::: SomaliTalk.com :::

Daabaco Boggan | Print

MUQDISHO::: Xubnaha Labada oo Cambaarayn Kulul u soo Jeediyey Hadalkii Geeddi
Kulan ay maanta Hotel Saxafi ku yeesheen xubnaha labada gole ee ku xugan Muqisho ayaa lagu soo dhisay guddi kaddib markii.. Guji

Cali Maxamed Geedi oo Maamulka Puntland uga Baxay Eayadii ku Qornaa Warqad Qarsoodi ahayd oo uu Qoray
Warqadaas oo uu Ra'iisul wasaaraha DFKMG ku... Guji...

Madaxweyne ku xigeenka Puntland Xasan Daahir (Af-qurac) ayaa si weyn u dhaliilay hadalkii dhawaan ka soo yeeray Ra’isul Wasaare Geedi. Guji...

Madaxweyne Gaaray Hadafkiisii (mission accomplished) iyo Khudbadiisii Xusuusta Reebtay. Guji | Wardheere

Qosolka Dhurwaaga ragba run u moodey
Maamulka Tigreyga ee uuhogaaminayo Mudane Mele Zanawi waxey taageero maaliyadeed ka heshaa ururada sirdoonka kuwa dunida ugu waaweyn Guji

Xaflado-Sharafeed Uu u-qabtay Qusulka Kenya Ee Magaalada Karachi Danjiraha Soomaaliya u fadhiya Pakistan oo ka dhacday Magaalda Karachi ee Waddanka Pakistan.

(Sannad-kaan wuxuu u muuqdaa sannad aaran ah, ee uma muuqdo sannad abaar ah). Sidaas waxaa yidhi Danjiraha Soomaaliya u fadhiya Pakistan, Mudane: C/Salaan Axmed Xaaji Liibaan.

(Mushkiladda Soomaaliya waxay salka ku haysaa JAHLI iyo MASKAX aan furnayn). Sidaas-na waxaa yidhi Qunsulka Kenya u fadhiya Magaalda Karachi ee waddanka Pakistan, Dr. Maxamed.

Waxaa Galinkii hore iyo kii dambe ee Jimcaha (Nov 11, 2005) lagu qabtay Magaalada Karachi ee waddanka Pakistan labo Xaflado-sharafeed oo uu u dhigay Qunsulka Kenya ee Magaalada Karachi, Dr. Maxamed Axmed Maxamed (Dhuun-qooye) Danjiraha Soomaaliya u fadhiya waddanka Pakistan, Mudane: C/Salaan Axmed Xaaji Liibaan.

Xaflado-sharefeed-kaan oo si heer-saraa loo soo agaasimay ayaa tan galinkii hore ee Jimcaha oo ka dhacday Gymkhana Club, waxaa ka soo qayb-galay ganacsatada Pakistan ee wax u dhoofisa waddanka Soomaaliya, gaar ahaan kuwa dhoofiya:- Dawooyinka, Bariiska, iyo Dhammaan alaabaha kala duwan ee lagu warshadeeyo Pakistan. Mudana C/salaan oo qudbad kooban halkaas ka soo jeediyey ayaa wuxuu ugu horreyn u mahad-naqay Qunsulka Kenya Dr. Maxamed, ee asagu suuro-galiyey xafaladdan ay ku kulmeen Safiirka iyo Ganacsatadu, wuxuu kaloo mahad balaadhan u naqay ganacsatadii ka soo qayb-gashay xafaladdaas, wuxuu kaloo safiirku ka sheekeeyey taariikhda xidhiidh-wadaagga labadal -Soomaaliya iyo Pakistan- wuxuu sidoo kale safiirku kala hadlay ganacsatada in ay tagaan Soomaaliya oo ay xarumo ganacsi ka samaystaan, si buu yidhi ganacsiga labada dal uu u noqdo mid toosa (Dal-ka-dal), oo jiidhadka Dubai looga baxo.

