Barnaamijkii Radio Xoriyo
14Jun.2005
-
Odeyaal dhaqameedyo
reer Ogaadeenya ah oo dawlada Itoobiya canbaareeyay.
-
Jaaliyadda Ogaadeenya
ee Minnesota oo warqad cabasho ah Maraykanka u gudbisay.
-
Jaaliyada London oo
shir u qabatay aqoonyahanka iyo Indheergaradka
Ogaadeenya.
-
Xukuumadda itoobiya
oo xabsiyada ku haysa kumanaan qof.
-
Iyo Barnaamijkii
Aragtida Halgamaaga oon ku eegayno qulquladaha Itoobiya.
======================
Hoggaamiye dhaqameedyo ka
kooban 33 oday dhaqameed oo reer Ogaadeenya ah ayaa dhawaan
soo saaray baaq kulul oo ay kaga cabanayaan dhibaatooyinka
lagu hayo dadkooda iyo dalkooda, waxayna xukuumadda Itoobiya
ugu baaqeen inay is-beddal degdeg ah ku samayso siyaasadeeda
ku wajahan Ogaadeenya.
Odeyaal dhaqameedyadu waxay
sheegeen in dadwaynaha Ogaadeenya ayna haysanin xuquuqdii
asaasiga ahayd ee ay xaqa ulahaayeen sida ku cad dastuurka
magac u-yaalka ah ee Itoobiya u yaalla. Odeyaashu waxay
bayaankoodan ku cadeeyeen in deegaanka Ogaadeenya uusan
xisbi iyo dawlad hoosaad midna ka jirin, arrintaasna ay
xukuumadda Itoobiya ka dharagsan tahay.
Odeyaashan ayaa sheegay inay mawqifkooda iyo aragtidoodaba
horay u gaadhsiiyeen xafiiska keligii taliye Meles Zenawi.
Waxay kaloo sheegeen hogaamiye dhaqameedyadu in xukuumadda
Itoobiya ay ka ballanqaaday inay dhibaatooyinkooda wax ka
qabanayso, ayna u soo diri doonto Ogadenya wafti
dhibaatadaas u kuur-gala, hase yeeshee ay ogaadeen in
xukuumaddu ayna doonayn inay wax ka beddasho falalkii
bulshada Ogaadeenya horay loogu khiyaamaynayay.
Odayaal dhaqameedyadaas ayaa shaaca ka qaaday in dadwaynaha
Soomaalida Ogaadeenya aan loo oggolayn inay doortaan cidda
ay iyagu doonayaan, balse lagu qasbayo shakhsiyaad ay
xukuumadda u soo arkeen saraakisha sarsare ee xisbiga hadda
haysta talada Kililka. Waxay kaloo odeyaashu ka cawdeen in
sannadkan shaqooyinkoodii laga caydhiyay in ka badan kun qof
oo soomaali ah, iyadoo shaqooyinkoodii loo dhiibay dad aan
soomaali ahayn. Odeyaashu waxay dadwaynaha Soomaalida
Ogaadeenya ugu baaqeen inayna codkooda ku dhiibin
caga-juglaynta iyo cabsida lagu hayo ee ay doortaan cidda ay
is-leeyihiin danta dalka ayay ka shaqaynayaan.
Jaaliyadda Ogaadeenya ee Minnesota oo warqad cabasho ah
Maraykanka u gudbisay.
Jaaliyadda Soomaalida Ogaadeenya ee Minnesota ayaa si rasmi
ah ugu gudbisay senatorkooda cabasho ka dhan ah xukuumadda
Itoobiya. Jaaliyaddu waxay sheegtay in xukuumadda Itoobiya
ay si aad u xun ula dhaqanto dadwaynaha Soomaalida
Ogaadeenya.
Waxay kaloo sheegtay jaaliyadu in doorashadii ka dhacday
Itoobiya aanay weli kaba dhicin dhulka Ogaadeenya, isla
markaana ay weriyeyaashii caalamiga ahaa iyo kormeerayaashii
caalamiga ahaaba ka soo dhoofeen dalka Itoobiya oo aanay
tegi doonin dhulka Ogaadeenya marka laga qabanayo doorashada
la sheegay inay ka dhici doonto.
