo socota, waxaana isugu yeeray hoggaamiyaha wadanka  Yemen Cali Cabdala Saalax. Labada Dowladood ee Jabuuti iyo Itoobiya ayaa waxay xurguftoodu ka bilaabatay dekedda dalka Jabuuti oo ah meesha ugu weyn ee Dowladda Itoobiya kala soo degto badeecooyinka iyo shidaalka, kaddib markii Dowladda Jabuuti ay kordhisay canshuurtii dekeddaasi.

Dowladda Itoobiya waxay maalmahan wax kala soo degeysay dekadda Magaalada Barbara ee Maamulka isku magacaabay Soomaaliland, hase yeeshee badeecooyinka ay haatan kala soo degeyso dekadda Barbara waa mid maraya dhul aad u fog oo nabadgelyadiisa aan la xakameyn karin, waxaana la filayaa in labada dowladood (Itoobiya & Jabuuti) ay aqbalaan dhex dhexaadinta ay wadaan Madaxweynaha wadanka Yemen Cali Cabdala Saalax iyo Madaxweynaha Wadanka Soomaaliya C/llaahi Yuusuf Axmed, iyadoo markii ugu horeysay noqon doonto 15-sano kaddib in Madaxweyne Soomaaliyeed uu dhex dhexaadin ka galo labo dowladood oo is haysta. Dowladda Jabuuti waxa ay ku andacooneysaa in canshuur kordhinta ay ka timid shirkadda maamuleysa dekadda dalka Jabuuti oo ah shirkad laga leeyahay wadanka Imaaraadka Carabta oo iyadu qandaraas gaaraya 20 sano qaadatay, waxayan labaatankaas sano dekedda Jabuuti ka dhigi doontaa dekedaha ugu casrisan Qaaradda Afrika.  

Golaha Midnimada iyo Badbaadada Soomaaliyeed oo ka soo horjeestey hadalkii.

            Golaha Midnimada iyo Badbaadada Soomaaliyeed wuxuu aad uga xunyahay, wax layaab lehna ku noqotay in Cali Max’ed Geedi oo mas’uuliyad Qaran sheeganaya uu war-baahinta Caalamka (B.B.C, 11/11/2005) ka sii daayo hadal ay ku inkirayo, ku dafirayo xaqiiqada qadiyadda aaya ka talinta gobalada Soomaaliyeed ee wali ku jira gacanta Gumeysiga laga soo bilaabo 15-kii November 1884 shirkii ka dhacay Baarliin (Scramble of Africa) ilaa hadda... [Warsaxaafadeedka oo dhan halkan ka akhri...]

Xulka Qaranka Soomaaliya oo guul ka soo hooyay kulankii Jabuuti.

Xulka Qaranka Soomaali-ya oo ka qaybgalaya tartanka Qaramada Bariga iyo Bartamaha Afrika ee ka socday wadanka Rwanda ayaa shalay kulankiisii ugu horeeyay waxa uu la yeeshay xulka wadanka Jabuuti waxaana kulankaasi ka qaybgalay dadka Soomaaliyeed ee ku dhaqan wadanka Rwanda iyo dad kale oo Soomaali ah oo ka tagay wadanka deriska la ah dalka Rwanda kuwaasoo watay calanka Soomaliya.

Cayaarta oo aad u kululeyd ayaa qaybtii hore ee cayaarta waxaa gool qurux badan u dhaliyay Xulka Qaranka Soomaaliya ciyaaryahan C/xakiim oo ah ciyaaryahan ka yimid wadanka Ingiriiska, waxaana qaybtii hore ee cayaarta lagu kala nastay hal iyo eber oo uu laha xulka Qaranka Soomaaliya.

La tashiyo kaddib waxaa la isku qaaday weerar iyo weerar celis, waxaana xulka wadanka Jabtuui u suurtagashay in ay dhaliyaan goolkii barbardhaca, wax la is hardiyo oo la is weeraraba waqtigii dheeraadka ahaa ayaa gool qurux badan waxaa u dhaliyay Xulka Qaranka Soomaaliya Ciyaaryahan Shaarkey, waxaana goolkaasi uu ahaa goolka guusha, waxayna cayaartu ku soo gebagabowday 2-1 oo uu ku adkaaday xulka Soomaaliya.

Is bedel ayaa ku yimid jadwalka Tartanka Bariga iyo Bartamaha Afrika, iyadoo markii hore loo qaybiyay saddex guruub ayaa haatan waxaa loo qaybiyay labo qaybood, qaabta A oo ay ku jirto Soomaaliya ayaa waxaa kalloo kula jira Wadamada Itoobiya, Suudaan, Uganda iyo Jabuuti.

Is bedelka Jadwalka waxaa keenay kaddib markii tartanka uu ka haray xulka Qaranka Wadanka Kenya oo uga haray sababo dhinaca dhaqaalaha ah.

Kulanka labaad xulka Qaranka Soomaaliya waxa uu la ciyaari doonaan maalinta berito ah xulka Wadanka Suudaan oo ah xul aan la dhayeelsan karin.    

Shiiikh Muxiyadiin Shiikh “Shiikh Max’ed Faarax waxa uu ahaa nin soo dhaweeyay Soomaaliyoo dhan, maantana dadkii uu maalkiisa ku sharfay ma dhici karaan

            Shiikh Muxiyadiin Shiikh Max’ed Faarax oo ah Curadkii Shiikh Max’ed Faarax ayaa shir jaraa’id oo uu shalay ku qabtay Magaalada Muqdisho uu kaga hadlayay xerada la isku haysto ee  ku taala Degamada Wardhiigley ayuu ku sheegay in Aabbihiis Shiikh Max’ed Faarax uu ahaa nin Mu’min ah oo wax bixin jiray, dadkana aamini jiray “haddaba ahan waqtigi xaadirkaan in dhulka lagu jiido oo isagii iyo Kheyrkii uu waday meel looga dhaco” ayuu yiri Shiikh Muxiyadiin oo hadalkaas ula jeeday shir jaraa’id oo uu dhawaan isna qabtay Max’ed Shuqul Shiikh Aadan Dheere oo sheegay in iyagu ay leeyihiin xeradaas, balse Shiikh Muxiyadiin waxa uu sheegay in Aabbihiis uu aaminay Shiikh Aadan Dheere, isagana uu soo korsaday gabdhihiisa uu ku daray oo carruur u dhaleen, sidaas owgeed ayuu ku sheegay in aan haatan dambi laga gelin Shiikh Max’ed Faarax oo loo daayo meeshii uu diinta ku fidinayay, “dad diinta fidiyana waa uu ka tagay” ayuu yiri Shiikh Muxiyadiin. Sidoo kale Shirkaas jaraa’id waxa uu uga hadlay isagoo garbihiisa ay fadhiyeen qaar ka mid ah carruurtii Shiikh Max’ed Faarax oo ay ka mid ahaayeen Cali Shiikh Max’ed Faarax iyo C/risaaq Shiikh Max’ed Faarax ayay baaq waxay ugu soo jeediyeen xertii Shiikh Max’ed Faarax in ay yimaadaan xarunta Madaxweynaha Dowladda Federaalka Soomaaliyeed, isagoo ugu baaqay Dowladda Federaalka in ay shacabka Soomaaliyeed daacad u noqoto oo wax Alla iyo wixii ay mucaawino ku soo helaan ay shacabkooda dhiban ay wax ugu qabtsan, si loo helo dad la aamin karo iyo dad wax aaminaba ayuu hadalkiisii ku soo gebagabeeyay Shiikh Muxiyadiin Shiikh Max’ed Faarax oo shirkaas Jaraa’id ku qabtay xarunta Shiikh Max’ed Faarax ee Isxijiwaaq ee xaafadda Gubta  Isxijiwaaq ee ku taala xaafadda Gubta, inta laga xalinayo buuqa xarunta Wardhiigley. Wuxuu ugu dambeyntii baaq u soo jeediyay dhamaan Shacabka soomaaliyeed oo uu ugu baaqay in ay taageeraan Madaxweynaha iyo Ra’isul Wasaaraha iyo Ra’isul Baarlamaanka, isagoo ducoo dheer Illaahey uga baryay ummadda Soomaaliyeed in towfiiq hal ah siiyo, oo dowlad caadil ah Illaahey uga dhigo dowladaan.

            “Ma aheyn markii hore in la soo doorto Madaxweyne iyo  Ra’isul Wasaare iyo Guddoomiye Baarlamaan haddii la diidayo” ayuu yiri Shiikh Muxiyadiin Shiikh Max’ed Faarax oo aad ugu nuux nuuxsaday in la taageeryo