• Somalitalk, Khartoum | Jun 27, 2005

Ururka ardeyda jamhuuriyadda Jabbuuti ayaa wuxuu munaasabad qurux badan oo si heer-qaran ah loo soo qaabeeyay xalay ku qabtay daarta weyn ee shirarka caalamiga ah ee Ribaad oo ku dhaxtaalla kulliyadda akadheemiyada  booliska qaranka waaxdeeda tababarrada war-isgaarsiinta. Munaasabadan sida  wacan loo soo agaasimay ayuu ururku ugu dabbaaldagayay sannadguuradii sideed iyo labatanaad ee gobonimada jamhuuriyadda Jabbuuti. Waxaana goobta ka baxayay heeso waddani ah oo ka turjummayay qaalinnimada gobonimada iyo madaxbannaanida, waxaana ka mid ahaa kuwa uu curiyay abwaanka weyn ee rugcaddaaga ah ee reer-Jabbuuti md. Caligaab. Waxaa kaloo goobta lagu soo bandhigay riwaayad ka hadleysay halgankii gobonimodoonka ahaa ee lagu waayay geesiyaasha iyo halkaraannada ee dalka lagaga xoreeyay gummeystihii Faransiiska iyo maanta marxaladda dhaqan-dhaqaale ee dalka uu ku suganyahay. waxaa kaloo madasha lagu xusay taariikhda iyo barta ay Jabbuuti dhacda oo uu ka hadlay mudane Jammaal Cabdullaahi Cumar.

Dhanka gabdhaha waxaa hadalmurtiyeed gaaban goobta ka jeedisay Ifraax Cumar oo ka hadashay waxa ay xorriyaddu tahay iyo qiimaha gaarka ah ee ay xambaarsantahay iyo sida ay reer-Jabbuuti ugu soo halgammeen dhiigoodana ugu hurreen dalkooda hooyo. Waxaa kaloo la soo bandhigay ciyaaraha hiddaha iyo dhaqanka ee jamhuuriyadda Jabbuuti iyo gabayo door ah. Waxaa madasha joogay martisharaf ay ka mi ahaayeen mudane Xuseen Cabdi Xalane [sarkaal ka u shaqeeya hayadaha sammafalka ah] iyo abwaan Maxamed Cabdiqaadir Daauud [Stanza] oo madasha lagu martiqaaday kana jeediyay gabay uu ku xusayay maalinta weyn ee xorriyadda Jabbuuti.

Ugu dambeyntii waxaa hadallo soodhaweyn iyo mahadnaq isugu jiray soo jeediyay guddoomiyaha ururka ardeyda Jabbuuti md. Xarbi Aadan Axmed iyo wakiil ka socday safaaradda Jabbuuti ee Qaahira mudane Cismaan Cumar; halka dhanka Soomaalida uu u hadlay ustaad Cabdiqaadir Xirsi oo ah bare kuliyadda jiyoolajiga [Geology] ka dhiga Jaamacadda Caalamiga ah ee Afriga.