Jaaliyaddu waxay kaloo intaas raacisay in madaxweynihii hore
ee Maraykanka Jimi Carter uusan fahamsanayn xaqiiqada ka
jirta Itoobiya, gaar ahaan Ogadenya, waayo bay yiraahdeen
haddii uu ogaan lahaa ma aanuu dheheen doorashada Itoobiya
cadaalad bay ahayd.
Jaaliyaddu waxay kaloo xafiiska sanatarka u gudbiyeen
taariikhda Ogaadenya iyo dacatiga waqtiga dheer lagu hayey
Ogaadeenya.
Ugu
danbayntii waxay Jaaliyaddu ka codsatay sanatar Coleman inuu
xaqiijiyo in lacagta uu Maraykanku Itoobiya siiyo ay gaadho
dadkii loogu talagalay ee aysan xukuumadda Itoobiya ku takri
falin una isticmaalin arrimaha millitariga. Xafiiska Sen.
Coleman ayaa Jaaliyadda ka ballan qaaday inuu il gaar ah ku
eegi doono waxa ka socda Ogaadeenya.
Jaaliyada London oo shir u qabatay aqoonyahanka iyo
Indheergaradka Ogaadeenya.
Shir aad u ballaadhnaa oo ay soo qabanqaabisay Jaaliyada
Ogadeniya ee wadankan ingiriiska ayaa axaddii
taariikhdu ahayd 12 Juun 2005 lagu qabtay hool wayn oo ku
yaalla xaafada Southall ee magaalada London.
Shirkaas ay Jaaliyadu qabatay ayaa ujeedadiisu waxay ahayd
in la isugu keeno dadka u dhashay wadanka Ogadeniya ee wax
bartay kuna nool wadankaas Ingiriiska si ay isula
qaadaa-dhigaan qadiyada Ogadeniya iyo halganka hubeysan ee
maanta ka socda wadanka Ogaadeenya.
Shirkan ayaa la soo hordhigay qodobo doodeed horay loo soo
diyaariyay, waxaana aqoonyahan kasta la siiyay xilli ku
filay oo uu ku soo bandhigo aragtidiisa iyo mawqifkiisa ku
aaddan dagaalka hubaysan ee Jabhadda Waddaniga Xoreynta
Ogaadeenya ay kula jirto gumaysiga Itoobiya.
Aqoonyahannadii shirkaas ka hadlay waxaa ka mid ahaa Dr
Yuusuf Cadami oo aad ugu dheeraaday qiimaha Xoriyada,
waxayna aragtidiisa ku salaysnayd sharaxaad salka ku haysa
cilmiga casriga ah iyo diinta islaamka oo daaha ka rogaysa
qiimaha xoqrriyada iyo inaan xorriyada sadaqo la isu
siinin.
Waxaa kaloo halkaas hadal ka jeediyay Eng.Faarax Afey oo ka
hadlay soo yaalka taariikheed ee halgankeena iyo
heshiisyadii dalkeena lagula kala wareegay. Wuxuu kaloo
nasiib darro ku tilmaamay in qaar yar oo dadwayneheena ka
mid ahi ay aaminsan yihiin in dhibka maanta heysta
dadwaynaha Ogaadeenya ay sabab u tahay JWXO iyo dagaalka ay
gumaysiga kula jirto, wuxuuna xaqiijiyay in dhibka ummadeena
haysta uu gumaysigu saldhig u yahay.
Waxaa
kaloo isaguna madasha shirka hadal dheer ka jeediyay
Maxamed Cabdulahi oo horey madax uga ahaan jiray laanta afka
somaliga ee BBC-da. Moxamed Cabdullaahi wuxuu ka hadlay
dadkeena dhibka heysta iyo sida ayna u fahamsaneyn waxa ka
socda dhinacyadooda, waxuuna hoosta ka xarriiqay inay
khaldan yihiin dadka maanta ku doodaya inay Itoobiya nabad
oggoshahay, wuxuuna sheegay in dadkaasi ay riyo ku jiraan,
isla markaana ayna xukuumadda Zenawi hadda diyaar u ahayn
nabad ay la gasho dadwaynaha Soomaalida Ogaadeenya.
