Barnaamijkii Radio Xoriyo

10 Jun. 2005

• Madaxda mucaaradka Itoobiya oo guryahooda lagu xabisay.
• Safiirrada dowladaha deeqda bixiya oo bayaan ka soo saaray xaaladda qasan ee Itoobiya.
• Midowga Yurub oo Zenawi ka dalbay inuu is-dejiyo.
• Mac-hadka Saxaafadda Adduunka oo Itoobiya canbaareeyay.
• Bayaan ku saabsan xaaladda murugsan ee Itoobiya oo JWXO soo saartay.
• Barnaamijkii muxuu yidhi abwaanku iyo Idaajaa.

======================

Ciidammada ammaanka ee xukuumadda Itoobiya ayaa isku wareejiyay guryaha iyo xafiisyada madaxda xisbiyada mucaaradka ah, waxaana loo diiday inay wax dhaqdhaqaaq ah sameeyaan. Arrintan ayaa ka denbaysay, ka dib markii toddobaadkan oo dhan ka socdeen magaalada Addis Ababa isku dhacyo u dhexeeya ciidammada ammaanka iyo dad bannaanbaxyo samaynayay. Waxaana isku dhacyadaas ilaa iyo hadda ku dhintay, inta ay dawladu qiratay 26 qof..

Meydka dadkii Addis ababa lagu laayey | Sawirka: AFP Addis Ababa: 22 Qof ayaa la Diley, Boqolaal Kalena Waa la Dhaawacay

Hooggaamiyaha xisbiga ugu wayn xisbiyada mucaaradka ah ah e CUD ayaa sheegay in loo diiday inuu gurigiisa ka baxo, isla markaana ay waardiye ka hayaan ciidammo aad u badan.

Xisbiga CUD wuxuu sidoo kale sheegay in 14 ka mid ah xubnihiisa xabsiga loo taxaabay, saacado yar ka dib markii ay ciidammada ammaanku arbacadii rasaas ooda kaga qaadeen dad ku bannaanbaxayay badhtamaha magaalada Addis Ababa. Xubnahan xabsiga loo taxaabay ayaa dhammaantood ka tirsan masuuliyiinta maamulka dhexe ee xisbiga CUD ee mucaaradka ah, 12 ka mid ah mucaaradkaas la xidh-xidhay ayaa laga qabtay magaalada Addis Ababa, halka 2 kalana laga qabtay magaalada Jimma.

Ciidammada ammaanka ee gumaysiga Itoobiya ayaa rasaas arbacadii ku furay dad bannaanbax samaynayay, waxayna isla goobtii ku dileen 22  qof , in ka badan 100 qofna u gaysteen dhaawacyo iskugu jira halis iyo kuwa sahlan.

Isbitaal ku yaalla badhtamaha magaalada Addis Ababa ayaa la keenay maydka 11 qof, oo ugu yaraan 4 ka mid ah madaxa laga toogtay.

Dadka bannaanbaxan samaynayay ayaa ka cabanayay musuqmaasuqii lagu sameeyay doorasho ku sheegtii Baarlamaanka ee Itoobiya ka dhacday 15-kii May. Bannaanbaxyada musuqmaasuqaas lagu diiddan yahay ayaa magaalada Addis Ababa ka billowdeen maalinti isniinta ahayd, iyadoo ay billaabeen ardayda wax ka barata Jaamacadda Addis Ababa, waxaana isniintii la dilay 1 qof, dhawr kalana dhaawacyo loo gaystay. Waxaa sidoo kale xabsiyada loo taxaabay in ka badan 500 oo arday.

Wariyaha Radio Xorriyo ee magaalada Addis Ababa ayaa soo sheegaya in magaaladu ay aad u qasan tahay, isla markaana lagu soo daayay ciidammo aad u fara badan oo si wayn u hubaysan. Wuxuu kaloo intaas raaciyay in dadwaynuhu ay aad u cabsanayaan, ka dib markii ay ciidammadu rasaas aan loo miidaan-deyin oodda kaga qaadeen dadwaynihii bannaanbaxayay.

Wuxuu kaloo intaas ku daray in maydad badan iyo dhaawacba la keenay Isbitaalka Black Lion Hospital. Dad boqollaal gaadhaya ayaa iyaguna arbacadii isa soo dhoobay Isbitaalka hotriisa, kuwaasoo oohin iyo qaylo wehel ka dhiganayay.

Hooggaamiyaha xisbiga CUD ayaa sheegay in xisbigiisu aanu wax lug ah ku lahayn bannaanbaxyadan, wuxuuna sheegay in dawladu ay isku dayayso inay waddanka qalalaaso ka riddo, si loo joojiyo tirinta codadka, isla markaana ay eedda dusha ka saarto xisbiyada mucaaradka ah.

Bannaanbaxyadani waxay la kowsadeen markii uu taliska Meles Zenawi ku dhawaaqay inuu dib u dhigay dabool ka qaadista natiijada doorasho ku sheegta.