Safiirku wuxuu ganacsatada kala hadlay; in aysan Soomaaliya u dhoofin alaabo tayo-daran iyo alaabo dhicitaan-koodu dhow-yahay ama dhacay-ba, wuxuuna ka codsaday in alaabaha ay Soomaaliya u qaadayaan ay taya-dooda wanaajiyaan, isagoo dhanka kalana ganacsatada u sheegay in alaabaha ay Soomaaliya u dhiifinayaan imminka wixii ka dambeeya lamarin-doono sheybaarro, wuxuuna yidhi safiirku "Waxaan idiin sheegayaa Imminka wixii ka dambeeya cid aan haysanin Shahaadada heerka tayo ee caalamigaa (International Quality Standard Certificate - ISO 2000) in aysan Soomaaliya wax-ba u dhiifin kadhin".

Mar ay ganacsatadii xafladdaas ka soo qayb-gashay wax ka waydiiyeen safiirka walxaha ay Soomaaliya soo-saarto, ayuu safiirku wuxuu sheegay in ay Soomaaliya dhoofiso:- Xoolaha, Hargaha, iyo Mooska, waxayna ganacsatadii safiirka u sheegeen in ay Soomaaliya ka iibsadaan Hargaha laakiin si qaali ah ay ugu timaaddo Pakistan, iyadoo kol hore Soomaaliya laga soo qaado, oo Dubai la keeno, dabadeedna ay Dubai ka soo iibsadaan; taasoo ay dheheen haddii Soomaaliya iyo Pakistan xidhiidh toosa uu ka dhexeyn-lahaa ay si toosa uga soo iibsan lahaayeen Soomaaliya, qadhashkaasina uu yadhaan lahaa.

Qunsulka Kenya Dr. Maxamed, oo isna halkaas ka hadlay ayaa mahad-naq uu celiyey Sifiirka Soomaaliya iyo Ganacsatada-ba kaddib, wuxuu aad ugu dhiirro-galiyey ganacsatada in ay ganacsiga ay Afrika la leeyihiin balaadhiyaan, wuxuuna yidhi “Waa in aad la sameysaan ganacsatada Afrika wada-shaqayn ganacsi oo koofur-ka-koofur ah (South-To-South Business Co-operation)”.

Dhanka kale xafdalo-sharafeed-kaas tii galinkii dambe ee Jimcaha, oo aanan tii galinkii hore ka dhicin, oo lagu qabtay Mehran Hotel ayaa waxaa ka soo qayb-galay inta badan ardeyda wax ka barata Jaamacadaha kala duwan ee Gobolka Sindi heerar-kooda kala duwan, waxaa kaloo kasoo qayb-galay Qunsul-sharafeed-ka safaaradda Soomaaliya, Mudane: GR. Arshad, waxaa kaloo ka soo qayb-galay wasiiro dowlaha Dalxiiska, Dhaqanka, arrimaha dhallin-yarada iyo ciyaaraha ee Sindi, Mudane. Qamar Mansuur oo isagu kol-kii hore-ba ku soo dhaweeyey safiirka Magaalada Karachi.

Qacda hore-ba waxaa xafladdii furay qunsulka Kenya ee Magaalada Karachi, Dr. Maxamed, wuxuuna Qunsulku u mahad-celiyey Safiirka Soomaaliya, Mudane. C/salaan iyo wasiiro dowlaha Gobalka Sindi Mr. Qamar, wuxuu sidoo kale u mahad-celiyey qunsul-sharafeed-ka safaaradda Soomaaliya, GR. Arshad, wuxuu sidoo kale u mahad-celiyey dhammaan ardeydii ka soo qayb-gashay xafladdaas iyo waliba kuwii aanan nasiib u-helin in ay ka soo qayb-galaan.

Wuxuu qunsulku ku dheeraaday taariikhda safiir C/Salaan, wuxuuna sheegay in uu safiirku yahay “Wadani”, kuna soo jidhay maamulka dalka Soomaaliya tan xornimadii, wuxuuna sheegay qunsulku in uu safiirku dalka Soomaaliya dibaddiisa iyo gudihiisa-ba uu jagooyin kala duwan ka soo qabtay, jagoyinkii uu soo qabtay waxaa kamid ahaa: Wuxuu safiirku kol ahaa Madaxa Baratakoolka Dowladdii Soomaaliya, wuxuu soo noqday isu duwaha wasaaraddii arrimaha dibadda, wuxuuna qunsul ka soo noqday waddamo badan oo ay kamid-yihiin:- Belgium, UK, Ethiopia, Kenya iyo Tanzania, wuxuuna sidoo kale qunsulku sheegay in Danjire C/salaan loo magacaabay safiirka Soomaaliya u fadhiya waddanka Pakistan iyo shan dal oo kale oo ay kamid-yihiin:- Malaysia, Indonesia, Bangladesh Iran iyo Afghanistan 1989-kii.

Qusulka oo aad uga sheekeeyey Danjire C/salaan ayaa wuxuu ku ammaanay shaqada uu u qabtay dadka Soomaaliyeed ee ku dhaqan dalkaan Pakistan, isagoo safiiku u sooro-galiyey ardeyda Soomaaliyeed in ay maddooyin qaali ah, oo aan meel kale Soomalidu ka helin, ay halkaan ka helaan sida maaddooyinka Science-ka.

Wuxuu qunsulku ugu dambayntii u soo jeediyey dhamman ardeydii ka soo qayb-gashay in ay ku dadaalaan wax-barashada. “Mushkiladda Soomaaliya waxay salka ku haysaa JAHLI iyo MASKAX aan furnayn, waxaa waajib idinka saaranyahay naftiinna, dalkiinna, dadkiinna in aad horumar gaarsiisaan” ayuu yidhi Qunsulka Kenya u fadhiya Magaalad Karachi Dr. Maxamed, isagoo la dar-daarmayey ardaydii halkaas ka soo qayb-gashay.

Wuxuu qunsulku Cod-baahiyihii ku soo dhaweeyey Safiirka Soomaaliya Mudane. C/Salaan Axmed Xaaji Liibaan, wuxuu safiirku - mahad-naq ballaadhan oo u soo jeediyey Qunsulka Kenya, Qunsulka-sharafeed-ka safaaradda Soomaaliya iyo dhammaan ardeydii ka soo qayb-gashay kaddib - ka warramay guud ahaan xaaladda Soomaaliya meesha ay madhayso, wuxuu kaloo safiirku ka waramay safaaradda Soomaaliya iyo hannaanka siman ee ay ugu adeegto dhammaan ardeyda Soomaaliyeed, isagoo safiirku sheegay in ay Pakistan tahay meesha kaliya ee ay ardeyda Soomaaliyeed ka helaan wax-barashada culuumta qaaligaa ee science-ka, wuxuu safiirka u soo jeediyey ardeyda in ay si deggan ula dhaqmaan ummadda ay la nool-yihiin, si naxariisi ku dheehan-tahayna ay ula macaamil-tamaan qunsul-sharafeed-ka Safaaradda Soomaaliya Mr. GR. Arshed, isagoo safiirku dareen-siinayey ardeyda in aysan isaga kala darman qunsul iyo qunsul-sharafeed.

Sifiirka oo aad ula dhacay bilic-samaad-ka kamuuqatay ardeydii halkaas isugu timid ayaa wuxuu yidhi “Sannad-kaan wuxuu u muuqdaa sannad aaran ah, ee uma muuqdo sannad abaar ah, intiiinnaan ardey, oo manta fursad u helay in ay wax-bartaan xilli ay Soomaaliya xaal-keedu meel xun marayo, wuxuu u muuqdaa sannadku in uu aaran-yahay”.

Waxaa kaloo isna halkaas ka hadalay qunsul-sharafeed-ka safaaradda Soomaaliya Mudane: GR. Arshed, wuxuuna u mahad-naqay qusul-sharafeed-ku, Safiirka Soomaaliya, qunsulka Kenya iyo dhammaan marti-sharafkii ka soo qayb-galay xafladdaas, wuxuuna qunsulku aad ugu dheeraaday sababihii uu ku noqday Qunsul-sharafeed-ka iyo waliba howlihii uu qaban-jidhay xilligii ay dowladdu jidhay, “ Haddii aad wax dhiba dareentaan fadlan ila soo xidhiidh-siiya” ayuu Mr. Arshed hadalkiisii sii dabadhigay.

Gaba-gabadii xafladda ayaa safiirka Soomaaliya iyo Qunsul-sharafeed-ka safaaadda Soomaaliya ay jadheen Doolshe, halkaas oo dhammaan marti-sharaf-kii ay ku nasteen cashadii loogu talo-galay xafladdaas.

Xafladdii markii ay dhammaartay ayaan waxaan si gaadha ula kulmay qunsulka Kenya u fadhiya Karachi, Dr. Maxamed, waxaana waydiiyey dhowr su’aalood, waxaana u waydiiyey sida tan:-

S. Nayruus: Dr. Maxamed waad salaaman-tahay.
Dr. Maxamed: Walaal waan kaa qaaday.
S. Nayruus: Xafladdaan yaa dhigay?
Dr. Maxamed: Xafladdaan aniga aya dhigay.
S. Nayruus: Oo maxaad u dhigtay?
Dr. Maxamed: Walaal, sida lawada ogsoon-yahay safiir C/Salaan wuxuu hayaa jagooyin badan, wuxuu guddoomiye u yahay safaaradaha Waddamada Afrika iyo carabta ee Pakistan, wuxuu kaloo guddoomiye ku xigeen u kayahay dhammaan safaaradaha waddamada adduunka ee Pakistan jooga, maadaama uu yahay nin qaali ah ayaan waxaan jeclaystay in aan guddoomiyaha u dhigo xafladdaan, waxaan kaloo ugu tala-galay xafladdaan in ay ka faa’iidaystaan dhammaan ardeyda Soomaaliyeed ee ku sugan Gobalka Sindi waanooyinka wax ku ool kaa ee safiirka.
S. Nayruus: Waxaa jidha dad aanan ka soo qayb-galin xafladdaan oo ay kamid-yihiin odayaasha faro-ku-tiriskaa ee jooga magaaladan iyo qaar kamid ah ardeyda wax ka barata isla Gobolka Sindi, kolka miyaadan dadkaas ku casuumin?
Dr. Maxamed: Walaal, xafaladdan horta waxaa loogu tala-galay ardeyda, ardeyda joogta Gobalkaanna waan xisaabinnay kolka waxay tiradoodu gaadhay ilaa 109, dhammaanna waan ku casuunnay.
S. Nayruus: Oo maxay uga soo qayb-gali waayeen haddii aad ku casuuntay? Mise kula soo xidhiidheen?
Dr. Maxamed: Haa walaal way ila soo xidhiidheen intii aanan ka soo qayb-galin, waxayna ii sheegeen in ay ku mashquul-sanyihiin imtixaanno.
S. Nayruus: Dadka qaar haddii ay is-waydiiyaan, xafladdaan waxaa dhigay dad gaara, waxaana loo dhigay dad gaara, maxaad uga jawaabi lahayd tuhmadaas?
Dr. Maxamed:Walaal kolnaba ma dhici karto tuhmadaas, maxaa yeelay, anagu haddii aan-nu nahay Kenya, Soomaalidu waa wada walaalaheen, waana isugu kaaya mid, wax walbana waxaan-nu dhex-dhexaad uga nahay sidii aan-nu dhex-dhexaad uga ahayn shir weynihii nabadaynta ee dalka Soomaaliya aan-nu u-qabanay.
S. Nayruus: Waad mahad-santahay Dr. Maxamed.
Dr. Maxamed: Adiga ayaa mudan.