Waxaa shirkaas ka soo qayb galay qaar ka mid ah madaxa JWXO
oo ay ka mid ahaayeen Cabdiraxmaan Sh Mahdi, Dr Maxamed
Siraad Doolaal, Maxamed Cabdi Yaasiin, Maxa,ed Yuusuf iyo
Yuusuf Carab. Madaxda JWXO waxay si lagu qancay dadwaynaha
ugu faahfaahiyeen qorshaha siyaasadeed ee JWXO iyo xaaladda
dalku ku sugan yahay, waxayna ka jawaabeen su’aalihii la
weydiiyey oo dhan.
Ugu
denbayntii waxaa shirkan ka soo baxay go’aano dhawr ah oo ay
ugu muhiimsan yihiin:
1.
In aqoonyahanku isugu yimaado muddo gaaban gudaheed shir
lagu dejiyo barnaamij ballaadhan oo ku saabsan sidii wax
loogu qaban lahaa shacbiga Ogaadeenya, halgankana loogu
horumarin lahaa.
2.
In taageero buuxda la siiyo halganka ay JWXO horseedka ka
tahay.
3.Iyo in la badiyo shirarka doodda ah ee lagu horumarinayo
qadiyadda Ogaadeenya.
Xukuumadda itoobiya oo xabsiyada ku haysa kumanaan qof.
Xukuumadda Itoobiya ayaa xabsiyada u taxaabtay in ka badan
3000 oo qof oo ka mid ah taageerayaasha xisbiyada mucaaradka
ah, kuwaasoo xabsiyada la dhigay, ka dib markii uu booliska
xukuumaddu laayay dad badan oo bannaanbax samaynayay.
Golaha Xuquuqda Aadanaha ee Itoobiya ayaa sheegay in dadka
sedexda kun kor u dhaafay ee la xidhay ay yihiin dadka laga
qaqabtay caasimadda oo kaliya. Wuxuu kaloo Goluhu sheegay in
dadkii ay ciidammada ammaanku laayeen ay hadda tiradoodu
gaadhay 36 qof.
Maareeyaha Isbitaalka Minilik ee magaalada Addis Ababa ayaa
sheegay in dhimashadu ay marayso 36 qof. 35 dadkan dhintay
ka mid ah ayaa la dilay arbacadii in dhaaftay. Hal qofna
waxaa la dilay isniintii ka horraysay, oo ahayd maalinkii
ugu horraysay ee magadaalada Addis Ababa ay bannaanbaxyadu
ka billowdeen.
Golaha Xuquuqda Aadanaha ee
Itoobiya wuxuu kaloo intaas ku daray in dadka xabsiyada lagu
hayo ay isugu jiraan dad taageerayaal u ah xisbiyada
mucaaradka ah iyo xubno rasmi ahaan uga tirsan xisbiyada
mucaaradka ah.
Radio Xoriyo
14 Jun. 2005
C/nuur Sh. Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 19 MB ee
dhererkeedu yahay 15670 KHZ, Maalmaha Talaadada iyo Jimcaha
7: 30PM waqtiga Afrikada Bari
Faafin: Somalitalk.com |
June 14, 2005
»Bogag
Soomaliyeed oo ku dhiiraday baahinta aflagaadada Islaamka
»DHIBAATADA
HAYSATA SOOMAALIDA KU NOOL WADDANKA YEMEN
»JAWAAB:
Maqaalkii Ogadenya vs Hargeysa | Maax
»Qaab
Nololeedka Soomaalida | Awes A.Osman
»MAXKAMADAHA
ISLAAMIGU, MA ISLAAM BAA? | Dr.Dhaanwade
»URURKII
NABAD DIIDKA AHAA OO 5 QAYBOOD U KALA JABAY
»Shariifow
(wixii xoog lagu qaado xoog baa lugu soo celiya) | C.M
»Geeddi:
“Meelna Gaari waa Geeddigaan Wadey” | C/waxid
»Xamar
ha iska xoreeyso isibaarda badatay
| Dirir
»Hargeysa
mise Hargageys. | Zahra
»Dib
allow u soo celi :: Doodwanaag
Q.37aad | Ing.
Guulwade
»Garaad
Sabool ah! |
Cabdillaahi C. Cige
»Hargeisa
vs Ogadenia | A Omar
Daabaco
Boggan | Print