Bannaanbaxyadan isniintii ka billowday Jaamacadda Addis Ababa ayaa dad badan soo xusuusiyay isku dhacyadii dhex maray ardayda iyo ciidammada ammaanka sannadkii 2001 oo lagu dilay inta ay dawladu qiratay 40 qof.

Safiirrada dowladaha deeqda bixiya oo bayaan ka soo saaray xaaladda qasan ee Itoobiya.

Safiirro uu fadhigoodu yahay magaalada Addis Ababa oo tiradoodu gaadhayso 20 safiir oo ka socda dalalka deeqda bixiya iyo wakiilka rasmiga ee Midowga Yurub iyo hay’ada Lacagta Adduunka ee IMF ayaa khamiistii magaalada Addis Ababa ka soo saaray bayaan wadajir ah oo ay kaga hadlayaan qul-quladaha ka socda waddanka Itoobiya.

Safiirrada ayaa bayaankoodan ku canaantay xukuumadda Meles Zenawi, waxayna ka dalbeen inay ka waantowdo qaabka naxariis darrada ah ee ay kula dhaqanto dadka rayadka ah ee bannaanbaxyada nabadgelyada ah samaynaya, isla markaana ay ilaaliso mabaadii’da caalamiga ah ee xuquuqda aadanaha.

Ambaashitooradu waxay xukuumadda iyo xisbiyada mucaaradka ahba ka codsadeen inay xasilloonida ilaaliyaan oo khilaafkooda nabadgelyo ku dhammeeyaan. Waxayna sheegeen inay wali sii wadayaan dadaalka ku aaddan in la hubiyo saxnimada doorashada iyo in la dhammaystiro tirinta codadka dhiman.

Midowga Yurub oo Zenawi ka dalbay inuu is-dejiyo.

Midowga Yurub ayaa bayaan u gaar ah ka soo saaray qulquladaha ka taagan dalka Itoobiya, isagoo muujiyay inuu aad uga walwalsan yahay dilkii ay ciidammada ammaanku dileen dadkii bannaanbaxyada samaynayay.

Bayaankan ayaa waxaa soo saaray madaxa siyaasada dibadda ee Midowga Yurub Javier Solana iyo Ergayga qaybta horumarinta ee Midowga Yurub Lousi Michel, waxyna dawlada ugu baaqeen inay ka waantowdo fal kasta oo xaaladda sii calwin kara.

Labadan masuul ee Midowga Yurub ayaa sheegay inay ra’iisal wasaaraha Itoobiya ka codsadeen inuu is-dejiyo, waxayna u sheegeen sida ay uga walaacsan yihiin xaaladda waddankiisa.

Ergadii Midowga Yurub u qaabilsanayd u kuur-gelidda doorashada Itoobiya ayaa hadda ka hor soo saartay qoraal ay ku canbaaraynayso xafiiska doorashooyinka Itoobiya oo ay sheegtay inuu hawlgab noqday, isla markaana aanu waxba kala soconin qaabka codadka loo tirinayo.

Ergadu waxay qoraalkan soo saartay, ka dib markii ay soo gaadheen cabshooyin muujinaya in xukuumadda Zenawi ay musuqmaasuq wayn ku samaysay doorashada.

Mac-hadka Saxaafadda Adduunka oo Itoobiya canbaareeyay.

Mac-hadka Saxaafadda Adduunka, ee fadhigiisu yahay caasimada dalka Austria magaalada Vienna, ayaa xukuumadda Itoobiya si wayn ugu canbaareeyay xadgudubyada ay u gaysatay suxufiyiintii wararka ka soo tebinayay goobihii ay ciidammada ammaanku dadka ku laynayeen markii ay isku dhacyadu ka dheceen magaalada Addis Ababa.

Mac-hadka Saxaafadda Adduunka ayaa canbaareeyay go’aankii wasiirka wafaafinta Itoobiya ee uu talaadadii go,aanka ku gaadhay inuu shaqada ka joojiyo shaqaale u shaqaynayay idaacadaha Deutsche Welle iyo Voice af America.

Mac-hadku wuxuu kaloo xukuumadda Itoobiya ku canbaareeyay iyadoo bishii Juun labadeedii xidhay ugu yaraan 6 suxufi, kuwaasoo loo xidhay maqaallo ay ka qoreen doorashadii la qabtay bishii May. Mac-hadka Saxaafadda Adduunku wuxuu si wayn u canbaaraynayaa sida ay xukuumadda Itoobiya saxaafadda ugu xadgudubto iyo xakamaynta ay ku hayso xorriyada saxufiyiinta wararka ka diyaarinaya isku dhacyada ka dhashay doorashadii la musuqmaasuqay.

• Barnaamijkii muxuu yidhi abwaanku iyo Idaajaa ka dhegeyso halkan....

Radio Xoriyo

10 Jun. 2005

C/nuur Sh. Mohamed

radioxoriyo@ogaden.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari