::: SomaliTalk.com :::

Ra'iisul Wasaaraha Soomaaliya oo ka badbadey isku Day Dil....

Muqdisho | Nov 6, 2005

War Degdeg ah::: Ra'iisul wasaaraha DFKMG ee Soomaaliya, Cali Maxamed Geeddi, ayaa maanta (Isniin Nov 6) ka badbadey qarax bombaano oo lala beegsaday gawaaridii waftiga Ra'iisul wasaaraha oo maanta soo gaarey Magaalada Muqdisho.

Wararka ugu horeeya ayaa shegay in saddex qof ay ku dhinteen, tobaneyo qof oo kalena ay dhaawacmeen, kaddib markii bombaanadaasi ay haleeshay mid kamid ah gawaaridii waftiga kasoo gelbinayey garoon u dhow magaalada Muqdisho. Ra'iisul wasaare Geeddi waxa uu kasoo kicitimay magaalada Jawhar oo ah xarunta Kumeelgaarka ah ee DFKMG.

Dhaawacii iyo dadkii qaraxaas ku dhintay waxaa la geeyey hoteelka Ramadaan ee magaalada Muqdisho.

Ilaa hadda ma jiraan cid sheegatay qaraxaas in ay ka dambeeyeen.

Waftiga Ra'iisul wasaaraha waxaa kamid ah xubno ka tirsan DFKMG oo ay kamid yihiin Mowliid Macaani, Cabdallah Deerow Isaaq, Cabdullaahi Cosoble Siyaad iyo madax kale.

Bishii May ee sannadkan ayey ahad markii bombaano lagu qarxiyey Muqdisho, Bomkaasi wuxuu ku qarxay Garoonka Ciyaaraha Muqdisho oo uu markaas ka khudbaynayey Ra'iisul wasaaraha DFKMG, waxaana ku dhintay 10 qof, waxaa dhaawacmay 28 qof.. Eeg halkan...

SomaliTalk.com | Nov 6

Digniin loo jeediyey Urur Goboleedka IGAD..
Xasaraddi ka taagneyd Isgooyska Lambar-4 oo la xaliyey..
Shirkadaha Maraakiibta oo laga cabsi qabo in ay joojiyaan tagista Soomaaliya..
Guddoomiyaha Baarlamaanka oo ku soo jeeda Kismaanyo..
Ganacsato Soomaaliyeed oo ku sugan wadanka Imaaraadka oo ka codsadey dowladda Imaaraadka Carabta..
Cudurka Shuban-Biyoodka oo ka dilaacay Muqdisho..

Digniin loo jeediyey Urur Goboleedka IGAD..

Kulan ay shalay isugu yimaadeen xubnaha labada Gole ee ku sugan Magaalada Muqdisho kana dhacay Hotel Saxafi ayaa waxaa looga hadlay arrimo fara badan oo la xiriira shir la sheegay in wasiirada arimiha dibadda ee IGAD ku qabsanayaan Jowhar iyo lacago been abuur ah oo ay soo daabaceen xubnaha Dowladda ee ku sugan Magaalada Jowhar. Dood dheer iyo falanqeyn kaddib waxaa markii dambe saxaafadda war kooban siiyay afhayeenka labada Gole ee Muqdisho Cumar Xaashi Aadan waxa uuna sheegay in xubnaha labada Gole ay uga digeen IGAD in ay shir ku qabsato Magaalada Jowhar, “Haddii shirkaasi ay IGAD ku qabsato Magaalada Jowhar, waxaan u aqoonsaney-maa in aysan dhex dhexaad ka ahayn arrimaha Soomaaliya” ayay yiraahdeen xubnaha labada Gole ee Muqdisho. Waxay kalloo sheegeen in IGAD ay la safatay garab ka mid ah garabyada Dowladda ee isku haya maamulka Dalka, iyagoo ugu baaqay Dowladaha IGAD in ay ka fiirsadaan qabsoomidda shirakasi. Waxaa kalloo xubnaha labada Gole ka doodeen lacago been abuur ah oo ay soo sameysteen kooxda Jowhar waxayna lacagahaasi sheegeen in lagu farsameeyo Magaalada Boosaaso lana doonayo in lagu sameeyo sicir-barar, taasoo ay sheegeen in ay dhibaato ku tahay shacabka Soomaaliyeed. Sidoo kale waxay cambaareeyeen xasuuqa Ciidamada Itoobiya ay ka gaysteen Magaalada Adis-Ababa waxayna ku tilmaameen mid ka hor imaaneysa Dimuquraadiyadda iyo xaquuqda aadanaha.

Iyadoo habeen hore Isgooska Lambar-4 ee Magaalada Muqdisho uu iska hor imaad ku dhex maray kooxo maleeshiyo ah iyo ciidamo ka socday Maxkamahada Islaamiga ah ee Furqaan, waxaana iska hor imaadkaasi ciidamada Maxkama-daha Islaamiga ah lagaga qabsaday Gaari nooca Cabdi-Bilaha ah oo uu ku rakibnaa qoriga Dhashiiga ah, waxaana lagaga dhaawacay saddex, hase yeeshee mas’uuliyiinta Maxkam-adda Islaamiga ah ee Al-Furqaan ayaa waxay ku eedeeyeen in iska hor imaadkaasi ay ku lug lahaayeen maleeshiyo daacad u ah ganacsade C/rashiid Ilqeyte, waxayna mas’uuliyiinta Maxkamaduhu ku hanjabeen in ay weerari doonaan Hotelka Saxafi iyo waliba gacan ku haynta Isgooska Lambar-4.

Dadaal ay sameeyeen waxgarad iyo siyaasiyiin ku nool Magaalada Muqdisho ayaa waxay ku guuleysteen in xiisaddaaasi ay qaboojiyeen iyadoo la filayo in maanta laga wada hadlo wixii khasaare ah ee ka dhashay iska hor imaadkaas.

Shirkadaha Maraakiibta oo laga cabsi qabo in ay joojiyaan tagista Soomaaliya..

Warar aanu ka helnay dalka Imaaraadka Carabta waxay sheegayaan in Shirkadaha Maraakiibta ee Ganacsiga u soo aada Soomaaliya in ay ku tala jiraan in ay gebi ahaanba joojiyaan safarka ay ku imaanayaan xeebaha Soomaaliya, ha noqoto deegaanada Gobalada W/Bari ee Puntland iy Koonfurta Soomaaliya kaddib markii ay sii korodhay kooxaha burcad Baddeedka ee ka qowleysata xeebaha Soomaaliya.

Haddii go’aankaani ay qaataan shirkadaha Maraakiibta waxaa laga cabsi qabaa in Ganacsato fara badan ay joojiyaan ganacsigii dhinaca badeecadaha ay u soo diri jireen Soomaaliya.

Shacabka Soomaaliyeed meel kasta oo ay joogaan ayaa waxaa laga doonayaa in ay guntadaan sidii looga hortagi lahaa kooxahaasi, maadaama ay soo wadaan cunaqabteyn dhinaca badeecadaha ah.

Dhawaan ayaa Dowladda Kenya waxay Maraakiibteeda uga digtay in ay u safraan xeebaha wadanka Soomaaliya, iyadoo Xeebaha Puntland iyo Xarardheere lagu kala haysto dhowr Markab oo labo ka mid ah lagu haysto Xeebta Eyl, labada kalana waxaa lagu haystaan Xeebta Gaan ee Gobalka Mudug gaar ahaan xeebaha Xarardheere.

Wararka naga soo gaaraya Magaalada Kismaayo waxay sheegayaan in Magaalada Kismaayo gaar ahaan isbahaysiga Dooxadda Jubba ay diyaar-garow ugu jiraan soo dhaweynta Guddoomiyaha Baarlamaanka Shariif Xasan Shiikh Aadan oo maalmaha soo socda soo gaari doona Magaalada Kismaayo kaddib markii uu martiqaad ka helay Wasiikra dib u dhiska iyo dib u dejinta Barre Aadan Shire (Barre Hiiraale). Waxaa lagu waramayay in Guddoomiyaha Baarlamaanku uu halkaasi u tagayo dhex dhexaadin uu wado Barre Hiiraale oo la xiriirta sidii loo soo afjari lahaa khilaafka u dhexeeya Dowladda Federaalka gaara haan Madaxweynaha iyo Guddoomiyaha Baarlamaanka.

Ergo ka socota Barre Hiiraale ayaa Magaalada Nairobi kulan kula yeeshay Guddoomiyaha Baarlamaanka Shariif Xasan Shiikh Aadan, waxaana la sheegay in Guddoomiyaha Baarlamaanku uu aqbalay in la dhameeyo khilaafka u dhexeeya Dowladda Federraalka.

Ganacsato Soomaaliyeed oo ku sugan wadanka Imaaraadka oo ka codsadey dowladda Imaaraadka Carabta..

Maalintii shalay ahayd ayaa kulan ka dhacay Magaalada Dubai ee dalka Imaaraadka Carabta ayaa ganacsatada Soomaaliyeed waxay uga hadleen canshuur uu damacsan yahay Madaxweyne C/llaahi Yuusuf Axmed, taasoo la doonayo in laga qaado ganacsatada Soomaaliyeed ee badeecooyinka kala duwan u qaada Soomaaliya.

Kulankaas oo qaatay dhowr saacadood ayaa aaqiritaankii waxaa la isku afgartay in warqad cabasho ah loo diro Dowladda Imaaraadka Carabta taasoo lagu codsanayo in ay dhex dhexaad ka noqoto ishaysiga u dhexeeya xubnaha Dowladda.

“Diyaar ayaan u nahay in aan bixino canshuur, laakiin, waxaa taa ka horeysa in marka hore ay heshiiyaan garabyada Dowladda” ayay ku yiraahdeen qoraalkooda, ganacsatada oo intaa raaciyay “haddii aan garab keliya siino canshuurta waxay keeneysaa in garabkaasi uu lacagtaasi u adeegsado hub iyo saanad la doonayo in lagu gumaado shacabka Soomaali-yeed”.

Waxay ganacsatadu ku sheegeen qoraalkooda in loo baahan yahay in dalka Imaaraadka Carabta uu fuliyo shuruucada canshuuraha u degsan adduunka ee ah in dal xor ah canshuurtiisa lagu qaado dal kale, waxaana la filayaa in ganacsato ay maalmaha soo socda ay kulan kale isugu yimaadaan.

Iyadoo maalmahan lagu jiro waqtiyadii kuleylaha ayaa haddana waxaa shalay iyo doraad isa soo taraya dadka uu soo radanayo cudurka Shuban-Biyoodka oo la sheegay in ay u badan yihiin carruur aad u yar yar.

Hooyo dhashay saddex carruur ah ayaa mid ka mid ah shalay ugu geeryooday isbitaalka Banaadir cudurka Shuban-Biyoodka, iyadoo labadii kale dhakhaatiirka ka howlgasha Isbitaalkaasi ay ku howlan yihiin sidii loola tacaali lahaa.

Dhakhaatiirka ka howlgasah Isbitaalka ayaa waxay sheegeen in Isbitaalka labadii maalmood ee ugu dambeysay la soo gaarsiiyay ilaa iyo 26 qofood oo la il daran cudurka shuba-Biyoodka, ilaa haatanna baaritaan rasmi ah laguma sameyn in cudurkaasi yahay Shuban-Biyood iyo in uu yahay Daacuun, maadaama ay dhowr qo u dhinteen.

Dhakhaatiirka ayaa ku howlan sidii saamiga looga qaadi lahaa dadka uu soo ritay cudurkaasi si loo ogaado in Cudurku u yahay mid halis ku ah dadweynaha ku nool Magaalad Muqdisho, waxay kalloo dhakhaatiirku sheegeen in in Isbitaalka Banaadir ay haatan gabaabsi ku tahay daawooyinka lagula tacaalayo cudurka Shuban-Biyoodka.

Waqtiyada Kuleylaha ayaa waxaa Magaalada Muqdisho iyo qaar ka mid ah Gobalada dalka la arkaa in dad fara badan uu soo rito cudurka Shuban-Biyoodka, waxaana looga hortagi karaa iyadoo qofka uu soo rito cudurku la siiyo Daawada Shifo ama ORS haddii qofku uu ku sii kordho xanuunka waxaa loo baahan yahay in loola cararo goobta caafimaad ee ugu dhow